ଭୁବନେଶ୍ବର: ପ୍ରେମ-ପ୍ରତାରଣା , ଧୋକା । ପ୍ରେମିକାକୁ ବିବାହ ପ୍ରଲୋଭନ ଦେଖାଇ ଶାରୀରିକ ସମ୍ପର୍କ ରଖିବା ପରେ ଧୋକ୍କା ଦେଇଛି ପ୍ରେମିକ । ଅନ୍ୟତ୍ର ବିବାହ କରୁଥିଲା ବେଳେ ମଣ୍ଡପରୁ ଗିରଫ କରିଛି କମିସନରେଟ ପୋଲିସ । ଏଭଳି ଘଟଣା ଘଟିଛି ଏୟାରଫିଲଡ ଥାନା ଅଞ୍ଚଳରେ ।
ଅଭିଯୁକ୍ତ ଆଲୟ ବିଶୋଇକୁ ଗିରଫ କରି କୋର୍ଟ ଚାଲାଣ କରିଛି ପୋଲିସ । ଅଭିଯୁକ୍ତ ପ୍ରେମିକ ଘର ଗଞ୍ଜାମର ପାଟପୁରର କୋନକୋରଡା ବୋଲି ଜଣା ପଡିଛି । ସୂଚନା ମୁତାବକ ପ୍ରେମିକ ନିଜ ଗାଁର ଜଣେ ଯୁବତୀ ସହ ପ୍ରେମ ସମ୍ପର୍କ ରଖିଥିଲା । ଏପରିକି ବିବାହର ପ୍ରତିଶୃତି ଦେଇ ରଖିଥିଲା ଶାରିରିକ ସମ୍ପର୍କ । ହେଲେ ଶେଷ ମୁହୁର୍ତରେ ୧୦ ବର୍ଷର ସମ୍ପର୍କ ଛିନ୍ନ କରି ଅନ୍ୟ ଝିଅକୁ ବିବାହ ଉଦ୍ୟମ କରୁଥିଲା ଯୁବକ ।
ଏ ନେଇ ସୂଚନା ପାଇ ପ୍ରେମିକା ଜାଣିବାକୁ ପାଇଥିଲା ଯେ, ଯୁବକ ଜଣଙ୍କ ଏୟାରଫିଲଡ ଥାନା ଅଞ୍ଚଳର ହାଇଟେକ ପ୍ଲାଜାରେ ରହୁଛି । ଏନେଇ ଏୟାରଫିଲଡ ଥାନାରେ ଅଭିଯୋଗ କରିଛି । ଏହି ଅଭିଯୋଗ ଆଧାରରେ ଆଜି ଯୁବକର ବିବାହ ବେଳେ ବିବାହ ମଣ୍ଡପରୁ ଗିରଫ କରିଛି ଏୟାରଫିଲଡ ଥାନା ପୋଲିସ । ଆଇପିସିର ଧାରା 376(2)(n)/506 ରେ ଅଭିଯୁକ୍ତ ପ୍ରେମିକକୁ କୋର୍ଟ ଚାଲାଣ କରାଯାଇଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
