ଭୁବନେଶ୍ବର: ନାଗରିକତା ସଂଶୋଧନ ଆଇନ(ସିଏଏ)କୁ ନେଇ ସାରା ଦେଶରେ ବିରୋଧ। ଏନେଇ ମଙ୍ଗଳବାର ରାଜଧାନୀ ଭୁବନେଶ୍ବରରେ ମଧ୍ୟ ଶାନ୍ତିପୂର୍ଣ୍ଣ ଶୋଭାଯାତ୍ରାରେ ବାହାରିଥିଲେ ସଂଖ୍ୟାଲଘୁ ସମ୍ପ୍ରଦାୟର ଲୋକେ। ଆନ୍ଦୋଳନରେ ସିଏଏକୁ ନେଇ ରାଜ୍ୟର ବିଭିନ୍ନ ପ୍ରାନ୍ତରୁ ପ୍ରାୟ 5 ହଜାରରୁ ଉର୍ଦ୍ଧ୍ବ ମୁସଲମାନ ସମ୍ପ୍ରଦାୟ ଲୋକେ ବିକ୍ଷୋଭ ପ୍ରଦର୍ଶନ କରିଥିଲେ।
ଏହାପରେ ଏକ ପ୍ରତିନିଧି ଦଳ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟି ଦାବିପତ୍ର ଦେବାକୁ ଯାଇଥିବା ବେଳେ ସେଠାରେ ମଧ୍ୟ ତାଙ୍କୁ ମୁଖ୍ୟମନ୍ତ୍ରୀଙ୍କୁ ଭେଟିବାକୁ ଦିଆଯାଇନଥିଲା। ଫଳରେ ଗୃହ ସଚିବଙ୍କୁ ଭେଟି ଦାବିପତ୍ର ପ୍ରଦାନ କରିଥିଲେ ପ୍ରତିନିଧି ଦଳ । ଏନେଇ କ୍ଷୋଭ ପ୍ରକାଶ କରି ରାଜ୍ୟ ଜମିୟତ ଉଲମାର ସାଧାରଣ ସମ୍ପାଦକ ସୟଦ ନକିବୁଲ ଅମିନ କହିଥିଲେ, ଅବଶୋଷର ବିଷୟ କି ମୁଖ୍ୟମନ୍ତ୍ରୀଙ୍କୁ ଭେଟିବାକୁ ଚାହୁଁଥିଲେ ବି ଭେଟିବା ପାଇଁ ସୁଯୋଗ ଦିଆଗଲାନି।
ରାଜ୍ୟର ମୁଖ୍ୟ ହିସାବରେ ଲୋକଙ୍କ ଦୁଃଖ ଜଣାଇବା ପାଇଁ ଆସିଥିଲୁ । ଏହାସହ ଯେ ପର୍ଯ୍ୟନ୍ତ ନିଜେ ମୁଖ୍ୟମନ୍ତ୍ରୀ ନିଜେ ଆସି କିଛି କହି ନାହାନ୍ତି କି ସିଏଏ ଓ ଏନଆରସି ଲାଗୁ ନକରିବା ପାଇଁ ପ୍ରତିଶ୍ରୁତି ଦେଇନାହାନ୍ତି ସେ ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ଚେତାବନୀ ଦେଇଛନ୍ତି ସୟଦ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
