ଭୁବନେଶ୍ବର: ପରୀକ୍ଷାର୍ଥୀଙ୍କ ଆଶଙ୍କା ଦୂର କରିବା ପାଇଁ ପୂର୍ବତଟ ରେଳପଥ ପକ୍ଷରୁ ଜନସମ୍ପର୍କ ଶିବିର ଆୟୋଜିତ ହୋଇଛି । ରେଲୱେର ଅଣ-ବୈଷୟିକ ବର୍ଗଗୁଡିକ ନିମନ୍ତେ କମ୍ପୁଟର ବେସ ପରୀକ୍ଷା - ୦୧ ଫଳାଫଳ ସମ୍ବନ୍ଧରେ ପରୀକ୍ଷାର୍ଥୀଙ୍କ ଆଶଙ୍କା ଦୂର କରିବାପାଇଁ ପୂର୍ବତଟ ରେଳପଥ ପକ୍ଷରୁ ଏହି ଜନସମ୍ପର୍କ ଶିବିର ଆୟୋଜନ କରାଯାଇଛି । ପରୀକ୍ଷାର୍ଥୀମାନେ16 ଫେବୃଆରୀ 2022 ପର୍ଯ୍ୟନ୍ତ କମିଟିରେ ସେମାନଙ୍କର ଅଭିଯୋଗ ଦାଖଲ କରିପାରିବେ । ସ୍ବଚ୍ଛ ଓ ନିର୍ମଳ ପରୀକ୍ଷା ସହ ଆଇନ ଶୃଙ୍ଖଳା ପରିସ୍ଥିତି ସୃଷ୍ଟି ନକରିବାକୁ ସମସ୍ତ ପ୍ରାର୍ଥୀଙ୍କୁ ନିବେଦନ କରିଛି ରେଳପଥ ।
ରେଲୱେରେ ଭର୍ତ୍ତି ବୋର୍ଡ (ଆରଆରବି) ଦ୍ବାରା ଜାରି ହୋଇଥିବା ଅଣ ବୈଷୟିକ ଲୋକପ୍ରିୟ ବର୍ଗ (NTPC)ର କେନ୍ଦ୍ରୀୟ ନିଯୁକ୍ତି ବିଜ୍ଞପ୍ତି CEN 01/2019 ସମ୍ବନ୍ଧରେ ଜାତୀୟ ଗଣମାଧ୍ୟମ ମାନଙ୍କରେ ଆଲୋଚନାରେ ଭାଗନେଇ କେନ୍ଦ୍ର ରେଳମନ୍ତ୍ରୀ ଅଶ୍ବିନୀ ବୈଷ୍ଣବ ରେଳବାଇରେ ନିଯୁକ୍ତି ପାଇଁ ଆଶାୟୀ ପରୀକ୍ଷାର୍ଥୀମାନଙ୍କୁ ବେଆଇନ କାର୍ଯ୍ୟ ନକରିବାକୁ ନିବେଦନ କରିଛନ୍ତି | ଆଲୋଚନା ସମୟରେ ବୈଷ୍ଣବ କହିଛନ୍ତି ଯେ, RRB ପରୀକ୍ଷାଗୁଡ଼ିକ ସର୍ବୋଚ୍ଚ ଅଖଣ୍ଡତାର ମାନ ବଜାୟ ରଖିବା ସହ ସ୍ବଚ୍ଛ ଓ ନିର୍ମଳ ଭାବରେ ପରିଚାଳିତ ହୋଇଥାଏ ।
ଏହା ଲକ୍ଷ୍ୟ କରାଯାଇଛି ଯେ ରେଳବାଇରେ ନିଯୁକ୍ତି ପାଇଁ ଆଶାୟୀ ପରୀକ୍ଷାର୍ଥୀମାନେ କେତେକ ସ୍ଥାନରେ ଭଙ୍ଗାରୁଜା ଓ ବେଆଇନ କାର୍ଯ୍ୟରେ ଲିପ୍ତ ରହିଛନ୍ତି ଯେପରିକି ରେଳ ଟ୍ରାକରେ ବିରୋଧ କରିବା, ଟ୍ରେନ୍ ଚଳାଚଳ ବ୍ୟାହତ କରିବା, ରେଳବାଇର ସମ୍ପତ୍ତି ନଷ୍ଟ କରିବା ଦେଖିବାକୁ ମିଳିଛି । ରେଳବାଇରେ ନିଯୁକ୍ତି ପାଇଁ ଆଶାୟୀ ପରୀକ୍ଷାର୍ଥୀମାନେ ଭୁଲ୍ ମାର୍ଗରେ ନ ଯିବାକୁ କିମ୍ବା ଭ୍ରମ ସୃଷ୍ଟି କରୁଥିବା କିଛି ନ୍ୟସ୍ତ ସ୍ବାର୍ଥ ଗୁଡିକର ପ୍ରଭାବରେ ନଆସିବାକୁ ରେଳ ମନ୍ତ୍ରୀ ପରାମର୍ଶ ଦେଇଛନ୍ତି।
