ଭୁବନେଶ୍ବର: ତିନି ମାସର ମାନସିକ ତଥା ଆର୍ଥିକ ନିର୍ଯାତନା ସହିଥିଲେ । ପରେ ଗତ ମାର୍ଚ୍ଚ 3ରେ କାର୍ଯ୍ୟରେ ଯୋଗ ଦେଇଥିଲେ ସଂଯୁକ୍ତା ଦିଗାଲ । ଆଜି ସେ ମାଓବାଦୀଙ୍କ ଗୁଳିରେ ମୃତ୍ୟୁବରଣ କରିଛନ୍ତି । ତାଙ୍କୁ ସହାୟତା ଦେବା ନେଇ କଣ ରହିଛି ବ୍ୟବସ୍ଥା ଆସନ୍ତୁ ଜାଣିବା ।
ନିର୍ବାଚନ କମିଶନଙ୍କ ସଂଶୋଧିତ ସହାୟତା ରାଶି ଅନୁସାରେ ଯଦି ନିର୍ବାଚନ କାର୍ଯ୍ୟ ସମ୍ପାଦନ ସମୟରେ କୌଣସି କର୍ମଚାରୀଙ୍କର ମୃତ୍ୟୁ ହୁଏ ତେବେ ତାଙ୍କ ପରିବାରକୁ 15 ଲକ୍ଷ ଟଙ୍କା ସହାୟତା ରାଶି ଦିଆଯିବାର ବ୍ୟବସ୍ଥା ରହିଛି । ତେବେ ଯଦି ସଡକ ଦୁର୍ଘଟଣା, ମାଓବାଦୀ ଆକ୍ରମଣ, ବୋମା ବିସ୍ଫୋରଣ କିମ୍ବା ଅଘଟଣରେ ମୃତ୍ୟୁ ହୁଏ ତେବେ 30 ଲକ୍ଷ ଟଙ୍କା ସହାୟତା ଦେବାର ବ୍ୟବସ୍ଥା ରହିଛି ।
ସେହିଭଳି ଯଦି ଦିବ୍ୟାଙ୍ଗ ହୁଅନ୍ତି ଏହି ରାଶି 7 ଲକ୍ଷ 50 ହଜାର ଟଙ୍କା ରହିବ । ଯଦି କୌଣସି ଦୁର୍ଘଟଣା ଜନିତ ହୁଏ ତା ହେଲେ ଏହା ଦୁଇ ଗୁଣା ସହାୟତା ରାଶି ମିଳିବ । ଏହି ଅର୍ଥରାଶି କେନ୍ଦ୍ର ଓ ରାଜ୍ୟ ଉଭୟ ପ୍ରଦାନ କରିବେ । ଲୋକସଭା ନିର୍ବାଚନ କ୍ଷେତ୍ରରେ କେନ୍ଦ୍ର ସରକାର ଓ ବିଧାନସଭା ନିର୍ବାଚନ କ୍ଷେତ୍ରରେ ରାଜ୍ୟ ସରକାର ଏହି ଅର୍ଥରାଶି ଭରଣା କରିବେ । ଯଦି ଏକା ସମୟରେ ଦୁଇଟି ଯାକ ନିର୍ବାଚନ ହେଉଛି, ତାହେଲେ ଉଭୟ କେନ୍ଦ୍ର ଓ ରାଜ୍ୟ ଅଧା ଅଧା ଭରଣା କରିବେ ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
