ଭୁବନେଶ୍ବର: ଆରମ୍ଭ ହୋଇଯାଇଛି ଧଉଳି କଳିଙ୍ଗ ମହୋତ୍ସବ । ଧଉଳିର ରାଜ୍ୟ ପର୍ଯ୍ୟଟନର ବିଶ୍ଵ ବ୍ୟାପି ପ୍ରଚାର, ପ୍ରସାର ଓ ବିକାଶ ସହ ବିଶ୍ଵ ପର୍ଯ୍ୟଟନ କ୍ଷେତ୍ର ଭାବେ ଉପସ୍ଥାପିତ କରିବା ଲକ୍ଷ୍ୟ ନେଇ ଏହି ମହୋତ୍ସବ ଆୟୋଜିତ ହୋଇଥାଏ । ବିଶେଷ କରି ସାଂସ୍କୃତିକ ପର୍ଯ୍ୟଟନସ୍ଥଳୀର ବିକାଶ, ଜାତୀୟ ଐତିହର ସୁରକ୍ଷା, ପର୍ଯ୍ୟଟନ କ୍ଷେତ୍ରର ପ୍ରସାର କରି ଦେଶବିଦେଶରୁ ବହୁ ସଂଖ୍ୟକ ପର୍ଯ୍ୟଟକଙ୍କୁ ଓଡ଼ିଶାମୁଖୀ କରିବା ସରକାରଙ୍କର ଲକ୍ଷ୍ୟ ।
ଏହି ଲକ୍ଷ୍ୟ ନେଇ ପ୍ରତିବର୍ଷ ଧଉଳି କଳିଙ୍ଗ ମହୋତ୍ସବ ବିଶ୍ଵ ପ୍ରସିଦ୍ଧ ଧଉଳି ପାହାଡର ପାଦ ଦେଶରେ ଅନୁଷ୍ଠିତ ହୋଇଆସୁଛି । ଏହାର ଆଜି(ବୁଧବାର) ଦ୍ୱିତୀୟ ସନ୍ଧ୍ୟା ଥିଲା । ତେବେ ମହାମାରୀ କୋରୋନା କଟକଣା ଯୋଗୁଁ ୨ ବର୍ଷ ବନ୍ଦ ହୋଇ ରହିଥିଲା ଏହି ମହୋତ୍ସବ । ତେବେ ମାର୍ଚ୍ଚ ୨୨ ତାରିଖରୁ ୨୪ ଯାଏଁ ଏହା ଚାଲିବ । ଏଠାରେ ଦେଶ ବିଦେଶରୁ ଖ୍ୟାତିସମ୍ପନ୍ନ କଳାକାରମାନେ ନୃତ୍ୟ ଓ ସଙ୍ଗୀତ ପରିବେଷଣ କରୁଛନ୍ତି ।
ଶାନ୍ତି ସ୍ତୂପକୁ ସାକ୍ଷୀ ରଖି ଶାନ୍ତି ଓ ମୈତ୍ରୀର ବାର୍ତ୍ତା ପ୍ରଦାନ କରିବା ସହ ପ୍ରତିଭାର ପଦର୍ଶନ କରିଛନ୍ତି କଳାକାର । ଧଉଳି- କଳିଙ୍ଗ ମହୋତ୍ସବରେ ନୃତ୍ୟ ଶିଳ୍ପୀମାନେ ଭାରତୀୟ ଶାସ୍ତ୍ରୀୟ ନୃତ୍ୟ, ସଙ୍ଗୀତ, ଲୋକ ନୃତ୍ୟ ଏବଂ ଦେଶ ବିଦେଶର ସମର କଳା ପ୍ରଦର୍ଶିତ କରିଛନ୍ତି । ଏହି ଉତ୍ସବର ଆଉ ଏକ ପ୍ରମୁଖ ଲକ୍ଷ୍ୟ ହେଲା ଦେଶର ଯୁବସମାଜ ବିଶେଷ କରି ଛାତ୍ରଛାତ୍ରୀଙ୍କୁ ଭାରତୀୟ ସଂସ୍କୃତିର ମହାନ ଗୌରବମୟୀ ଐତିହ ଓ ପରମ୍ପରା ବିଷୟରେ ନୃତ୍ୟ ଓ ସଙ୍ଗୀତ ମାଧ୍ୟମରେ ସଚେତନ କରିବା । ସାଂସ୍କୃତିକ ଓ ପରମ୍ପରାର ଧରୋବରାହ ବହନ କରିଥିବା ଏହି ମହୋତ୍ସବରେ ନୃତ୍ୟ ସଙ୍ଗୀତ ଉପସ୍ଥିତ ଦର୍ଶକଙ୍କୁ ବେଶ ବିମୋହିତ କରୁଛି ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