ରେଳବାଇରେ ନିଯୁକ୍ତି ପାଇଁ ଆଶାୟୀ ପରୀକ୍ଷାର୍ଥୀ ମାନଙ୍କ ଆଶଙ୍କାକୁ ବିଚାରକୁ ନେଇ ରେଳମନ୍ତ୍ରୀ ରେଲୱେ ବୋର୍ଡ ଏବଂ ଜୋନାଲ ରେଳବାଇର ସର୍ବୋଚ୍ଚ କର୍ତ୍ତୃପକ୍ଷଙ୍କୁ ଉଚ୍ଚ ସ୍ତରୀୟ କମିଟି ଗଠନ କରିବାକୁ ପରାମର୍ଶ ଦେଇଛନ୍ତି ଯାହା ଦ୍ବାରା 14 ଏବଂ 15 ଜାନୁଆରୀ, 2022 ରେ ପ୍ରକାଶିତ ପ୍ରଥମ ପର୍ଯ୍ୟାୟ କମ୍ପ୍ୟୁଟର ଆଧାରିତ ପରୀକ୍ଷା (ସିବିଟି) -1 ଫଳାଫଳକୁ ନେଇ ଆଶାୟୀ ପରୀକ୍ଷାର୍ଥୀ ମାନେ ଉଠାଇଥିବା ଚିନ୍ତା ଏବଂ ସନ୍ଦେହ ଉପରେ ଦୃଷ୍ଟି ରଖାଯାଇପାରିବ। ଉପରୋକ୍ତ ବିଷୟଗୁଡିକ ଆଧାରରେ ପୂର୍ବ ତଟ ରେଳପଥ ଏକ ଜନସମ୍ପର୍କ ଶିବିର ଗଠନ କରିଛି ଯାହା ରେଳବାଇ ଭର୍ତ୍ତି ବୋର୍ଡ ଗୁଡିକର ଅଣ ବୈଷୟିକ ଲୋକପ୍ରିୟ ବର୍ଗ (NTPC) ର କେନ୍ଦ୍ରୀୟ ନିଯୁକ୍ତି ବିଜ୍ଞପ୍ତି CEN 01/2019 ର ପ୍ରଥମ ପର୍ଯ୍ୟାୟ CBTର ଫଳାଫଳକୁ ନେଇ ପ୍ରାର୍ଥୀମାନଙ୍କ ଦ୍ବାରା ଉଠାଯାଇଥିବା ଚିନ୍ତା ଏବଂ ସନ୍ଦେହକୁ ପରଖିବା ପାଇଁ ଉଚ୍ଚ ସ୍ତରୀୟ କମିଟି ଦ୍ବାରା ଅସୁବିଧା ଦୂର କରାଯାଇ ପାରିବ ।
ଏହି ଉଚ୍ଚ ସ୍ତରୀୟ କମିଟି ମାଧ୍ୟମରେ ପରୀକ୍ଷାର୍ଥୀ ମାନଙ୍କ ଦ୍ବାରା ଦର୍ଶାଯାଇଥିବା ନିମ୍ନଲିଖିତ ପ୍ରସଙ୍ଗକୁ ଗ୍ରହଣ ଏବଂ ସୁପାରିଶ କରାଯିବ ।
1. CEN 01/2019 (NTPC)ର ପ୍ରଥମ ପର୍ଯ୍ୟାୟ CBT ର ଫଳାଫଳ ଏବଂ ବିଦ୍ୟମାନ ସଂକ୍ଷିପ୍ତ ତାଲିକା ହୋଇଥିବା ପ୍ରାର୍ଥୀଙ୍କୁ ପ୍ରଭାବିତ ନକରି ଦ୍ବିତୀୟ ପର୍ଯ୍ୟାୟ CBT ପାଇଁ ପ୍ରାର୍ଥୀମାନଙ୍କୁ ସଂକ୍ଷିପ୍ତ ତାଲିକା କରିବା ପାଇଁ ବ୍ୟବହୃତ ପଦ୍ଧତି |
