ଭୁବନେଶ୍ବର: ବିବାହ ଉତ୍ସବ ଏବଂ ଶୁଦ୍ଧିକ୍ରିୟା ପାଇଁ ଜାରି ହେଲା ନୂତନ ଗାଇଡଲାଇନ । ବଢୁଥିବା ସଂକ୍ରମଣକୁ ଦୃଷ୍ଟିରେ ରଖି କମିଶନରେଟ ପୋଲିସ ପକ୍ଷରୁ ଏହା ଜାରି କରାଯାଇଛି । ବିବାହରେ 50 ଜଣ ଓ ଶୁଦ୍ଧିକ୍ରିୟାରେ 20 ଜଣଙ୍କୁ ମିଳିଛି ଅନୁମତି ।
ତେବେ ବିବାହ କିମ୍ବା ବିବାହ ଏହା ସମ୍ବନ୍ଧୀୟ କିଛି କାର୍ଯ୍ୟକ୍ରମ ଆୟୋଜିତ କରିବାକୁ ହେଲେ ପ୍ରଥମେ ସ୍ଥାନୀୟ ପୋଲିସ ଷ୍ଟେସନରୁ ଅନୁମତି ନେବାକୁ ହେବ । ବର, କନ୍ୟା, ଉଭୟ ପକ୍ଷଙ୍କ ପରିବାର, ସାଙ୍ଗସାଥୀ, ବନ୍ଧୁ ପରିଜନ, ବ୍ରାହ୍ମଣ, ଭୋଜି କାର୍ଯ୍ୟରେ ନିୟୋଜିତ ସମସ୍ତ ରୋଷେୟା ଆଦିଙ୍କୁ ମିଶାଇ ସର୍ବମୋଟ 50 ଜଣ ହିଁ ସାମିଲ ହୋଇପାରିବେ । ଯେପରି ବିବାହରେ 50ରୁ ଅଧିକ ବ୍ୟକ୍ତି ସାମିଲ ନ ହୁଅନ୍ତି, ତାହା ସ୍ଥାନୀୟ ପୋଲିସ ଅଧିକାରୀ ସୁନିଶ୍ଚିତ କରିବେ । ଏପରିକି ବିବାହ ଶୋଭାଯାତ୍ରାକୁ ସମ୍ପୂର୍ଣ୍ଣ ବାରଣ କରାଯାଇଛି । 65ରୁ ଉର୍ଦ୍ଧ୍ବ ବୟସ୍କ, 10 ବର୍ଷରୁ କମ୍ ବୟସ୍କ ଶିଶୁ ଏବଂ ଗର୍ଭବତୀ ମହିଳାଙ୍କ କେସରେ ସଂକ୍ରମଣ ବ୍ୟାପିବାର ଆଶଙ୍କା ଅଧିକା ଥିବାରୁ ସେମାନଙ୍କୁ ବିବାହ ଉତ୍ସବରେ ଯୋଗଦାନ କରିବାକୁ ବାରଣ କରାଯାଇଛି । ସେହିପରି ଥଣ୍ଡା ସର୍ଦ୍ଦିରେ ଆକ୍ରାନ୍ତ ବ୍ୟକ୍ତିଙ୍କୁ ଉତ୍ସବରେ ସାମିଲ ନ ହେବାକୁ ମଧ୍ୟ ଗାଇଡଲାଇନରେ ଉଲ୍ଲେଖ ରହିଛି ।
ଏଥିସହ ବିବାହ ଉତ୍ସବରେ ଉପସ୍ଥିତ ସମସ୍ତ ଲୋକେ 2 ମିଟର ସାମାଜିକ ଦୂରତା ବଜାୟ ରଖିବା ସହ ସମ୍ପୂର୍ଣ୍ଣ ଉତ୍ସବରେ ମାସ୍କ ବ୍ୟବହାର କରିବାକୁ ନିର୍ଦ୍ଦେଶ ଦିଆଯାଇଛି । ତାହା ସଙ୍ଗେ ସଙ୍ଗେ ଯେପରି କୌଣସି ଲୋକ ପାନ, ଗୁଟଖା ଛେପ ଏଣେତେଣେ ନ ପକାନ୍ତି, ସେଥିପ୍ରତି ବର-କନ୍ୟାଙ୍କ ଅଭିଭାବକଙ୍କୁ ଦୃଷ୍ଟି ଦେବାକୁ ନିର୍ଦ୍ଦେଶ ରହିଛି । ବିବାହ ଆୟୋଜକଙ୍କୁ ଯଥେଷ୍ଟ ପରିମାଣର ସାନିଟାଇଜର, ସାବୁନ ଓ ପାଣି ମହଜୁଦ ରଖିବାକୁ ଗାଇଡଲାଇନରେ ଉଲ୍ଲେଖ ରହିଛି । ଯଦି କେହି ଏହି ଗାଇଡଲାଇନ ଉଲ୍ଲଙ୍ଘନ କରନ୍ତି, ସେଥିପାଇଁ ବିବାହ ଆୟୋଜକ କିମ୍ବା ବିବାହ ମଣ୍ଡପ ମ୍ୟାନେଜର ଦାୟୀ ରହିବେ ଏବଂ ତାଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
