ଭୁବନେଶ୍ବର: ବିଏମସି ପକ୍ଷରୁ ଏକ ନମ୍ବର ହାଟ ନିକଟରୁ ଶୁକ୍ରବାର ଜବର ଦଖଲ ଉଚ୍ଛେଦ କରାଯାଇଛି । ଯେଉଁଥିରେ 15ଟି ରୁ ଉର୍ଦ୍ଧ୍ବ ଫଳ ବିକ୍ରି କରୁଥିବା ଠେଲା ଗାଡି ଓ ଗୋଟିଏ କ୍ୟାବିନ ଉଚ୍ଛେଦ କରାଯାଇଛି । ସେହିପରି ରାଜମହଲ ଛକ ଠାରୁ ଏଜି ଛକ ରାସ୍ତାକୁ ଅକ୍ତିଆର କରି ଫଳ ଓ ଶୀତ ବସ୍ତ୍ର ବିକ୍ରି କରୁଥିବା ଦୋକାନକୁ ଉଚ୍ଛେଦ କରାଯାଇଛି । ବିଏମସି କମିଶନର ପ୍ରେମ ଚନ୍ଦ୍ର ଚୌଧୁରୀ ଓ ଅନ୍ୟାନ୍ୟ ଜବରଦଖଲକାରୀ ଉଚ୍ଛେଦ ଟିମ ସଦସ୍ୟଙ୍କ ଉପସ୍ଥିତରେ ହୋଇଛି ଉଚ୍ଛେଦ କାର୍ଯ୍ୟ ।
ବାରମ୍ବାର ସରକାରଙ୍କ ନିଷ୍ପତ୍ତିକୁ ବେଖାତିର କରି ଏହି ଦୋକାନୀ ମାନେ ନିଜର ବେପାର କରୁଥିଲେ । କିନ୍ତୁ ଏଥିରେ ସେମାନେ କୌଣସି ପରିବର୍ତ୍ତନ ନ ଆଣିବାରୁ ବାଧ୍ୟ ହୋଇ ଏପରି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ବିଏମସି ପକ୍ଷରୁ ସୂଚନା ଦିଆଯାଇଛି । କାରଣ ସହର ସମସ୍ତଙ୍କ ପାଇଁ ହୋଇଥିଲାବେଳେ ହାତଗଣତି କେତେକ ଲୋକ ଏହାକୁ ଉଲ୍ଲଙ୍ଘନ କରି ଲୋକମାନଙ୍କ ପାଇଁ ଅସୁବିଧା ସୃଷ୍ଟି କରିଥିବା କୁହାଯାଇଛି ।
ତେଣୁ ଆଜି ଅପରାହ୍ନ ସାଢେ 3ଟାରୁ ଆରମ୍ଭ ହୋଇଥିବା ଏହି ଅଭିଯାନ 5ଟା ପର୍ଯ୍ୟନ୍ତ ଚାଲିଥିବାବେଳେ ସେମାନଙ୍କ ସମସ୍ତ ସାମଗ୍ରୀ ସହିତ ଦୋକାନକୁ ବୁଲଡୋଜର ଲଗାଇ ଭଙ୍ଗାଯାଇଥିଲା । ଏହା ସହିତ ଉଚ୍ଛେଦ ସାମଗ୍ରୀକୁ ଗାଡ଼ିରେ ବିଏମସିକୁ ନିଆଯାଇଥିବା ଦେଖିବାକୁ ମିଳିଛି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
