ଭୁବନେଶ୍ବର: ଆଜିଠୁ ରାଜ୍ୟରେ ଲାଗୁ ହେଲା ନୂଆ ଗାଇଡଲାଇନ । ପୂର୍ବବର୍ଷ ଭଳି ଚଳିତ ବର୍ଷ ମଧ୍ୟ ଓଡିଶାରେ ଫୁଟିବନି ବାଣ । କୋରୋନା ସଂକ୍ରମଣ ଓ ସାଧାରଣ ଲୋକଙ୍କ ସୁରକ୍ଷା ଦୃଷ୍ଟିରୁ ଚଳିତ ବର୍ଷ ଦୀପାବଳିରେ ବାଣ ବିକ୍ରି ଏବଂ ଫୁଟାଇବା ଉପରେ କଟକଣା ଲଗାଇଛନ୍ତି ସରକାର । ବର୍ତ୍ତମାନ ପାର୍ବଣ ଋତୁ ଚାଲିଥିବାରୁ କୋଭିଡ ପ୍ରସାରକୁ ଆଖି ଆଗରେ ରଖି ଅକ୍ଟୋବର ମାସ ପାଇଁ ଏପରି ଗାଇଡଲାଇନ ଜାରି କରିଛନ୍ତି ରାଜ୍ୟ ସରକାର । ଅକ୍ଟୋବର ୧ ରୁ ନଭେମ୍ବର ୧ ତାରିଖ ପର୍ଯ୍ୟନ୍ତ ବଳବତ୍ତର ରହିବ କଟକଣା ।
ଆଗକୁ ଦଶହରା ଏବଂ ଦୀପାବଳି ଭଳି ଦୁଇଟି ବଡ ପର୍ବ ଆସୁଛି । ଦଶହରାରେ ବିଭିନ୍ନ ସ୍ଥାନରେ ରାବଣ ପୋଡି ଓ ବିସର୍ଜନ ସମୟରେ ଅଧିକ ବାଣ ଫୁଟିବାର ଦେଖାଯାଏ । ସେହିପରି ଦୀପାବଳି ଆସୁଥିବାରୁ ରାଜ୍ୟ ସରକାର ବାଣ ବିକ୍ରି ଓ ଫୁଟାଇବା ନିଷେଧ ଘୋଷଣା କରିଛନ୍ତି ।
ସହରାଞ୍ଚଳଗୁଡିକରେ ରାତ୍ରିକାଳୀନ କର୍ଫ୍ୟୁ ସେପ୍ଟେମ୍ବର ମାସ ପରି ରହିବ । ଦୁର୍ଗାପୂଜା ଓ ଲକ୍ଷ୍ମୀପୂଜାକୁ ନଜରରେ ରଖି ନାଇଟ କର୍ଫ୍ୟୁ କଡାକଡି କରାଯାଇଛି । ସାରା ରାଜ୍ୟର ସହରାଞ୍ଚଳରେ ରାତି ୧୦ଟାରୁ ସକାଳ ୫ଟା ଯାଏଁ କର୍ଫ୍ୟୁ ଜାରି ହେବାକୁ ଥିବାବେଳେ ଭୁବନେଶ୍ବର ଓ କଟକରେ ଅକ୍ଟୋବର ୧୧ରୁ ସକାଳ ରାତି ୮ଟାରୁ ସକାଳ ୫ ଟା ଯାଏଁ କର୍ଫ୍ୟୁ ଲାଗୁ ହେବ । ସଭାସମିତି, ସାଂସ୍କୃତିକ କାର୍ଯ୍ୟକ୍ରମ ଆଦି ପୂର୍ବଭଳି ବନ୍ଦ ରହିବ । ବିବାହରେ ମଧ୍ୟ ସେପ୍ଟେମ୍ବରରେ ଥିବା ଗାଇଡଲାଇନ ଯେପରି, ବିବାହରେ ୨୫୦ ଜଣକୁ ଅନୁମତି ମିଳିଥିବା ବେଳେ ବିବାହ ଶୋଭାଯାତ୍ରାରେ ମାତ୍ର ୫୦ ଜଣକୁ ଅନୁମତି ଦିଆଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
