ଭୁବନେଶ୍ବର: ମିଳିଲା ଆସ୍କା କଂଗ୍ରେସ ପୂର୍ବତନ ବିଧାୟକ ସରୋଜ ପାଢୀଙ୍କ ସନ୍ଧାନ । ରାମେଶ୍ବରମରୁ ଉଦ୍ଧାର କରି ଭୁବନେଶ୍ବର ଆଣିଛି କମିଶନରେଟ୍ ପୋଲିସ । ଥାନାରେ ପଚରାଉଚରା ପରେ ପରିବାର ଲୋକଙ୍କୁ କରିବ ହସ୍ତାନ୍ତର । ଗତ ୧୨ ତାରିଖରେ ମର୍ଣ୍ଣିଂ ୱାକ୍ ଯାଇ ଫେରିନଥିଲେ ସରୋଜ ପାଢୀ ।
ସୂଚନା ଅନୁଯାୟୀ, ବିଧାୟକଙ୍କ ନିଖୋଜ ପରେ ହଟଚମଟ ସୃଷ୍ଟି ହୋଇଥିଲା । ଏପରିକି ଅପହରଣ କରାଯାଇଥିବା ସନ୍ଦେହ କରି ସରୋଜଙ୍କ ପୁଅ କ୍ୟାପିଟାଲ ଥାନାରେ ଅଭିଯୋଗ କରିଥିଲେ । ପୋଲିସ ଘଟଣାର ତଦନ୍ତ କରି 5 ଦିନ ପରେ ବିଧାୟକଙ୍କୁ ଠାବ କରିଛି । ତାମିଲନାଡୁର ରାମେଶ୍ବରମରୁ ଉଦ୍ଧାର କରିଛି ପୋଲିସ । ଭୁବନେଶ୍ବର ୟୁନିଟ-୬ ରାଧାକୃଷ୍ଣ ଏନକ୍ଲେଭରେରେ ରହିଆସୁଥିଲେ ସରୋଜ ପାଢୀ । ହଠାତ୍ ଗତ ୧୨ ତାରିଖରେ କେଉଁଆଡେ ନିଖୋଜ ହୋଇଯାଇଥିଲେ । ତେବେ ସେ ନିଜେ କେଉଁଠାକୁ ଯାଇଥିଲେ କିମ୍ବା ଏଥିରେ ଅନ୍ୟ କାହାର ହାତ ଅଛି ସେନେଇ ସ୍ପଷ୍ଟ ହୋଇନାହିଁ । ୬୨ ବର୍ଷୀୟ ସରୋଜ ପାଢୀ ୨୦୦୪ ରୁ ୨୦୦୯ ପର୍ଯ୍ୟନ୍ତ ଆସ୍କା ବିଧାୟକ ଥିଲେ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
