ଭୁବନେଶ୍ବର: ଭୁବନେଶ୍ବର ମହାନଗର ନିଗମ (ବିଏମସି)ର ବର୍ଦ୍ଧିତ ହୋଲଡିଂ ଟ୍ୟାକ୍ସକୁ ନେଇ ବିଏମସି ଉପରେ ବର୍ଷିଛି କଂଗ୍ରେସ ।
ଆଜି ରାଜ୍ୟ କଂଗ୍ରେସ କାର୍ଯ୍ୟାଳୟରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ବିଧାୟକ ସୁର ରାଉତରାୟ ବିଏମସିର ବର୍ଦ୍ଧିତ ଟ୍ୟାକ୍ସକୁ ନେଇ ପ୍ରଶ୍ନ ଉଠାଇଛନ୍ତି । ସୁର କହିଛନ୍ତି ବିଗତ 20 ବର୍ଷ ହେଲା ଟଙ୍କାଟିଏ ଟ୍ୟାକ୍ସ ବଢାଇ ନଥିଲା । ହେଲେ ଏବେ କଣ ଆବଶ୍ୟକତା ପଡିଲା ହଠାତ ଟ୍ୟାକ୍ସ ବଢାଇବାକୁ ବିଏମସି ନିଷ୍ପତ୍ତି ନେଲା । ଯଦି ରାଜସ୍ବ ବଢାଇବାର ଅଛି 5ରୁ 10ପ୍ରତିଶତ ବଢାଯାଉ । ଏଥିରୁ ଅଧିକ ବଢାଗଲେ କଂଗ୍ରେସ ଆନ୍ଦୋଳନ କରିବ । ବିଏମସିକୁ ଅଚଳ କରିଦେବ ବୋଲି ସୁର ମଧ୍ୟ ଧମକ ଦେଇଛନ୍ତି ।
ସେପଟେ ବିଏମସି କମିଶନର ପ୍ରେମଚନ୍ଦ୍ର ଚୌଧୁରୀ କହିଛନ୍ତି ସାଧାରଣ ପ୍ରଶାସନ ବିଭାଗ ଭୁବନେଶ୍ବରରେ ଥିବା ଜମିର ବେଞ୍ଚମାର୍କ ମୂଲ୍ୟ ବଢାଇଥିବାରୁ ସେହି ଅନୁଯାୟୀ ହୋଲଡିଂ ଟ୍ୟାକ୍ସ ବଢିଛି । ସେ ସ୍ପଷ୍ଟ କରିଛନ୍ତି ଏବେବି ବିଏମସି ପକ୍ଷରୁ ୧୯୯୮ ମସିହାରେ ଭୁବନେଶ୍ବରର ବିଭିନ୍ନ ସ୍ଥାନ ପାଇଁ ଧାର୍ଯ୍ୟ କରାଯାଇଥିବା ହୋଲଡିଂ ଟ୍ୟାକ୍ସ ଆଦାୟ କରାଯାଉଛି । ରାଜସ୍ବ ବୃଦ୍ଧି ପାଇଁ ଦୀର୍ଘ ବର୍ଷ ପରେ ହୋଲଡିଂ ଟ୍ୟାକ୍ସର ବେଞ୍ଚମାର୍କ ବଢାଯାଇଥିବା କହିଛନ୍ତି କମିଶନର । ଏହାସହ କୌଣସି ନିର୍ମାଣ ଉପରେ ବର୍ଦ୍ଧିତ ଟ୍ୟାକ୍ସ ଲାଗୁହେବନି, କେବଳ ହୋଲଡିଂ ଟ୍ୟାକ୍ସ ଆଦାୟ କରାଯିବ ।
ନୂଆ ନିୟମ ହିସାବରେ ୧୦୦ ବର୍ଗଫୁଟ ଜମିକୁ ପାଖାପାଖି ୨୦ ହଜାର ଟଙ୍କା ଦେବାକୁ ପଡିବ । ଆବାସିକ ହୋଲଡିଂ ଟ୍ୟାକ୍ସ ଆଦାୟ ପାଇଁ ଜମିଓ ଘରର ମୂଲ୍ୟକୁ ହିସାବକୁ ନେଇ ଏବେ ୧୭.୫ ପ୍ରତିଶତ ଟ୍ୟାକ୍ସ ଆଦାୟ ହେଉଛି । ନୂଆ ନିୟମ ହିସାବରେ କେବଳ ଜମିର ନୂଆ ବେଞ୍ଚମାର୍କ ମୁଲ୍ୟ ଅନୁଯାୟୀ ଟ୍ୟାକ୍ସ ଆଦାୟ ହେବ ।
ସୂଚନା ଯୋଗ୍ୟ ଯେ ବିଏମସି ୧୯୯୮ ମସିହାରେ ଭୁବନେଶ୍ବର ବିଭିନ୍ନ ଅଞ୍ଚଳରେ ଥିବା ଜମିର ବେଞ୍ଚମାର୍କ ମୂଲ୍ୟ ନିର୍ଦ୍ଧାରଣ କରିଥିଲା । ସେହି ମୂଲ୍ୟ ଅନୁସାରେ ଟ୍ୟାକ୍ସ ଆଦାୟ ହେଉଛି । କିନ୍ତୁ ଏବେ ବିଏମସି ନୂତନ ବେଞ୍ଚମାର୍କ ମୂଲ୍ୟ ନିର୍ଦ୍ଧାରଣ କରି ପ୍ରଚଳନ କରିବାକୁ ଯୋଜନା କରିଛି ବିଏମସି । ଆସନ୍ତା ନଭେମ୍ବର ମାସରୁ ଏହା ପିଛିଲା ଭାବେ ୨୦୧୯ ଏପ୍ରିଲରୁ ନୂଆ ନିୟମକୁ ଲାଗୁ କରିବାକୁ ନିଷ୍ପତ୍ତି ନେଇଛି ବିଏମସି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
