ଭୁବନେଶ୍ବର: ପୁଣି ଉତ୍କଳ ବିଶ୍ବ ବିଦ୍ୟାଳୟରେ ଉତ୍ତେଜନା । ବିଳମ୍ବିତ ରାତିରେ ଛାତ୍ର ନିବାସରେ ୨ ଛାତ୍ର ଗୋଷ୍ଠୀ ମଧ୍ୟରେ ଗଣ୍ଡଗୋଳ । ଗଣ୍ଡଗୋଳ ପରେ ହଷ୍ଟେଲରେ ପଶି ଗାଡ଼ି ପୋଡ଼ି ଦେଇଛନ୍ତି ଦୁର୍ବୃତ୍ତ। ବିଶ୍ୱବିଦ୍ୟାଳୟର ଗୋଦାବରୀଶ ଛାତ୍ରବାସରେ ଘଟିଛି ଏଭଳି ଘଟଣା । ଏନେଇ ଖବର ପାଇ ସହିଦନଗର ଥାନା ପୋଲିସ ଘଟଣାସ୍ଥଳରେ ପହଞ୍ଚି ବୁଝାସୁଝା କରୁଛି ।
ସୂଚନା ଅନୁୟାୟୀ, ପୂର୍ବ ଶତ୍ରୁତାକୁ ଭିତ୍ତି କରି ଦୁଇ ଛାତ୍ର ଗୋଷ୍ଠୀଙ୍କ ମଧ୍ୟରେ ଗତକାଲି ରାତିରେ ଅସନ୍ତୋଷ ଦେଖାଦେଇଥିଲା l ଏହାପରେ ଛାତ୍ରବାସରେ ଗୋଟିଏ ଗୋଷ୍ଠୀ ଅନ୍ୟ ଗୋଷ୍ଠୀର ପିଲାମାନଙ୍କ ଦୁଇଟି ଗାଡିରେ ପେଟ୍ରୋଲ ପକାଇ ନିଆଁ ଲଗାଇଦେଇଥିଲେ l ଗତକାଲି ରାତିରେ କିଛି ଯୁବକ ହଷ୍ଟେଲରେ ଥିବା ସମସ୍ତ CCTV କ୍ୟାମେରାକୁ ଅଚଳ କରିଦେଇ, ଦୁଇଟି ଗାଡିକୁ ପୋଡିଦେଇଥିବା କହିଛନ୍ତି ଉପସ୍ଥିତ ଥିବା ଛାତ୍ର l ଏହି ଘଟଣା ସକାଳେ ଜଣାପଡିବା ପରେ ହଷ୍ଟେଲ ପରିସରରେ ଉତ୍ତେଜନା ଦେଖାଦେଇଛି l ଘଟଣା ସ୍ଥଳରେ ପୋଲିସ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିବା ସହିତ ହଷ୍ଟେଲ କର୍ତ୍ତୃପକ୍ଷଙ୍କ ସହ ଆଲୋଚନା କରୁଛି ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
