ଭୁବନେଶ୍ବର: ଆସନ୍ତାବର୍ଷ 2021ରେ ହେବାକୁ ଯାଉଛି ଜନଗଣନା । ଯେଉଁଥିରେ ଓବିସି ଓ ଏସଇବିସିକୁ ସ୍ବତନ୍ତ୍ର ଭାବେ ଗଣନା କରିବାକୁ କେନ୍ଦ୍ରକୁ ସୁପାରିଶ କରିଛନ୍ତି ରାଜ୍ୟ ସରକାର । ତେବେ ଜନଗଣନା ସହ ରାଜ୍ୟରେ ଆର୍ଥିକ, ସାମାଜିକ ଓ ଜାତିଗତ ଗଣନା କରିବା ପାଇଁ କେନ୍ଦ୍ର ସରକାରଙ୍କୁ ସୁପାରିଶ କରିବା ନେଇ ରାଜ୍ୟ ସରକାରଙ୍କ ନିଷ୍ପତି ପରେ ଜୋର ହେବାରେ ଲାଗିଛି ରାଜନୀତି ।
ଯାହାକୁ ନେଇ ଟାର୍ଗେଟ କରିଛି ରାଜ୍ୟ କଂଗ୍ରେସ । ଏନେଇ ସୋମବାର ଆୟୋଜିତ ଏକ ସାମ୍ବାଦିକ ସମ୍ମିଳନୀରେ କଂଗ୍ରେସ ମୁଖପାତ୍ର ସତ୍ୟପ୍ରକାଶ ନାୟକ କହିଛନ୍ତି । ଜାତିଗତ ଜନଗଣନା କଥା କହୁଥିବା ରାଜ୍ୟ ସରକାର ଏପର୍ଯନ୍ତ କାହିଁକି ଓବିସି କମିଶନକୁ କାର୍ଯ୍ୟକ୍ଷମ କରିନାହାନ୍ତି ବୋଲି ପ୍ରଶ୍ନ କରି ସରକାରଙ୍କ ଆନ୍ତରିକତା ଉପରେ ପ୍ରଶ୍ନ ଉଠାଇଛି କଂଗ୍ରେସ ।
ଦୀର୍ଘଦିନ ଧରି ହାଇକୋର୍ଟର ନିର୍ଦ୍ଦେଶକୁ ଅବମାନନା କରି ରାଜ୍ୟର ଓବିସି କମିଶନକୁ ଅଚଳ ରଖିଥିବାବେଳେ, ଏବେ ଧର୍ମକୁ ଆଖି ଠାର ମାରିବା ଭଳି 2021 ରେ ହେବାକୁ ଥିବା ଜନଗଣନାରେ ଓବିସି ଓ ଏସଇବିସିକୁ ସ୍ବତନ୍ତ୍ର ଭାବେ ଗଣନା କରିବାକୁ କେନ୍ଦ୍ରକୁ ସୁପାରିଶ କରିଛନ୍ତି । ତେବେ ବାସ୍ତବରେ ରାଜ୍ୟ ସରକାର ଏହି ବର୍ଗର ଲୋକଙ୍କୁ ଘୃଣା କରନ୍ତି ବୋଲି ରାଜ୍ୟ କଂଗ୍ରେସ ଅଭିଯୋଗ କରିଛି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ ।
