ଭୁବନେଶ୍ବର: ସମାଜସେବାର ଉଲ୍ଲେଖନୀୟ କାର୍ଯ୍ୟ ପାଇଁ ରାଜ୍ୟପାଳଙ୍କ ଦ୍ଵାରା ସମ୍ବର୍ଦ୍ଧିତ ହେଲେ ଯୁବ ସମାଜସେବୀ ଚିନ୍ମୟ ପାତ୍ର । ରାଜଭବନରୁ ଆମନ୍ତ୍ରଣ ପାଇ କଟକର ସଂକଳ୍ପ ସେବା ସଂଘର ସଭାପତି ଚିନ୍ମୟ ପାତ୍ର ରାଜଭବନରେ ପହଞ୍ଚିଥିଲେ । ଏହାପରେ ରାଜ୍ୟପାଳ ପ୍ରଫେସର ଗଣେଶୀଲାଲ୍ ତାଙ୍କୁ ସମ୍ବର୍ଦ୍ଧିତ କରିଛନ୍ତି । ଚିନ୍ମୟଙ୍କ ସମାଜସେବା କାର୍ଯ୍ୟ ବିଷୟରେ ବିଭିନ୍ନ ଗଣମାଧ୍ୟମ ଓ ସାମାଜିକ ଗଣମାଧ୍ୟମରୁ ଜାଣିବାକୁ ପାଇଥିଲେ ରାଜ୍ୟପାଳ ।
ଏହାକୁ ନେଇ ତାଙ୍କୁ ଉତ୍ସାହିତ କରିବା ସହ ଆଶୀର୍ବାଦ ଦେଇଛନ୍ତି । ଏହି ଅବସରରେ ସମାଜସେବୀ ଚିନ୍ମୟ ପାତ୍ର ରାଜ୍ୟପାଳଙ୍କ ନିକଟରେ ୩ଟି ଗୁରୁତ୍ୱପୂର୍ଣ୍ଣ ବିଷୟ ଉପସ୍ଥାପନ କରିଛନ୍ତି । ବିଶେଷକରି ଜଳବାୟୁ ପରିବର୍ତ୍ତନରେ କୁତ୍ରିମ ଆଲୋକ ପ୍ରଦୂଷଣ ରୋକିବା, ଗୋସେବା ଓ ଗୋ ଆଧାରିତ କୃଷି କାର୍ଯ୍ୟ ପାଇଁ ପ୍ରୋତ୍ସାହନ, ଅସହାୟଙ୍କ ପାଇଁ ଥଇଥାନ ଭଳି ଗୁରୁତ୍ବପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା କରିଛନ୍ତି ଚିନ୍ମୟ ।
ଏହି ସବୁ ଦିଗରେ ଆଗାମୀ ଦିନରେ କିଭଳି କାର୍ଯ୍ୟ କରାଯିବ ସେନେଇ ଗୁରୁତ୍ୱାରୋପ କରିଛନ୍ତି । ରାଜ୍ୟପାଳଙ୍କ ଆଶୀର୍ବାଦକୁ ଆଗକୁ କାର୍ଯ୍ୟ କରିବା ପାଇଁ ଅଧିକ ପ୍ରେରଣା ଯୋଗାଇବ ବୋଲି କହିଛନ୍ତି ଚିନ୍ମୟ ପାତ୍ର ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
