ଭୁବନେଶ୍ବର: ଦିଅର-ଭାଉଜ ସମ୍ପର୍କରେ ବଳି ପଡିଲା ସ୍ତ୍ରୀ । ଆଉ ତାଙ୍କୁ ହତ୍ୟା କରାଯାଇଥିବା ନେଇ ମହିଳା କମିଶନଙ୍କ ନିକଟରେ ଅଭିଯୋଗ ଆଣିଛନ୍ତି ମୃତକଙ୍କ ଭାଇଭଉଣୀ ।
ସୂଚନାନୁସାରେ, ଯାଜପୁର ଜିଲ୍ଲାର ବରୀ ବ୍ଲକ ଅଞ୍ଚଳର ଢିଅ ସାହିର ପ୍ରଭାତ ଜେନାଙ୍କୁ ବିବାହ କରିଥିଲେ ସସ୍ମିତା ଜେନା । ଆଉ ଉଭୟଙ୍କ ବିବାହର 3 ବର୍ଷ ସମ୍ପର୍କରେ ଏବେ ପଡିଛି ପୂର୍ଣ୍ଣଚ୍ଛେଦ । ପ୍ରଭାତ ଓ ତାଙ୍କ ଭାଉଜଙ୍କ ମଧ୍ୟରେ ସମ୍ପର୍କ ଥିବା ନେଇ ପତ୍ନୀ ସସ୍ମିତା ଜାଣିପାରିଥିଲେ । ଯାହାକୁ ନେଇ ପ୍ରଭାତ ଓ ସସ୍ମିତାଙ୍କ ମଧ୍ୟରେ ପାଟିତୁଣ୍ଡ ଲାଗିଥିଲା । ଏଭଳି ସ୍ଥଳରେ କିଛି ଦିନ ବିତିଯାଇଥିଲେ ମଧ୍ୟ ଗତ ଶନିବାର ରାତି 11ଟା ସମୟରେ ପଙ୍ଖାରେ ସସ୍ମିତା ରଶି ଲଗାଇ ଆତ୍ମହତ୍ୟା କରିଥିବାର ଦୃଶ୍ୟ ଦେଖିବାକୁ ମିଲିଥିଲା । ହେଲେ ଏହାକୁ ସସ୍ମିତାଙ୍କ ପରିବାର ଲୋକ ହତ୍ୟା ବୋଲି ଅଭିଯୋଗ କରି ନିକଟସ୍ଥ ଥାନାରେ ଅଭିଯୋଗ କରିଥିଲେ । କିନ୍ତୁ କୌଣସି ନ୍ୟାୟ ମିଳିଲା ନାହିଁ । ଏପଟେ ସସ୍ମିତାଙ୍କର ମୃତ୍ୟୁ ପରେ ସ୍ବାମୀ ପ୍ରଭାତ ଫେରାର ରହିଛନ୍ତି । ଏହି ଘଟଣାକୁ ନେଇ ପ୍ରଭାତଙ୍କ ପରିବାରଙ୍କୁ ଥାନା ଅଧିକାରୀ ପଚରାଉଚରା କରୁଥିବା ବେଳେ ପୋଲିସ ସେମାନଙ୍କୁ ଛାଡ଼ିଦେଇଛି।
ସେପଟେ ଘଟଣାରେ ପୋଲିସ ସସ୍ମିତାଙ୍କ ପରିବାର ଲୋକଙ୍କ କଥା କୌଣସି ମତରେ ଶୁଣୁନଥିବା ବେଳେ ଏବେ ନ୍ୟାୟ ପାଇଁ ମହିଳା କମିଶନଙ୍କ ନିକଟରେ ଗୁହାରି କରିଛନ୍ତି । ପ୍ରକାଶ ଥାଉ କି, ପ୍ରଭାତ ଓ ସସ୍ମିତାଙ୍କ ଏକ 8 ମାସର ଝିଅ ଅଛି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
