ଭୁବନେଶ୍ବର: କୋରୋନା ଚିକିତ୍ସାରେ ପ୍ଲାଜମା ଥେରାପି ଏକ ଫଳପ୍ରଦ ଉପାୟ ଭାବେ ଉଭା ହୋଇଥିବା ବେଳେ ରାଜ୍ୟରେ ମଧ୍ୟ ଏଥିରେ ସଫଳତା ମିଳିଛି । ଏହି ଚିକିତ୍ସା ପଦ୍ଧତି ଦ୍ଵାରା କଟକରେ ଜଣେ ମହିଳା ସୁସ୍ଥ ହୋଇ ଘରକୁ ଫେରିଛନ୍ତି । ଯାହାକୁ ନେଇ ଉଭୟ ଡାକ୍ତର ଓ ରୋଗୀମାନଙ୍କ ମଧ୍ୟରେ ଆଶା ସଞ୍ଚାର କରିଛି ଏହି ଥେରାପି । ଗତ ସପ୍ତାହଠାରୁ ଆରମ୍ଭ ହୋଇଥିବା ଏହି ପ୍ଲାଜମା ଥେରାପିରେ ପ୍ଲାଜମା ଦାନକୁ ଉତ୍ସାହିତ କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମନ୍ତ୍ରୀ ମଣ୍ଡଳର ସଦସ୍ୟମାନଙ୍କୁ ଦେଇଛନ୍ତି ବିଭିନ୍ନ ଜିଲ୍ଲାର ଦାୟିତ୍ବ ଦେଇଛନ୍ତି ।
ମନ୍ତ୍ରୀମାନଙ୍କ କାର୍ଯ୍ୟ ହେଉଛି ବିଭିନ୍ନ ଜିଲ୍ଲା ଗସ୍ତ କରି ଆରୋଗ୍ୟ ଲାଭ କରିଥିବା କୋଭିଡ ରୋଗୀଙ୍କ ସହ ଯୋଗାଯୋଗ କରି ସେମାନଙ୍କୁ ପ୍ଲାଜମା ଦାନ ପାଇଁ ଉତ୍ସାହିତ କରିବା ସହ ଆବଶ୍ୟକୀୟ ବ୍ୟବସ୍ଥା କରିବା । ନିୟମିତ ବ୍ୟବଧାନରେ ମୁଖ୍ୟମନ୍ତ୍ରୀ ପ୍ଲାଜମା ଦାନର ସମୀକ୍ଷା କରିବା ନେଇ ମଧ୍ୟ ସୂଚନା ଦେଇଛନ୍ତି ।
ତେବେ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ଅନୁଯାୟୀ ନିରଞ୍ଜନ ପୂଜାରୀଙ୍କୁ ପୁରୀ, ବିକ୍ରମ କେଶରୀ ଆରୁଖଙ୍କୁ କନ୍ଧମାଳ ଓ ଗଞ୍ଜାମ, ପ୍ରଫୁଲ୍ଲ ମଲ୍ଲିକଙ୍କୁ ବରଗଡ, ରଣେନ୍ଦ୍ର ପ୍ରତାପ ସ୍ଵାଇଁଙ୍କୁ ଭଦ୍ରକ ଓ କେନ୍ଦ୍ରାପଡା, ପଦ୍ମନାଭ ବେହେରାଙ୍କୁ ଝାରସୁଗୁଡା ବୌଦ୍ଧ, ପ୍ରତାପ ଜେନାଙ୍କୁ ମୟୂରଭଞ୍ଜ ଓ କଟକ, ଅରୁଣ ସାହୁଙ୍କୁ ନୟାଗଡ଼ ଓ ଖୋର୍ଦ୍ଧା, ସୁଦାମ ମାରଣ୍ଡିଙ୍କୁ ସୋନପୁର ଓ ସୁଶାନ୍ତ ସିଂହଙ୍କୁ ବଲାଙ୍ଗୀର ଓ ସମ୍ବଲପୁରର ଦାୟିତ୍ବ ଦିଆଯାଇଛି । ସେହିପରି ନବକିଶୋର ଦାସଙ୍କୁ କଳାହାଣ୍ଡି ଓ ନୂଆପଡା, ଟୁକୁନି ସାହୁଙ୍କୁ ଦେବଗଡ଼ ଓ ସୁନ୍ଦରଗଡ, ଜଗନ୍ନାଥ ସାରକାଙ୍କୁ କୋରାପୁଟ ଓ ଗଜପତି, ଦିବ୍ୟଶଙ୍କର ମିଶ୍ରଙ୍କୁ ଢେଙ୍କାନାଳ, ଅଶୋକ ପଣ୍ଡାଙ୍କୁ ଅନୁଗୋଳ, ସମୀର ଦାସଙ୍କୁ ଯାଯପୁର, ଜ୍ୟୋତି ପ୍ରକାଶ ପାଣିଗ୍ରାହୀଙ୍କୁ ବାଲେଶ୍ବର, ପ୍ରେମାନନ୍ଦ ନାୟକଙ୍କୁ କେନ୍ଦୁଝର, ରଘୁନନ୍ଦନ ଦାସଙ୍କୁ ଜଗତସିଂହପୁର ଓ ନବରଙ୍ଗପୁର, ପଦ୍ମୀନି ଦିଆନଙ୍କୁ ରାୟଗଡା ଓ ତୁଷାରକାନ୍ତି ବେହେରାଙ୍କୁ ମାଲକାନଗିରି ଦାୟିତ୍ଵ ଦିଆଯାଇଛି ।
ସୂଚନା ଅନୁଯାୟୀ ଦେଶରେ ପ୍ଲାଜମା ଥେରାପି ମିଳୁଥିବା ଚିକିତ୍ସା ମଧ୍ୟରେ ଓଡ଼ିଶା ଅନ୍ୟତମ । କଟକର ଏସସିବି ଓ ରାଉରକେଲାର ଆଇଜିଏଚରେ ପ୍ରାରମ୍ଭିକ ପର୍ଯ୍ୟାୟରେ ପ୍ଲାଜମା ବ୍ୟାଙ୍କ ଆରମ୍ଭ ହୋଇଥିବା ବେଳେ ବ୍ରହ୍ମପୁର, କଟକ ଓ ଭୁବନେଶ୍ବରରେ ଆରମ୍ଭ ହୋଇଛି ଏହି ଥେରାପି । ତେବେ ଭୁବନେଶ୍ଵର ଓ ବ୍ରହ୍ମପୁରରେ ଆଗାମୀ ଦିନରେ ପ୍ଲାଜମା ବ୍ୟାଙ୍କ କରାଯିବାର ଯୋଜନା ରହିଥିବା ଜଣାପଡିଛି ।
ପ୍ରକାଶ ଯୋଗ୍ୟ କି, କୋଭିଡରୁ ସୁସ୍ଥ ହୋଇଥିବା ବ୍ୟକ୍ତି 4 ସପ୍ତାହ ପରେ ପ୍ଲାଜମା ଦାନ କରିପାରିବେ । ତେବେ ଗୋଟିଏ ପ୍ଲାଜମାରେ 2 ଜଣ ଆକ୍ରାନ୍ତଙ୍କର ଚିକିତ୍ସା ହୋଇପାରିବ । ରାଜ୍ୟର ଶୁକ୍ରବାର 808 ଜଣ ଆକ୍ରାନ୍ତ ସୁସ୍ଥ ହୋଇଥିବା ବେଳେ ରାଜ୍ୟରେ ମୋଟ ସୁସ୍ଥ ସଂଖ୍ୟା 15ହଜାର 200ରେ ପହଞ୍ଚିଥିବା ଜଣାପଡିଛି।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
