ଭୁବନେଶ୍ବର: ଆଗକୁ ଆସୁଛି ପଞ୍ଚାୟତ ନିର୍ବାଚନ । ଶାସକ BJD ଜୋରଦାର ପ୍ରସ୍ତୁତି ଆରମ୍ଭ କରିଥିବାବେଳେ BJP ମଧ୍ୟ ସାଙ୍ଗଠନିକ ସ୍ଥିତିକୁ ସୁଦୃଢ କରିବାରେ ସମସ୍ତ ବ୍ୟବସ୍ଥା ଆପଣାଇଛି । ତେବେ କଂଗ୍ରେସ ମଧ୍ୟ ସଂଗଠନକୁ ମଜବୁତ କରିବା ପାଇଁ ସମସ୍ତ କାର୍ଯ୍ୟକ୍ରମ ହାତକୁ ନେଇଛି । ସାଙ୍ଗଠନିକ କାର୍ଯ୍ୟକ୍ରମକୁ ଅଧିକ ସୁଦୃଢ କରିବା ପାଇଁ ରାଜ୍ୟ ପ୍ରଭାରୀ ଚେଲ୍ଲା କୁମାର 3 ଦିନିଆ ଓଡିଶା ଗସ୍ତରେ ଆସୁଛନ୍ତି ।
ଆଜି ଚେଲ୍ଲା କୁମାର ଭୁବନେଶ୍ୱରରେ ପହଞ୍ଚିବେ । 20 ତାରିଖ ସକାଳେ ପୂର୍ବତନ ପ୍ରଧାନମନ୍ତ୍ରୀ ସ୍ବର୍ଗତ ଇନ୍ଦିରା ଗାନ୍ଧୀଙ୍କ ଜନ୍ମଜୟନ୍ତୀରେ IG Park ରେ ଶ୍ରଦ୍ଧାସୁମନ ଅର୍ପଣ କରିବେ । ପରେ କଂଗ୍ରେସ ଭବନରେ ଆୟୋଜିତ ସେବା ଦଳ ପ୍ରସ୍ତୁତି ବୈଠକରେ ଯୋଗ ଦେବେ । କଟକ ଜିଲ୍ଲା ମାହାଙ୍ଗା ଡବଲ ମର୍ଡର କେସରେ ପ୍ରାଣ ହରାଇଥିବା କୁଳମଣି ବରାଳ ପରିବାର ଲୋକଙ୍କୁ ଭେଟିବେ। ସେଠାରୁ ବାଙ୍କୀ ଯିବାର କାର୍ଯ୍ୟକ୍ରମ ରହିଛି । ମା’ ଚର୍ଚ୍ଚିକାଙ୍କୁ ଦର୍ଶନ କରିବାର କାର୍ଯ୍ୟକ୍ରମ ସାରିବା ପରେ ସେଠାରୁ ବାଲେଶ୍ୱର ଅଭିମୁଖେ ଯାତ୍ରା କରିବେ । ସଂଧ୍ୟାରେ ବାଲେଶ୍ୱରରେ ରାତ୍ରୀଯାପନ କରିବେ ।
21 ତାରିଖରେ ସକାଳ ସମୟରେ ବାଲେଶ୍ୱରରେ ସାଙ୍ଗଠନିକ କାର୍ଯ୍ୟକ୍ରମରେ ଯୋଗ ଦେବା ପରେ ବାଲିଆପାଳ ଯାଇ ସେଠାରେ ଜନସାଧାରଣଙ୍କ ସହ ବୈଠକ କରିବେ । ପରେ ଭୁବନେଶ୍ୱରରେ ଆସି ଭୁବନେଶ୍ୱର ସାଙ୍ଗଠନିକ ଜିଲ୍ଲା ପରିବର୍ଦ୍ଧିତ କାର୍ଯ୍ୟକାରିଣୀରେ ଯୋଗ ଦେଇ ସଂଧ୍ୟାରେ ଦିଲ୍ଲୀ ଫେରିଯିବାର କାର୍ଯ୍ୟକ୍ରମ ରହିଥିବା ପ୍ରଦେଶ କଂଗ୍ରେସ କମିଟି ପକ୍ଷରୁ ସୂଚନା ମିଳିଛି ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
