ସ୍କୁଲରେ ଛାତ୍ର ବନ୍ଦୀ ମାମଲା, ତଦନ୍ତ ରିପୋର୍ଟ ଦେଉନାହାନ୍ତି ଜିଲ୍ଲା ଶିକ୍ଷା ଅଧିକାରୀ

ଘାଟିକିଆ ଏପିଜେ ସ୍କୁଲରେ ଛାତ୍ରଛାତ୍ରୀ ବନ୍ଦୀ ମାମଲା । ଜିଲ୍ଲା ଶିକ୍ଷା ଅଧିକାରୀ ତଦନ୍ତ ରିପୋର୍ଟ ଦେଉନଥିବାରୁ ଚିଠି ଲେଖିଲା ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟ । ଅଧିକ ପଢନ୍ତୁ

ଭୁବନେଶ୍ବର: ସ୍କୁଲ ଫି' ନେଇ ଭୁବନେଶ୍ବର ଘାଟିକିଆ ଏପିଜେ ସ୍କୁଲରେ ଛାତ୍ରଛାତ୍ରୀ ବନ୍ଦୀ ପ୍ରସଙ୍ଗ(Students Locked Up Over Fee Payment) । ଏ ଯାଏଁ ତଦନ୍ତ ରିପୋର୍ଟ ଦେଉନାହାନ୍ତି ଖୋର୍ଦ୍ଧା ଜିଲ୍ଲା ଶିକ୍ଷା ଅଧିକାରୀ । ଏନେଇ ଡିଇଓଙ୍କୁ ଚିଠି ଲେଖିଛି ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟ(Directorate of Secondary Education) । ତୁରନ୍ତ ରିପୋର୍ଟ ଦାଖଲ କରିବାକୁ ଚିଠିରେ ଉଲ୍ଲେଖ ରହିଛି । ଏପିଜେ ସ୍କୁଲର ସିସିଟିଭିର ଦୃଶ୍ୟ, ପେନଡ୍ରାଇଭ୍ ଏବଂ ଫୁଟେଜ୍ ଯାଞ୍ଚ କରିବା ସହ ପରବର୍ତ୍ତୀ ପାଠ୍ୟକ୍ରମ ଗ୍ରହଣ କରିବା ପାଇଁ ଚିଠିରେ ନିର୍ଦ୍ଦେଶ ରହିଥିବା ସୂଚନା ମିଳିଛି ।

ସ୍କୁଲରେ ଛାତ୍ର ବନ୍ଦୀ ମାମଲା, ତଦନ୍ତ ରିପୋର୍ଟ ଦେଉନାହାନ୍ତି ଜିଲ୍ଲା ଶିକ୍ଷା ଅଧିକାରୀ

ସୂଚନା ଅନୁଯାୟୀ, ସ୍କୁଲ ଫି ପ୍ରଦାନ ନ କରିବା କାରଣରୁ ଭୁବନେଶ୍ବର ସ୍ଥିତ ଘାଟିକିଆ ଅଞ୍ଚଳରେ ଥିବା ଏପିଜେ ଇଂରାଜୀ ମିଡିୟମ ବିଦ୍ୟାଳୟର କର୍ତ୍ତୃପକ୍ଷ ୩୦ ଜଣ ପିଲାଙ୍କୁ କ୍ଲାସରୁମରେ ବନ୍ଦ କରିଥିଲେ । ପ୍ରାୟ 5 ଘଣ୍ଟା ଧରି ପିଲାଙ୍କୁ ବନ୍ଦୀ ଭାବେ ରଖାଯାଇଥିଲା(Students Locked Up In Classroom) । ଘରୋଇ ସ୍କୁଲର ଏପରି କାର୍ଯ୍ୟକୁ ନେଇ ଅଭିଭାବକମାନଙ୍କ ମଧ୍ୟରେ ଅସନ୍ତୋଷ ଦେଖାଯାଇଥିଲା । ସେମାନେ ଏହାକୁ ନିନ୍ଦା କରି ସ୍କୁଲ ଗେଟ ସମ୍ମୁଖରେ ଧାରଣାରେ ବସିଥିଲେ । ଏହାସହିତ ଅଭିଭାବକମାନେ ଥାନାରେ ଏତଲା ଦେଇ ସ୍କୁଲ କର୍ତ୍ତୃପକ୍ଷଙ୍କ ବିରୁଦ୍ଧରେ କଡା କାର୍ଯ୍ୟାନୁଷ୍ଠାନ ଦାବି କରିଥିଲେ ।

ଏପରିକି ପିଲାଙ୍କ ପ୍ରତି ସ୍କୁଲ କର୍ତ୍ତୃପକ୍ଷଙ୍କ ଏହି ଆଚରଣ ଶିଶୁ ସୁରକ୍ଷା ଅଧିକାର ଉଲ୍ଲଙ୍ଘନ କରିଥିବା ଅଭିଯୋଗରେ ସର୍ବଭାରତୀୟ ଅଭିଭାବକ ସଂଘ ରାଜ୍ୟ ଶିଶୁ ଅଧିକାର ସୁରକ୍ଷା ଆୟୋଗ ନିକଟରେ ପହଞ୍ଚିଥିଲେ । ଅଭିଭାବକ ସଙ୍ଘ ପକ୍ଷରୁ ରାଜ୍ୟ ସଭାପତି ପ୍ରଦୀପ୍ତ ନାୟକ ଶିଶୁ ସୁରକ୍ଷା ଆୟୋଗ ଅଧ୍ୟକ୍ଷାଙ୍କୁ ଭେଟି ଅଭିଯୋଗ କରିଥିଲେ । ଏହି ଘଟଣାରେ ତଦନ୍ତ କରାଯାଇ ଦୃଢ କାର୍ଯ୍ୟାନୁଷ୍ଠାନ ସୂରୁପ ସ୍କୁଲର ଅନୁବନ୍ଧନକୁ ବରଖାସ୍ତ କରିବାକୁ ସେମାନେ ଦାବି କରିଥିଲେ । ହେଲେ ଏହି ମାମଲାକୁ ଦୀର୍ଘ ଦିନ ବିତିଥିଲେ ସୁଦ୍ଧା ଏ ଯାଏଁ କୌଣସି ପ୍ରକାର କାର୍ଯ୍ୟାନୁଷ୍ଠାନ ନିଆଯାଇ ନାହିଁ । ଜିଲ୍ଲା ଶିକ୍ଷା ଅଧିକାରୀ ତଦନ୍ତ ରିପୋର୍ଟ ଦେଉନଥିବାରୁ ଶେଷରେ ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟ ପକ୍ଷରୁ ତାଙ୍କୁ ଚିଠି ପଠାଯାଇଛି ।