ଭୁବନେଶ୍ବର: ନୂଆ ଟ୍ରାଫିକ ନିୟମକୁ ନେଇ ଏବେ ଲୋକଙ୍କ ମୁଣ୍ଡରେ ଚଡକ । ଡକ୍ୟୁମେଣ୍ଟ ପାଇଁ ବ୍ଯସ୍ତ ଏବେ ସବୁ ଗାଡି ଚାଳକ । ଏହାର ପ୍ରମାଣ ଦେଉଛି ଆରଟିଓ ଅଫିସ । ଡିଏଲ ହେଉ କି ଗାଡି ରେଜିଷ୍ଟ୍ରେସନ ରି-ନ୍ଯୁ, ଆରଟିଓ ଅଫିସରେ ଛୁଟିଦିନରେ ବି ଖଚାଖଚ ଭିଡ ଦେଖିବାକୁ ମିଳୁଛି ।
ଛୁଟିଦିନ ପଡିଥିବାରୁ ଲୋକେ ଅଫିସ ଟେନସନରୁ ବାହାରି ଗାଡିର ଜରୁରୀ କାଗଜପତ୍ର ବାହାର କରିବାକୁ ଧାଇଁ ଆସିଛନ୍ତି ଆରଟିଓ ଅଫିସକୁ । ତେବେ ଭିଡକୁ ଦୃଷ୍ଟିରେ ରଖି ରାଜଧାନୀର ଚାରୋଟି ସ୍ଥାନରେ ଆରଟିଓ ପାଇଁ ଅସ୍ଥାୟୀ କେନ୍ଦ୍ର ଖୋଲାଯିବାକୁ ବ୍ୟବସ୍ଥା କରାଯାଇଛି । ଏଥିପାଇଁ ଜାଗା ଚିହ୍ନଟ ମଧ୍ୟ ସରିଛି ।
ସହିଦ ନଗର କର୍ପୋରେସନ କାର୍ଯାଳୟ ସହ ବିଏମସି ଅଫିସ ଓ ସୌଭାଗ୍ଯନଗର ସହ ପଟିଆ ପୁରୁଣା କର୍ପୋରେସନ ଅଫିସରେ ରେଜିଷ୍ଟ୍ରେସନ ବା ଡିଏଲ ଆବେଦନ ପାଇଁ ଆରଟିଓ ଅଧିକାରୀ ଜାଗା ଚିହ୍ନଟ କରିଛନ୍ତି । ଖୁବଶିଘ୍ର ଏଠାରେ ଅସ୍ଥାୟୀ କେନ୍ଦ୍ର ଖୋଲାଯିବ । ଫଳରେ ଲୋକେ ଏଠାରେ ନିଜ ନିଜର ଡିଏଲ ଓ ରେଜିଷ୍ଟ୍ରେସନ ସମ୍ପର୍କିତ ସମସ୍ଯାର ସମାଧାନ କରିପାରିବେ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
