ଭୁବନେଶ୍ବର: ପ୍ରଥମ ପର୍ଯ୍ୟାୟ ଲକଡାଉନ ବେଳେ ଖାଁ ଖାଁ ରାଜଧାନୀର ସମସ୍ତ ପୋଲିସ ଷ୍ଟେସନ । ଥାନାରେ ଦାଖଲ ହେଉନି ଆଉ ପୂର୍ବପରି କ୍ରାଇମ ରିପୋର୍ଟ । ଲକଡାଉନ ପ୍ରଭାବରେ କମିଛି ଅପରାଧିକ କାର୍ଯ୍ୟକଳାପ । ବିଗତ ଦିନ ଅପେକ୍ଷା ଏବେ ଥାନାରେ ଦାଖଲ ହେଉଛି କାଁ ଭାଁ ଅଭିଯୋଗ ।
ଗତ 21 ଦିନ ମଧ୍ୟରେ ରାଜଧାନୀର 22ଟି ଥାନାକୁ ଆସିଛି ମାତ୍ର 94 ଅଭିଯୋଗ । ଯେଉଁଥିରେ 40ଟି ଅଭିଯୋଗ ଲକଡାଉନ ଉଲଙ୍ଘନକାରୀଙ୍କ ବିରୋଧରେ ଓ 25ଟି ମଦ ତଥା ନିଶା ନଜିତ କାରବାର ବିରୋଧରେ ପୋଲିସ ପକ୍ଷରୁ ମାମଲା ଦାଏର ହୋଇଛି । ସେହିପରି 11ଟି ଅଭିଯୋଗ ଚୋରି ତଥା ଲୁଟପାଟ ବିରୋଧରେ ହୋଇଥିବା ବେଳେ 19ଟି ଅଭିଯୋଗ ଘରୋଇ ହିଂସା ବିରୋଧରେ ଆସିଛି । ଅନ୍ୟପଟେ ଲକଡାଉନ ସମୟରେ ଲୋକେ ଘରେ ଅଧିକ ସମୟ ବିତାଉଥିବାରୁ ଘରୋଇ ହିଂସା ବୃଦ୍ଧି ପାଇବାର ଆଶଙ୍କା ପ୍ରକାଶ କରିଥିଲେ ମୁଖ୍ୟମନ୍ତ୍ରୀ । ଏହା ପରେ ବୁଧବାର ଘରୋଇ ହିଂସା ଅଭିଯୋଗ ପାଇଁ ମହିଳା ଓ ଶିଶୁବିକାଶ ବିଭାଗ ପକ୍ଷରୁ ଜାରି ହୋଇଛି ଏକ ହ୍ୱାଟସ ଅପ୍ ନମ୍ବର । ଏହି ନମ୍ବରଟି ହେଉଛି – ୭୨୦୫୦୦୬୦୩୯ ।
ସେହିପରି ପୋଲିସ ଡିଜି ଅଭୟ ମଧ୍ୟ ଅନୁରୂପ ନିର୍ଦ୍ଦେଶନାମା ଜାରି କରିଛନ୍ତି । ନିର୍ଯ୍ୟାତନା ନେଇ କୌଣସି ମହିଳା ଫୋନ କଲେ ଘରକୁ ଯିବ ପୋଲିସ୍ । ପ୍ରଥମେ କାଉନସେଲିଂ କରାଯିବ ଓ ପରେ ସମାଧାନ ନ ହେଲେ ମାମଲା ରୁଜୁ ହେବ । ଏଥି ପାଇଁ 600ରୁ ଉର୍ଦ୍ଧ୍ବ ଟେଲିଫୋନ ବ୍ୟବସ୍ଥା କରାଯାଇଛି । ଏଥି ସହ ଆଇୟୁସିଏଡବ୍ଲୁ(IUCAW)କୁ ଆଲର୍ଟ ରହିବାକୁ ନିର୍ଦେଶ ରହିଛି । ତେବେ କୋରୋନା ମୁକାବିଲା ମଧ୍ୟରେ ଶାନ୍ତି ବଜାୟ ରଖିବା ଏବେ ଓଡିଶା ପୋଲିସ ପାଇଁ ବଡ ଚ୍ୟାଲେଞ୍ଜ ପାଲଟିଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
