ଭୁବନେଶ୍ବର: ପିସିସି ସଭାପତି ପଦ ପାଇଁ ସାଙ୍ଘାତିକ ଷଡଯନ୍ତ୍ର । ପଦ ହାତେଇବା କଥା ହେଉ କି ରାଜ୍ୟ କଂଗ୍ରେସର ରିମୋର୍ଟକୁ ହାତରେ ରଖି ଗୋଟି ଚଳନା କରିବା କଥା ହେଉ ସବୁକିଛି ଯୋଜନା ମୁତାବକ ଚାଲିଥିବା ରାଜନୈତିକ ଅଳିନ୍ଦୁରେ ଚର୍ଚ୍ଚା ହେଉଛି ।
ପ୍ରଥମେ ନେତୃତ୍ବ ପରିବର୍ତ୍ତନ ନେଇ ଚିନ୍ତନ ବୈଠକ ଓ ପରେ ବୈଠକରେ ଉପସ୍ଥିତ ଥିବା ଲୋକଙ୍କ ପିସିସି ସଭାପତିଙ୍କୁ ସାକ୍ଷାତ ଏହି ଚର୍ଚ୍ଚାକୁ ଖୋରାକ ଯୋଗାଇଛି । ନିର୍ବାଚନ ପରେ ଇସ୍ତଫା ଦେଇଥିବା ପିସିସି ସଭାପତି ନିରଞ୍ଜନ ପଟ୍ଟନାୟକ ଏଥିପ୍ରତି ଆଉ ଆଗ୍ରହ ଦେଖାଉନଥିବାରୁ ଓଡିଶା ପିସିସି ବଦଳିବା ଏକ ପ୍ରକାର ନିଶ୍ଚିତ । ତେଣୁ ଏହି ପଦବୀ ଯେପରି ନିଜ ଗୋଷ୍ଠୀ ମଧ୍ୟରେ ରହିବ ସେଥିପାଇଁ ଏଭଳି ହେଉଥିବା କୁହାଯାଉଛି । ଯାହାକି କଂଗ୍ରେସ ଗୋଷ୍ଠୀ କନ୍ଦଳକୁ ଅଧିକ ତାଜା କରିଛି । ତେବେ ଚିନ୍ତନ ବୈଠକରେ ସବୁ ସଦସ୍ୟ ମହମ୍ମଦ ମୋକିମଙ୍କୁ ସଭାପତି କରିବା ଜିଦ ଧରିବା ଓ ଏନେଇ ପ୍ରସ୍ତାବ ଆଣିବା ହିଁ ମିଶନର ଆରମ୍ଭ ବୋଲି ଚର୍ଚ୍ଚା ହେଉଛି ।
ଯେଉଁ ଚର୍ଚ୍ଚାକୁ ଅଧିକ ଚର୍ଚ୍ଚିତ କରିଛି ଆଜିର ବୈଠକ । ଚିନ୍ତନ ବୈଠକରେ ଉପସ୍ଥିତ ଥିବା ନେତା ପିସିସି ସଭାପତିଙ୍କୁ ଭେଟିବା ଓ ପରେ ଦେଇଥିବା ମନ୍ତବ୍ୟ ଏହି ଚର୍ଚ୍ଚାକୁ ଅଧିକ ଦୃଢ କରୁଛି । ପିସିସି ସଭାପତି ମହମ୍ମଦ ମୋକିମଙ୍କୁ ବେଷ୍ଟ କ୍ୟାଣ୍ଡିଡେଟ ବୋଲି କହିଥିବା ନେତା ମାନେ କହୁଥିବାବେଳେ ଏନେଇ କୌଣସି ଆଲୋଚନା ହୋଇନାହିଁ ଓ ଏହା ଆମ ଆଭ୍ୟନ୍ତରୀଣ ମାମଲା ବୋଲି କହିଛନ୍ତି ନିରଞ୍ଜନ ।
ତେବେ ଏସବୁ ଘଟଣାରେ ମୋକିମ୍ ମୁହଁ ନ ଖୋଲିବା ଓ ନିରଞ୍ଜନ ମଧ୍ୟ ବିଦ୍ରୋହୀଙ୍କୁ ସମର୍ଥନ ଦେବା ଓ ବିଦ୍ରୋହୀ ମଧ୍ୟ ତାଙ୍କ ନିଷ୍ପତ୍ତିରେ ଅଟଳ ରହିବା ଘଟଣା ହିଁ ସବୁ କିଛି ବୟାନ କରୁଛି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
