ଭୁବନେଶ୍ବର: ସୁପ୍ରିମୋଙ୍କ ୫Tକୁ କାର୍ଯ୍ୟକାରୀ କରିବା ପାଇଁ ଫୁଲ ଦମରେ ନେତାମନ୍ତ୍ରୀ । ଏହି କ୍ରମରେ ଗୁରୁବାର ସକାଳେ ଉଚ୍ଚଶିକ୍ଷା ମନ୍ତ୍ରୀ ଅରୁଣ ସାହୁ ଅଚାନକ ବାଣୀବିହାର ଗସ୍ତ କରିଛନ୍ତି । ସକାଳୁ ସନ୍ଧ୍ୟା 6 ପର୍ଯ୍ୟନ୍ତ ବାଣୀବିହାର କ୍ୟାମ୍ପସରେ ରହିଲେ ଉଚ୍ଚଶିକ୍ଷା ମନ୍ତ୍ରୀ ଅରୁଣ ସାହୁ । ଦିନ ତମାମ କଲେଜ କ୍ୟାମ୍ପସରେ ଗୋଟି ଗୋଟି କରି ସବୁ ସ୍ଥାନ ନିଜେ ବୁଲି ଦେଖିଛନ୍ତି । ଛାତ୍ରଛାତ୍ରୀ ଓ ଶେଷରେ ଅଧ୍ୟାପକ ଓ ଚତୁର୍ଥ କର୍ମଚାରୀ ମାନଙ୍କ ସହ ଆଲେଚନା କରିଛନ୍ତି ମନ୍ତ୍ରୀ ଅରୁଣ ସାହୁ ।
କ୍ୟାମ୍ପସର ସମସ୍ତ ସୁବିଧା ଓ ଅସୁବିଧା କିଭଳି ଭାବରେ ସଜାଡିଲେ ଭଲ ହେବ ତାହା ଉପରେ ଛାତ୍ରଛାତ୍ରୀଙ୍କ ଠାରୁ କର୍ମଚାରୀ ସଭିଁଙ୍କ ଠାରୁ ମତାମତ ନେଇଛନ୍ତି । କଲେଜର ପିଜି କାଉନସିଲ ଠାରୁ ଛାତ୍ରଛାତ୍ରୀଙ୍କ ହଷ୍ଟେଲ ଗୃହ, କଲେଜ କୋଠରୀ, କଲେଜର ପରିମଳ ବ୍ୟବସ୍ଥା ସବୁ ନିଜେ ଯାଞ୍ଚ କରିଛନ୍ତି । ଏଥିସହ ଖୁବଶୀଘ୍ର କଲେଜର ସମସ୍ତ ଅସୁବିଧାର ସମାଧାନ ମଧ୍ୟ କରାଯିବ ବୋଲି ପ୍ରତିଶ୍ରୁତି ଦେଇ ଫେରିଛନ୍ତି ।
ଭୁବନେଶ୍ବରରୁ ଶତରୂପା ସାମନ୍ତରାୟ, ଇଟିଭି ଭାରତ
