ଭୁବନେଶ୍ବର: ସାଧାରଣତନ୍ତ୍ର ଦିବସ ଉପଲକ୍ଷେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବାର୍ତ୍ତା। ଦେଶର ବୀର ପୁରୁଷଙ୍କ ସହିତ ଶହୀଦ ଯବାନଙ୍କୁ ଶ୍ରଦ୍ଧାଞ୍ଜଳି ଦେଲେ ନବୀନ । ଏହି ଅବସରରେ ନବୀନ କହିଛନ୍ତି ଯେ,‘ଭାରତ ଗାନ୍ଧୀଙ୍କ ଦେଶ, ସତ୍ୟ ଅହିଂସାର ଦେଶ । ବିଭିନ୍ନ ବିଚାର ଓ ବିଭିନ୍ନ ବିଶ୍ବାସର ଦେଶ, ସମସ୍ତଙ୍କୁ ସାଥିରେ ଧରି ଭାରତ ଆଜି ବିକାଶ କ୍ଷେତ୍ରରେ ଏକ ସ୍ଵତନ୍ତ୍ର ପରିଚୟ ସୃଷ୍ଟି କରିଛି। ଭାରତ ବିକାଶ କ୍ଷେତ୍ରରେ ରାଜ୍ୟ ମାନଙ୍କର ବିଶେଷ ଅବଦାନ ରହିଛି ।’
ଏହାସହ ସାଢେ 4କୋଟି ଓଡିଆଙ୍କ ଆଶା ଓ ସ୍ଵପ୍ନକୁ ସାକାର କ୍ଷେତ୍ରରେ ଓଡିଶା ଆଗେଇ ଚାଲିଛି । କ୍ଷେତ୍ରରେ ଓଡିଶା ଦେଶରେ ଦ୍ବିତୀୟ ସ୍ଥାନରେ ରହିଛି । ଚାଷୀ, ମହିଳା, ଯୁବକ, ଶ୍ରମିକ ହେଉଛନ୍ତି ଅର୍ଥନୀତିର ମେରୁଦଣ୍ଡ । ଏମାନଙ୍କ କର୍ମନିଯୁକ୍ତି ହିଁ ବିକାଶଧାରାକୁ ଅଧିକ ଶକ୍ତି ଦେଇଛି ବୋଲି ଏହି ଅବସରରେ ନବୀନ କହିଛନ୍ତି ।
ସେହିପରି ସୁଶାସନ କ୍ଷେତ୍ରରେ 5ଟି ସାରାଦେଶରେ ଏକ ମଡେଲ ହୋଇଛି । ଠିକ୍ ସମୟରେ ଉତ୍ତମ ସେବା ଯୋଗାଇବାରେ 5ଟି ମନ୍ତ୍ର ଲୋକପ୍ରିୟ ହୋଇଛି । ‘ମୋ ସରକାର’ କାର୍ଯ୍ୟକ୍ରମ ସରକାର ଓ ଜନସାଧାରଣଙ୍କ ମଧ୍ୟରେ ସମ୍ପର୍କକୁ ଅଧିକ ମଜଭୁତ କରିଛି । ବ୍ୟବସ୍ଥା ପ୍ରତି ଲୋକଙ୍କ ଭରସା ବଢିଛି । ଜଗନ୍ନାଥ ଦେଶ ହେଉଛି ଓଡିଶାର ଶ୍ରେଷ୍ଠ ପରିଚୟ । ଶ୍ରୀମନ୍ଦିର ଓ ଏକାମ୍ର କ୍ଷେତ୍ରର ବିକାଶ ପାଇଁ ସରକାରଙ୍କ ପଦକ୍ଷେପ କଳା ସଂସ୍କୃତିର ଗୌରବ ବୃଦ୍ଧି କରୁଛି । ଓଡିଆ ଆଜି ନୂତନ ସଂକଳ୍ପ ନେଇ ଆଗକୁ ବଢୁଛି ବୋଲି ମଧ୍ୟ ନବୀନ ଉଲ୍ଲେଖ କରିଛନ୍ତି ।
ଅନ୍ୟପଟେ ନୂଆ ଓଡିଶା ହେବ କନଫିଡେଣ୍ଟ ଓଡିଶା । ସବୁ ଆହ୍ଵାନକୁ ମୁକାବିଲା କରିବାର ସାହସ ଓ ଦକ୍ଷତା ଓଡିଶାର ଯୁବକଙ୍କ ପାଖରେ ରହିଛି । ବିପର୍ଯ୍ୟୟ ପରିଚାଳନା ଠାରୁ ଆରମ୍ଭ କରି କ୍ରୀଡା ଆଦି ବିଭିନ୍ନ କ୍ଷେତ୍ରରେ ଆମେ ଗ୍ଲୋବାଲ ବେଞ୍ଚମାର୍କ ହାସଲ କରିପାରୁଛୁ । ସେବା, ସାହସ, ଦକ୍ଷତା ଓ ପ୍ରତିଶ୍ରୁତି ହେବ ନୂଆ ଓଡିଶାର ପରିଚୟ । ନୂଆ ଓଡିଶା ଶ୍ରେଷ୍ଠ ଓଡିଶା ହେବ ବୋଲି କହିବା ସହ ନୂଆ ଓଡିଶା ଗଠନ ପାଇଁ କାର୍ଯ୍ୟ କରିବାକୁ ନବୀନ ଆହ୍ବାନ ଦେଇଛନ୍ତି ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
