ଭୁବନେଶ୍ବର: ରାଜ୍ୟ କଂଗ୍ରେସର ନୂଆ ମଙ୍ଗୁଆଳ ହୋଇଛନ୍ତି ଶରତ ପଟ୍ଟନାୟକ । ଶରତଙ୍କ ନାମରେ ମୋହର ମାରିଛି, ଅଖିଳ ଭାରତୀୟ କଂଗ୍ରେସ କମିଟି(AICC) । ଏହାକୁ ନେଇ ପ୍ରତିକ୍ରିୟା ରଖିଛନ୍ତି କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା । ସେ କହିଛନ୍ତି ଯେ, "ସମସ୍ତ କଂଗ୍ରେସ କର୍ମୀ ଓ ନେତା ଶରତ ପଟ୍ଟନାୟକଙ୍କୁ ସ୍ବାଗତ କରୁଛୁ । ଦ୍ବିତୀୟ ଥର ପାଇଁ ପ୍ରଦେଶ କଂଗ୍ରେସ କମିଟି ସଭାପତି ହୋଇଥିବାରୁ ତାଙ୍କୁ ଶୁଭେଚ୍ଛା ଜଣାଉଛୁ । ସେ ପୂର୍ବରୁ କଂଗ୍ରେସ ଛାତ୍ର ସଂଘ ସଭାପତି ରହିଥିଲେ, ଯୁବ କଂଗ୍ରେସ ସଭାପତି ଦାୟିତ୍ବରେ ମଧ୍ୟ ରହିବା ପ୍ରଦେଶ କଂଗ୍ରେସ କମିଟିର ସଭାପତି ଦାୟିତ୍ବରେ ମଧ୍ୟ ରହିଥିଲେ । ତାଙ୍କ ଅଭିଜ୍ଞତା ଦଳ ପାଇଁ ଫାଇଦା ହେବ । ଆଗକୁ ଦଳର କାର୍ଯ୍ୟ ସୁରଖୁରୁରେ ଚାଲିବ ।"
PCC ସଭାପତି ପରିବର୍ତ୍ତନ ପରେ କଂଗ୍ରେସ ବିଧାୟକ ଦଳ ନେତା ପରିବର୍ତ୍ତନ ପାଇଁ ମଧ୍ୟ ଚର୍ଚ୍ଚା ଜୋର ଧରିଥିଲା । ତେବେ ଏହାକୁ ନେଇ କୌଣସି ପ୍ରତିକ୍ରିୟା ଦେବାକୁ ମନା କରି ଦେଇଛନ୍ତି କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା । ଏଥିସହିତ ଆଗାମୀ ବ୍ରଜରାଜନଗର ଉପନିର୍ବାଚନ କଂଗ୍ରେସ ଭଲ ପ୍ରଦର୍ଶନ କରିବ ବୋଲି ଦୃଢ଼ୋକ୍ତି ଦେଇଛନ୍ତି ବିଧାୟକ ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
