ଭୁବନେଶ୍ବର: ଧାମନଗର ଉପନିର୍ବାଚନକୁ ନେଇ ବିଜେଡି ବିରୋଧରେ ସିଇଓଙ୍କ ନିକଟରେ ଫେରାଦ ହେଲା ବିଜେପି । ବରିଷ୍ଠ ନାଗରିକ ଓ ଦିବ୍ୟାଙ୍ଗଙ୍କ ବାଲାଟ ପେପର ଭୋଟ ସଂଗ୍ରହ ପାଇଁ ଧାମନଗର ନିର୍ବାଚନ ମଣ୍ଡଳୀ ବାହାରୁ ମିଶନ ଶକ୍ତି ମହିଳା ନିଯୁକ୍ତି କରିବାକୁ ଦାବିରେ ସିଇଓଙ୍କ ନିକଟରେ ଫେରାଦ ହୋଇଛି ଦଳ । ବିଜେପି ଦାବି କରିଛି ବରିଷ୍ଠ ନାଗରିକ ଓ ଦିବ୍ୟାଙ୍ଗଙ୍କ ବାଲାଟ ପେପର ଭୋଟ ସଂଗ୍ରହ ପାଇଁ ନିଯୁକ୍ତ ହୋଇଥିବା ମିଶନ ଶକ୍ତି ମହିଳା ମାନେ ଧାମନଗର ନିର୍ବାଚନ ମଣ୍ଡଳୀର । ରାଜ୍ୟ ସରକାର ଜାଣିଶୁଣି ଚଞ୍ଚକତା କରିବା ପାଇଁ ଏମିତି କରିଛନ୍ତି। ତେଣୁ ମୁକ୍ତ ଓ ଅବାଧ ନିର୍ବାଚନ ପରିଚାଳନା ପାଇଁ ଅନ୍ୟ ନିର୍ବାଚନ ମଣ୍ଡଳୀର ଅଙ୍ଗନୱାଡ଼ି କର୍ମୀ କିମ୍ବା ମିଶନ ଶକ୍ତି ମହିଳାଙ୍କୁ ନିଯୁକ୍ତି ପାଇଁ ବିଜେପିର ଏକ ପ୍ରତିନିଧି ଦଳ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟି ଦାବି କରିଛି ।
ଏହା ସହ ଧାମନଗର ଦୁଇ ବିଡ଼ିଓଙ୍କୁ ବଦଳି ନେଇ ମୁଖ୍ୟ ନିର୍ବାଚନ ଅଧିକାରୀଙ୍କ ବିରୋଧରେ ମଧ୍ୟ ବର୍ଷିଲେ ବିଜେପି ପ୍ରତିନିଧି ଦଳ। ନିର୍ବାଚନ ନିୟମ ଅନୁସାରେ ଯଦି 3 ବର୍ଷରୁ ଅଧିକ ରହିବାଥିବା ଅଧିକାରୀଙ୍କ ବଦଳି ହେବ, ତାହେଲେ କିଷାନନଗର ବିଡିଓ, କନ୍ଧମାଳ ଜିଲ୍ଳାପାଳ ଡ଼ି ବୃନ୍ଦା 7 ବର୍ଷ ରହିବା ପରେ ବି କାହିଁକି ବଦଳି ହୋଇନଥିଲା ବୋଲି ପ୍ରଶ୍ନ କରିଛି ଦଳ ।
ଇଟିଭି ଭାରତ, ଭୁବନେଶ୍ବର
