ଭୁବନେଶ୍ବର: କୃଷିମନ୍ତ୍ରୀ ଅରୁଣ ସାହୁଙ୍କ କେଉଁ ଉତ୍ତର ଠିକ । ଗଣମାଧ୍ୟମ ତଥ୍ୟ ନା ବିଧାନସଭା ତଥ୍ୟ । କାଳିଆର ଅଯୋଗ୍ୟ ହିତାଧିକାରୀଙ୍କୁ ନେଇ ଯେବେ ଧରପଗଡ ଚାଲିଲା ସେତେବେଳେ 3 ଲକ୍ଷ 41 ହଜାର ଅଯୋଗ୍ୟ ହିତାଧିକାରୀ ଥିବା କୁହାଯାଇଥିଲା । ସେଥିମଧ୍ୟରୁ 20 ହଜାର ସରକାରୀ ଚାକିରିଆ, 12 ହଜାର ବଡ ଚାଷୀ ଏବଂ 9 ହଜାର ନାବାଳକ ଓ ନାବାଳିକା କଳିଆ ଯୋଜନାର ଲାଭ ଉଠାଇଥିଲେ ବୋଲି କୁହାଯାଇଥିଲା । ମାତ୍ର ଏହାର 3 ମାସ ପରେ ଅଣ ତାରକା ପ୍ରଶ୍ନର ଉତ୍ତର ରଖି ଆଉ ଗୋଟିଏ ନୂଆ ତଥ୍ୟ ଦେଇଛନ୍ତି ମନ୍ତ୍ରୀ ଅରୁଣ ସାହୁ ।
ଜଳେଶ୍ବର ବିଧାୟକ ଅଶ୍ବିନୀ ପାତ୍ର ପଚାରିଥିଲେ କଳିଆ ଯୋଜନାରେ କେତେ ଅଯୋଗ୍ୟ ହିତାଧିକାରୀ ଚିହ୍ନଟ ହୋଇଛନ୍ତି ଓ କେତେ ଅଯୋଗ୍ୟ ଟଙ୍କା ଫେରାଇଛନ୍ତି । ତେବେ ମନ୍ତ୍ରୀ ଉତ୍ତର ରଖିଛନ୍ତି, 45 ହଜାର 965 ଜଣ ହେଉଛନ୍ତି ଅଯୋଗ୍ୟ ହିତାଧିକାରୀ । ଅଯୋଗ୍ୟ ଟଙ୍କା ଫେରାଇବା ପାଇଁ ପ୍ରକ୍ରିୟା ଚାଲିଛି ।
ତେବେ ଏଠି ପ୍ରଶ୍ନ ଉଠୁଛି ପ୍ରକୃତରେ ସତ କଣ । 3 ଲକ୍ଷ 41 ହଜାର ନା 45 ହଜାର । ଯାହାକୁ ନେଇ ହରଡଘଣାରେ ପଡିଛନ୍ତି ମନ୍ତ୍ରୀ । ସେପଟେ ରାଜ୍ୟରେ କେତେ ଚାଷୀ ଅଛନ୍ତି ଆଉ କେତେ ଚାଷୀ ଶ୍ରମିକ ଅଛନ୍ତି ତାକୁ ନେଇ ବି ତଥ୍ୟର ତାଳମେଳ ରହୁନଥିବା ଜଣାପଡିଛି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
