ଭୁବନେଶ୍ବର: ରାଜ୍ୟରେ ଗୋଟିଏ କି ଦୁଇଟି ନୁହେଁ 12ଟି ଐତିହ୍ୟପୂର୍ଣ୍ଣ ସ୍ଥାନରେ ଚାଲିଛି ବେଆଇନ ନିର୍ମାଣ କାର୍ଯ୍ୟ । କେବଳ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ନୁହେଁ ରାଜ୍ୟରେ 12ଟି ସ୍ଥାନରେ ଚାଲିଛି ବେଆଇନ ନିର୍ମାଣ । ଐତିହ୍ୟ ନିକଟରେ ନିର୍ମାଣ କାର୍ଯ୍ୟକୁ ନେଇ ପ୍ରଶ୍ନ ଉଠାଇଛି ଏଏସଆଇ(ASI) । ଏଏସଆଇର ବିନା ଅନୁମତିରେ ଏ ସବୁ କାର୍ଯ୍ୟ ଚାଲିଥିବା ଅଭିଯୋଗ ହୋଇଛି ।
ରାଜଧାନୀ ଭୁବନେଶ୍ବରରେ ବେଆଇନ ଭାବେ ଚାଲିଛି ଐତିହ୍ୟ ସ୍ଥାନ ନିକଟରେ ନିର୍ମାଣ କାର୍ଯ୍ୟ । ନିର୍ମାଣ କାର୍ଯ୍ୟର ଦାୟିତ୍ବ ନେଇଛନ୍ତି ରାଜ୍ୟ ସରକାର, ଜିଲ୍ଲା ପ୍ରଶାସନ ଓ କେନ୍ଦ୍ରୀୟ ସଂସ୍ଥା । ଭୁବନେଶ୍ବରରେ 3ଟି, କଟକରେ 2ଟି, ଯାଜପୁରରେ 3ଟି, ପୁରୀରେ 3ଟି ଓ ଢେଙ୍କାନାଳରେ ଗୋଟିଏ ସ୍ଥାନରେ ଚାଲିଛି କାର୍ଯ୍ୟ । ମୁକ୍ତେଶ୍ଵର ମନ୍ଦିରର ନିଷିଦ୍ଧାଞ୍ଚଳରେ ନିର୍ମାଣ କାର୍ଯ୍ୟ ଜାରି ରହିଛି । ଏହି ନିର୍ମାଣ କାର୍ଯ୍ୟ ହାତକୁ ନେଇଛି ଭୁବନେଶ୍ବର ସ୍ମାର୍ଟ ସିଟି ଲିମିଟେଡ଼ ।
ଭୁବନେଶ୍ବରର ଶାରି ଦେଉଳରେ ବେଆଇନ ନିର୍ମାଣ କାର୍ଯ୍ୟ କରୁଛି ଓଡ଼ିଶା ବ୍ରିଜ୍ ଆଣ୍ଡ କନଷ୍ଟ୍ରକସନ୍ କର୍ପୋରେସନ ଲିମିଟେଡ୍(ଓବିସିସି) । ଐତିହ୍ୟ ଖଣ୍ଡଗିରି ଓ ଉଦୟଗିରି ନିକଟରେ ନିର୍ମାଣ ଚାଲିଛି ଡ୍ରେନେଜ ବ୍ୟବସ୍ଥା । ସେହିପରି ବାରବାଟୀ ଦୁର୍ଗର ନିଷିଦ୍ଧାଞ୍ଚଳରେ ନିର୍ମାଣ ଚାଲିଛି ଅଙ୍ଗନବାଡି କେନ୍ଦ୍ର । ଯାହାର ନିର୍ମାଣ ଦାୟିତ୍ବ ନେଇଛି କଟକ ମହାନଗର ନିଗମ । ଯାଜପୁର ଟାଉନରେ ବୌଦ୍ଧ ପୀଠରେ ରାସ୍ତା ଚଉଡା ସହ ଡ୍ରେନେଜ କାର୍ଯ୍ୟ ଚାଲିଛି ।
ଯାଜପୁର ଉଦୟଗିରିରେ ବଡ଼ଚଣା ବ୍ଲକ ଉନ୍ନୟନ ଅଧିକାରୀଙ୍କ ଦ୍ଵାରା ଚାଲିଛି ନିର୍ମାଣ କାର୍ଯ୍ୟ । ଯାଜପୁର ଅଠର ନଳା ନିକଟରେ ନିର୍ମାଣଧୀନ ଅଛି ରାସ୍ତା ପ୍ରଶସ୍ତିକରଣ କାର୍ଯ୍ୟ ସାଙ୍ଗକୁ ଡ୍ରେନ କାର୍ଯ୍ୟ । କଟକର ସିମହନ୍ଥ ମନ୍ଦିରର ନିଷିଦ୍ଧାଞ୍ଚଳର ଚାଲିଛି ମହାନଦୀ ଉପରେ ବ୍ରିଜ । କପିଳାସରେ ନିର୍ମାଣାଧୀନ ଅଛି ବିଲ୍ଡିଂ କାର୍ଯ୍ୟ । ସେହିପରି କୋଣାର୍କରେ ବେଆଇନ ଭାବେ ବିଲ୍ଡିଂ କାର୍ଯ୍ୟ । ଶ୍ରୀମନ୍ଦିର ପରିକ୍ରମା ପ୍ରକଳ୍ପ ସାଙ୍ଗକୁ ମେଘନାଦ ପ୍ରାଚେରୀ କଡ଼ରେ ଚାଲିଛି ନିର୍ମାଣ କାର୍ଯ୍ୟ । ସେହିପରି ଅଠର ନଳା ନିକଟରେ ପୁରୀ ପ୍ରଶାସନ ପକ୍ଷରୁ ଗରୁଡ଼ ଷ୍ଟାଚ୍ୟୁ ନିର୍ମାଣ ଚାଲିଛି ।
ଇଟିଭି ଭାରତ, ଭୁବନେଶ୍ବର
