ଭୁବନେଶ୍ବର: ପୂଜା ପୁର୍ବରୁ ଧରପଗଡ । ଅପରାଧ ଓ ଅପରାଧିଙ୍କ ପଛରେ ପୋଲିସ ବାବୁ । ଗଞ୍ଜେଇ ବେପାରିକୁ ଧରିବାକୁ ନିଆରା ଢଙ୍ଗରେ ଅପରେସନ କରିଛି କମିସନରେଟ ପୋଲିସ ।
ଖଣ୍ଡଗିରି ଥାନା ଏଏସଆଇ ନିରଞ୍ଜନ ମଲ୍ଲିକ ଗଞ୍ଜେଇ ଗ୍ରାହକ ବେଶରେ ଧରିଛନ୍ତି ଗଞ୍ଜେଇ ବ୍ୟବସାୟୀକୁ । ଗିରଫ ହୋଇଥିବା ବ୍ୟକ୍ତି ହେଉଛି ନୟାଗଡ ଇଟାମାଟିର ପ୍ରଫୁଲ୍ଲ ଜେନା । ଏହାସହ ତା'ଠାରୁ 38 କିଲୋ ଗଞ୍ଜେଇ ଏବଂ ନଗଦ 91 ହଜାରେ ଟଙ୍କା ଜବତ କରିଛି କମିସନରେଟ ପୋଲିସ ।
ତେବେ ଥାନାଠୁ ମାତ୍ର ଅଳ୍ପ କିଛି ଦୂରରେ ପଟ୍ରୋଲ ପମ୍ପ ପଛରେ ରହି ଗଞ୍ଜେଇର ଖୁଚୁରା ବ୍ୟବସାୟ କରୁଥିଲା ପ୍ରଫୁଲ୍ଲ । ସେ ବୁଲୁଥିବା ସମୟରେ ମଧ୍ୟ ନିଜ ପାଖରେ ଅଳ୍ପ ପରିମାଣର ଗଞ୍ଜେଇ ରଖୁଥିଲା । ପ୍ରଫୁଲ୍ଲକୁ ଧରିବା ପାଇଁ ଗ୍ରାହକ ବେଶରେ ଯାଇ ଏଏସଆଇ ବ୍ୟବସାୟୀ ପାଖରେ ପହଞ୍ଚିଥିଲେ । ଏହାସହ ଏକ କିଲୋ ଗଞ୍ଜେଇ ଦରକାର ଏବଂ ପୂଜାରେ ମିଳିବନି ତେଣୁ ଅଧିକ ଦରକାର କହି ଉକ୍ତ ବ୍ୟବସାୟୀର ବିଶ୍ବାସ ଜନ୍ମାଇଥିଲେ । ପରେ ଘରେ ଲୁଚାଇଥିବା ଗଂଜେଇ ସହ ତାକୁ ଗିରଫ କରିଥିଲା କମିସନରେଟ ପୋଲିସ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
