ଭୁବନେଶ୍ବର: କେନ୍ଦ୍ର ସଂସ୍କୃତି ମନ୍ତ୍ରାଳୟ ପକ୍ଷରୁ ଭାରତର ଜାତୀୟ 'ଇନଟାଞ୍ଜିବଲ୍ କଲଚରାଲ ହେରିଟେଜ' ବା 'ଅପରିଚିତ ସାଂସ୍କୃତିକ ଐତିହ୍ୟ'ରେ ଓଡିଶାର ୩ଟି ସାସ୍କୃତିକ ପରମ୍ପରା ସାମିଲ ହୋଇଥିଲା । ମାର୍ଗଶୀର ମାସର ମାଣବସା ଗୁରୁବାର ବା ଲକ୍ଷ୍ମୀ ପୂଜା, ଛଉ ନୃତ୍ୟ ଏବଂ ୩ୟ ଟି ରାବଣଛାୟା। ଏନେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଟ୍ବିଟ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ କେନ୍ଦ୍ର ସଂସ୍କୃତି ମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ।
କେନ୍ଦମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଟ୍ବିଟ କରି କହିଛନ୍ତି ଯେ, 'ଭାରତ ସରକାରଙ୍କ ଏହି ନିର୍ଣ୍ଣୟ ଓଡିଶାର ଅନନ୍ୟ, ଐତିହ ଓ ସାଂସ୍କୃତିକ ଚିହ୍ନକୁ ବିଶ୍ବ ଦରବାରରେ ଉପସ୍ଥାପିତ କରିବ । ଏହି ଐତିହାସିକ ନିର୍ଣ୍ଣୟ ପାଇଁ ପ୍ରଧାନମନ୍ତ୍ରୀ ଓ କେନ୍ଦ୍ର ସଂସ୍କୃତି ମନ୍ତ୍ରୀଙ୍କୁ ଧନ୍ୟବାଦ' ।
ତେବେ ଏଠାରେ ସୂଚନା ଥାଉ ଯେ, ତାଲିକାରେ ମାଣବସା ଗୁରୁବାର ପ୍ରଥା, ଛଉ ନୃତ୍ୟ ଏବଂ ରାବଣଛାୟା ବାବଦରେ ବିସ୍ତୃତ ବର୍ଣ୍ଣନା କରାଯାଇଛି । ଏତଦ୍ ବ୍ୟତୀତ ଛଉ ଏବଂ ରାବଣଛାୟାର ଭିଡିଓର ଲିଙ୍କ ମଧ୍ୟ ସଂସ୍କୃତି ମନ୍ତ୍ରଣାଳୟ ତରଫରୁ ପ୍ରସ୍ତୁତ କରାଯାଇଛି ।
ଭାରତରେ ଅନନ୍ୟ ଅପରିଚିତ ସାଂସ୍କୃତିକ ଏତିହ୍ୟ (ICH) ପରମ୍ପରାର ଭଣ୍ଡାର ରହିଛି । ଏହି ତାଲିକାରେ ଥିବା 13 ଟି ପରମ୍ପରା ୟୁନେସ୍କୋ ଦ୍ୱାରା ମାନବିକତାର ଅଜ୍ଞାତ ସାଂସ୍କୃତିକ ଏତିହ୍ୟ ଭାବରେ ମାନ୍ୟତା ପାଇଛି ବୋଲି କେନ୍ଦ୍ର ସଂସ୍କୃତି ମନ୍ତ୍ରୀ ପ୍ରହ୍ଲାଦ ସିଂ ପଟେଲ କହିଛନ୍ତି । ଭାରତୀୟ ସଂସ୍କୃତିର ବିବିଧତାକୁ ଚିହ୍ନିବା ପାଇଁ ଏହା ଏକ ପ୍ରୟାସ ବୋଲି ସେ କହିଛନ୍ତି । ଜାତୀୟ ତଥା ଆନ୍ତର୍ଜାତୀୟ ସ୍ତରରେ ଭାରତର ବିଭିନ୍ନ ରାଜ୍ୟରୁ ଆସିଥିବା ଏହି ସାଂସ୍କୃତିକ ଏତିହ୍ୟ ବିଷୟରେ ସଚେତନତା ସୃଷ୍ଟି କରିବା ଏବଂ ଏହାର ସୁରକ୍ଷା ସୁନିଶ୍ଚିତ କରିବା ଏହାର ଲକ୍ଷ ।
ବ୍ୟୁରୋ ରିପୋର୍ଟ, ଇଟିଭି ଭାରତ
