ଭୁବନେଶ୍ବର: ରାଜଧାନୀରେ ପୁଣି ଏନକାଉଣ୍ଟର । ଗତକାଲି ଟଙ୍କପାଣି ରୋଡରେ ଏନକାଉଣ୍ଟର ପରେ ଆଜି ବଡଗଡ ଥାନା ଚିଲି ପୋଖରୀ ନିକଟରେ 2 ଦୁର୍ଦ୍ଦାନ୍ତ ଅପରାଧୀଙ୍କୁ ଏନକାଉଣ୍ଟର କରିଛି କମିଶନରେଟ ପୋଲିସ । ଏଥିରେ ସିପୁନ କୁମାର କବି ଓରଫ ଚିନୁ ଏବଂ ହରିଆ ସ୍ବାଇଁ ଓରଫ ହରି ଗୁରୁତର ଆହତ ହୋଇଛନ୍ତି । ଉଭୟଙ୍କ ଗୋଡରେ ବାଜିଛି ଗୁଳି । ରବିବାର ଭୋର ସମୟରେ ଏହି ଏନକାଉଣ୍ଟର ହୋଇଛି ।
ତେବେ ପୋଲିସ ସେମାନଙ୍କ ନିକଟରୁ ଗୋଟିଏ ମାଉଜର ଓ ଜୀବନ୍ତ ଗୁଳି ଓ ଆଉ ଗୋଟିଏ ନକଲି ବନ୍ଧୁକ ସହ ୫୦ ହଜାର ଟଙ୍କା ଓ ବାଇକ ଜବତ କରିଛି । ଉଭୟେ ଅରୁଣ ଓ ବିବେକାନନ୍ଦ ଗ୍ୟାଙ୍ଗର ବୋଲି ଜଣା ପଡିଛି । ଉଭୟଙ୍କ ନାମରେ ମଞ୍ଚେଶ୍ବର ଥାନା ସମେତ ବିଭିନ୍ନ ଥାନାରେ ଛିନତାଇ, ଡକାୟତି, ଲୁଟ ଓ ରାହାଜାନି ଭଳି ସଙ୍ଗୀନ ମାମଲା ରହିଛି ।
ସୂଚନା ଅନୁଯାୟୀ, ଏମାନେ ବିଳମ୍ବିତ ରାତିରେ ଧଉଳିରୁ ଭୁବନେଶ୍ବର ଆସୁଥିବା ଖବର ପାଇଥିଲା ପୋଲିସ । ଏହାପରେ ଉଭୟଙ୍କୁ କାବୁ କରିବାକୁ ପୋଲିସ ଉଦ୍ୟମ କରିଥିଲା । ଦୁଇ ଅପରାଧି ପୋଲିସ ଉପରକୁ ଗୋଟିଏ ରାଉଣ୍ଡ ଗୁଳି ଚଳାଇଥିଲେ । ପାଲଟା ଜବାବରେ ପୋଲିସ ମଧ୍ୟ ଗୁଳିମାଡ କରିଥିଲା । ଫଳରେ ପୋଲିସ ଗୁଳିରେ ଉଭୟେ ଗୁରୁତର ହୋଇଛନ୍ତି । ଉଭୟଙ୍କୁ ପ୍ରଥମେ କ୍ୟାପିଟାଲ ମେଡିକାଲ ପରେ କଟକ ବଡ ମେଡିକାଲକୁ ସ୍ଥାନାନ୍ତର କରିଛି ପୋଲିସ ।
ଅନ୍ୟପଟେ 24 ଘଣ୍ଟା ମଧ୍ୟରେ 4ଟି ଏନକାଉଣ୍ଟର କରିଛି କମିଶନରେଟ ପୋଲିସ । ଏହାକୁ ନେଇ ସ୍ଥାନୀୟ ଅଞ୍ଚଳରେ କୋକୁଆ ଭୟ ସୃଷ୍ଟି ହୋଇଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