2. CEN RRC 01/2019 ରେ ଦ୍ବିତୀୟ ପର୍ଯ୍ୟାୟ CBT ର ପ୍ରଚଳନ।
3. ପ୍ରାର୍ଥୀମାନେ ସେମାନଙ୍କର ଚିନ୍ତାଧାରା ଏବଂ ପରାମର୍ଶକୁ ଇମେଲ rrbcommite@railnet.gov.in ଠିକଣାରେ କମିଟିରେ ଦାଖଲ କରିପାରିବେ ।
4. ରେଳବାଇରେ ନିଯୁକ୍ତି ଆଶାୟୀ ପରୀକ୍ଷାର୍ଥୀ ମାନଙ୍କ ଅଭିଯୋଗ ଏବଂ ପରାମର୍ଶ ଗୁଡିକୁ ଯତ୍ନର ସହ ଶୁଣାଣି କରିବା ପାଇଁ ପୂର୍ବ ତଟ ରେଳପଥ ପକ୍ଷରୁ ଜନସମ୍ପର୍କ ଶିବିର ଆୟୋଜନ କରିବାକୁ ନିଷ୍ପତ୍ତି ନେଇଛି |
5.ପ୍ରତ୍ୟେକ ରେଳମଣ୍ଡଳରେ ଏବଂ ଭୁବନେଶ୍ବର ଠାରେ ଏହି ଜନସମ୍ପର୍କ ଶିବିର ଖୋଲାଯାଇଛି ଯେଉଁଠାରେ ଆଶାୟୀ ପ୍ରାର୍ଥୀମାନେ ଆସି ସେମାନଙ୍କ ଅଭିଯୋଗ ପଞ୍ଜିକରଣ କରିପାରିବେ । ଅଭିଯୋଗର ସମାଧାନ ପାଇଁ ସର୍ବୋଚ୍ଚ ସ୍ତରରେ ବିଚାର କରାଯିବ।
6. ରେଳବାଇ ଭର୍ତ୍ତି ବୋର୍ଡ ଗୁଡିକର ସମସ୍ତ ଅଧ୍ୟକ୍ଷ ମାନଙ୍କୁ ମଧ୍ୟ ସେମାନଙ୍କ ଦ୍ବାରା ପ୍ରାର୍ଥୀଙ୍କ ଅଭିଯୋଗ ଗ୍ରହଣ କରିବା ଏବଂ ଅଭିଯୋଗ ଗୁଡିକ ସଂକଳନ କରିବାକୁ ଓ ଏହାକୁ କମିଟିକୁ ପଠାଇବାକୁ ନିର୍ଦ୍ଦେଶ ଦିଆଯାଇଛି।
7. ପ୍ରାର୍ଥୀମାନଙ୍କୁ ସେମାନଙ୍କର ଚିନ୍ତାଧାରା ଦାଖଲ କରିବାକୁ 16.02.2022 ପର୍ଯ୍ୟନ୍ତ ତିନି ସପ୍ତାହ ସମୟ ଦିଆଯାଇଅଛି ଏବଂ ଅଭିଯୋଗ ଗୁଡିକର ଯାଞ୍ଚ କରିବା ପରେ କମିଟି 04.03.2022 ସୁଦ୍ଧା ସେମାନଙ୍କ ସୁପାରିଶ ଦାଖଲ କରିବେ ।
8.15 ଫେବୃଆରୀ 2022 ଠାରୁ ପ୍ରାରମ୍ଭ କରାଯିବାକୁଥିବା CEN 01/2019 (NTPC) ର ଦ୍ବିତୀୟ ପର୍ଯ୍ୟାୟ କମ୍ପୁଟର ବେସ ପରୀକ୍ଷା ଏବଂ 23 ଫେବୃଆରୀ 2022 ଠାରୁ ଆରମ୍ଭ ହେବାକୁ CEN RRC 01/2019 ର ପ୍ରଥମ ପର୍ଯ୍ୟାୟ କମ୍ପୁଟର ବେସ ପରୀକ୍ଷାକୁ ସ୍ଥଗିତ ରଖାଯାଇଛି ।
ଭୁବନେଶ୍ବରରୁ ବିକାଶ କୁମାର ଦାସ,ଇଟିଭି ଭାରତ
