ଭୁବନେଶ୍ବର: କେଉଁ ପୁରାଣ ଯୁଗରୁ କିମ୍ବଦନ୍ତୀ କଥାକୁ ଅନୁସରଣ କରି ଦେଶ ବିଦେଶରୁ ସାଧୁସନ୍ଥମାନେ ଏହି ଅବସରରେ ତପ ,ଧ୍ୟାନ କରି ଜଗତର ମଙ୍ଗଳ ନିମନ୍ତେ ପାର୍ଥନା କରିଥାନ୍ତି । ଆଉ ତାଙ୍କର ଦର୍ଶନ କରିବା ସହିତ ସେମାନଙ୍କ ଠାରୁ ଆଶୀର୍ବାଦ ଲାଭ କରିବା ପାଇଁ ସାଧାରଣ ଜନତା ଏଠାକୁ ଚାଲି ଆସନ୍ତି । ସେହି ପ୍ରଥା ଧୀରେ ଧୀରେ ମେଳାରେ ପରିଣତ ହୋଇଥିବା ବେଳେ ବେଶ ପ୍ରସିଦ୍ଧି ଲାଭ କରିବାରେ ଲାଗିଛି ଖଣ୍ଡଗିରି ମେଳା ।
ପବିତ୍ର ମାଘ ସପ୍ତମୀ ଠାରୁ ଖଣ୍ଡଗିରି ମେଳା ଆରମ୍ଭ ହୋଇଥବା ବେଳେ ଦିନକୁ ଦିନ ଗହଳି ବଢ଼ିବାରେ ଲାଗିଛି । ବିଭିନ୍ନ ସ୍ଥାନରୁ ଏଠାକୁ ଆସୁଥିବା ବାବା ଓ ସାଧୁସନ୍ଥମାନେ ଖଣ୍ଡଗିରି ପାହାଡ଼ର ବିଭିନ୍ନ ସ୍ଥାନରେ ନିଜ ନିଜର ଆସ୍ଥାନ ଜମାଇ ପୂଜା ପାଠ, ହୋମ ଯଜ୍ଞ କରିବାରେ ଲାଗିପଡିଛନ୍ତି ।
ସମଗ୍ର ଅଞ୍ଚଳ ଚଳଚଞ୍ଚଳ ହୋଇ ଉଠୁଥିବା ଦେଖିବାକୁ ମିଳୁଥିବା ବେଳେ ପରିବେଶ ଭକ୍ତିମୟ ଅନୁଭବ ହେଉଛି । ଲୋକମାନେ ଏଠାରେ ବିରାଜମାନ କରୁଥିବା ମାଆଙ୍କ ଦର୍ଶନ କରିବା ସହିତ ମେଳା ବୁଲିବାରେ ଆନନ୍ଦ ଉଠାଉଛନ୍ତି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
