ଭୁବନେଶ୍ବର: ପୁଣି ଥରେ ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କୁ ଦେଶର ସର୍ବୋଚ୍ଚ ସମ୍ମାନ ଭାରତ ରତ୍ନ ଦେବାକୁ ଦାବି ଉଠିଛି । ଏକ ଗୀତ ମାଧ୍ୟମରେ ଏହି ଦାବି କରାଯାଇଛି । ଆମ ବିଜୁକୁ ଭାରତ ରତ୍ନ ମିଳୁ ଶୀର୍ଷକରେ ଏହି ଗୀତଟି ଲେଖିଛନ୍ତି ତପୁ ନାୟକ । ସଙ୍ଗୀତ ନିର୍ଦ୍ଦେଶନା ଦେଇଛନ୍ତି ଜାପାନୀ ।
ଆଜି(ମଙ୍ଗଳବାର) ଏହି ଗୀତ ରିଲିଜ ହୋଇଛି । ଏଥିପାଇଁ ଏକ ସ୍ଵତନ୍ତ୍ର କାର୍ଯ୍ୟକ୍ରମର ଆୟୋଜନ କରାଯାଇଥିଲା । ଏହି କାର୍ଯ୍ୟକ୍ରମରେ ଭୁବନେଶ୍ୱର ଉତ୍ତର ବିଧାୟକ ସୁଶାନ୍ତ ରାଉତ, ବରିଷ୍ଠ ସାମ୍ବାଦିକ ଶିଶିର ଭଟ୍ଟ ମିଶ୍ର, ବିଜୁ ଯୁବ ମୋର୍ଚ୍ଚାର ରାଜ୍ୟ ସାଧାରଣ ସମ୍ପାଦକ ତାରିଣୀ ପ୍ରସାଦ ନାୟକ ପ୍ରମୁଖ ଯୋଗଦେଇଥିଲେ । ବିଜୁବାବୁଙ୍କ ପାଇଁ ରଚିତ ହୋଇଥିବା ଗୀତଟି ଲୋକଙ୍କୁ ପସନ୍ଦ ଆସିବ ବୋଲି ଆଶା ବାନ୍ଧିଛନ୍ତି ସଙ୍ଗୀତ ନିର୍ଦ୍ଦେଶକ ଜାପାନୀ ଭାଇ ।
ଏହି ଗୀତଟି ବିଜୁ ପଟ୍ଟନାୟକଙ୍କୁ ଭାରତ ରତ୍ନ ମିଳିବା ଦାବିକୁ ବଳ ଯୋଗାଇବ ବୋଲି କୁହାଯାଉଛି । ଏହାପୂର୍ବରୁ ମଧ୍ୟ ଭିନ୍ନଭିନ୍ନ ଢଙ୍ଗରେ କେନ୍ଦ୍ର ସରକାରଙ୍କ ନିକଟରେ ଭୁମିପୁତ୍ର ବିଜୁ ପଟ୍ଟନାୟକଙ୍କୁ ଭାରତ ରତ୍ନ ଦେବାକୁ ଦାବି ଉପସ୍ଥାପନ କରାଯାଇଛି । ହେଲେ ଏଯାଏଁ କେନ୍ଦ୍ର ସରକାର ଏହାକୁ ନେଇ ଧ୍ୟାନ ଦେଇନାହାନ୍ତି ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
