ଭୁବନେଶ୍ବର: କୃଷି ଓ କୃଷକର ବିକାଶ ଦିଗରେ ଆଉ ଗୋଟିଏ ପାଦ ଆଗେଇଲେ ରାଜ୍ୟ ସରକାର,ବିଲ ଆଣ୍ଡ ମଲିଣ୍ଡା ଗେଟ୍ସ ଫାଉଣ୍ଡେସନ ସହ ବୁଝାମଣାପତ୍ର ସ୍ବାକ୍ଷରିତ। ରାଜ୍ୟରେ ନାମମାତ୍ର ଓ ଭୂମିହୀନ ଚାଷୀ ମାନଙ୍କର ଜୀବନ ଜୀବିକା ସମୃଦ୍ଧି ପାଇଁ ନିରନ୍ତର କୃଷି ପ୍ରୋତ୍ସାହନ ଓ କୃଷି ପ୍ରଗତୀ ନିମନ୍ତେ ଅଧିକ ସହାୟତା ପ୍ରଦାନ କରିବା ଉଦ୍ଧେଶ୍ୟରେ କରାଯାଇଛି ।
ମଙ୍ଗଳବାର ଭୁବନେଶ୍ବର କୃଷି ଭବନରେ କୃଷି ଓ କୃଷକ ସଶକ୍ତିକରଣ ,ମତ୍ସ୍ୟ ଓ ପ୍ରାଣୀସମ୍ପଦ ବିକାଶ ବିଭାଗ ମାଧ୍ୟମରେ ଓଡିଶା ସରକାର ଏବଂ ବିଲ ମିଲିଣ୍ଡା ଗେଟସ ଫାଉଣ୍ଡେସନ ମଧ୍ୟରେ ଏକ ବୁଝାମଣାପତ୍ର ସ୍ବାକ୍ଷରିତ ହୋଇଛି। ଏହା ଦ୍ବାରା ଆଧୁନିକ ଜ୍ଞାନ କୌଶଳ,ବୈଷୟିକ ଜ୍ଞାନ,ପ୍ରଯୁକ୍ତି ଓ ସୃଜନଶୀଳ କାର୍ଯ୍ୟକ୍ରମ ଦ୍ବାରା କ୍ଷୁଦ୍ର ଚାଷୀଙ୍କ କୃଷି ଉତ୍ପାଦନ ବୃଦ୍ଧି ପାଇଁ ଅଧିକ ସୁଯୋଗ ସୃଷ୍ଟି କରିପାରିବ। କୃଷିକୁ ଚିରପୋଷଣୀୟ କରିବା,ବଜାର ଦକ୍ଷତା ବୃଦ୍ଧି,ଖାଦ୍ୟର ଗୁଣାତ୍ମକ ମାନ ବୃଦ୍ଧି ସହିତ ମରୁଡି ଆଶଙ୍କା କମାଇବା ,କୀଟ ଆକ୍ରମଣ ଓ ଅନ୍ୟ ଜଳବାୟୁ ଜନିତ ବିପଦକୁ ହ୍ରାସ କରିବା ,ମୂର୍ତ୍ତିକା ଓ ଜଳସମ୍ବଳ ପରିଚାଳନାକୁ ଦକ୍ଷ କରିବା ଆଦିରେ ନିଷ୍ପତ୍ତି ଗ୍ରହଣ କରିବାରେ ଆବଶ୍ୟକ ହେଉଥିବା ତଥ୍ୟ ବ୍ୟବହାରକୁ ଗେଟସ ଫାଉଣ୍ଡେସନ ତ୍ବରାନ୍ବିତ କରିବ। ଏହି ବୁଝାମଣାପତ୍ର ମାଧ୍ୟମରେ ଗେଟସ ଫାଉଣ୍ଡେସନ ଓ ଏହାର ଭାଗିଦାରୀମାନେ ଡାଟା ସିଷ୍ଟମ ,ପ୍ରଯୁକ୍ତି ବିଦ୍ୟା ବିକାଶ ଓ ଘରୋଇ କ୍ଷେତ୍ରରେ ବିଭିନ୍ନ କାର୍ଯ୍ୟକ୍ରମ ଗ୍ରହଣ କରିପାରିବେ।
ସରକାରଙ୍କ ମାର୍ଗଦର୍ଶୀ ନେତୃତ୍ବରେ ଓଡ଼ିଶାର କୃଷି କ୍ଷେତ୍ର ସମ୍ଭାବ୍ୟ ଅଭିବୃଦ୍ଧି ଦିଗରେ ଅଗ୍ରସର ହେଉଛି ମତ୍ସ୍ୟ ଓ ପ୍ରାଣୀସମ୍ପଦ ବିକାଶ ବିଭାଗ କ୍ଷୁଦ୍ର ଉତ୍ପାଦନକାରୀଙ୍କ ପାଇଁ ଏକ ବିସ୍ତୃତ ସାମାଜିକ ଆର୍ଥିକ ଅବସ୍ଥାର ଉନ୍ନତି ପାଇଁ କାର୍ଯ୍ୟ କରୁଅଛି ବୋଲି ମୁଖ୍ୟମନ୍ତ୍ରୀ ଏକ ଭିଡିଓ କ୍ଲିପିଙ୍ଗ ମାଧ୍ୟମରେ କହିଥିଲେ।
କୃଷକଙ୍କ ଆୟ ବୃଦ୍ଧି ଓ ପ୍ରାଣୀସମ୍ପଦ ସ୍ବାସ୍ଥ୍ୟର ବିକାଶ ଦିଗରେ ବିଭିନ୍ନ କାର୍ଯ୍ୟକ୍ରମ ଗ୍ରହଣ କରୁଛନ୍ତି ରାଜ୍ୟ ସରକାର। ଗେଟସ ଫାଉଣ୍ଡେସନ ସହଯୋଗରେ ସରକାର ବିଶ୍ବର ଶ୍ରେଷ୍ଠ ପଦ୍ଧତି ,ସର୍ବଶ୍ରେଷ୍ଠ ପ୍ରଯୁକ୍ତି ଓ ଅଭିନଵ କୌଶଳ ଲାଭ କରିପାରିବ ବୋଲି କୃଷି ମନ୍ତ୍ରୀ ସୂଚନା ଦେଇଛନ୍ତି। ବିଲ ଓ ଗେଟସ ଫାଉଣ୍ଡେସନ ନିର୍ଦ୍ଦେଶକ ଅଳକେଶ ୱାଧୱାନି କ୍ଷୁଦ୍ର ଚାଷୀଙ୍କ ଜୀବିକାର ଉନ୍ନତି ପାଇଁ ଓଡିଶା ସରକାରଙ୍କୁ ସହଯୋଗ ଯୋଗାଇଦେଉଛୁ ବୋଲି କହିଥିଲେ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
