ଭୁବନେଶ୍ବର: ବନ୍ଧୁକ ମୁନରେ ଜମି ଜବରଦଖଲ । ଜାଗା ନ ଦେଲେ ମିଳୁଛି ବନ୍ଧୁକର ଭୟ । ଏମିତି ଢଙ୍ଗରେ ରାଜଧାନୀରେ ଚାଲିଛି ଜମି ଦଖଲ କାରବାର । ଏହି ଅଭିଯୋଗର ସୁରାକ ପାଇଁ କମିଶନରେଟ ପୋଲିସ ତିନି ଅଭିଯୁକ୍ତଙ୍କୁ ଗିରଫ କରିଛି । ତିନି ଅଭିଯୁକ୍ତମାନେ ହେଲେ ସରୋଜ ବେହେରା ଓରଫ ହାପି, ରୋମନ ମାଲିଆ, ଓ ବବୁଲ ବେହେରା ଓରଫ ରାଜା । ସେମାନଙ୍କ ଠାରୁ ୨ଟି ବନ୍ଧୁକ ସହ ୩ ରାଉଣ୍ଡ ଗୁଳି ଓ ଦୁଇଟି ବାଇକ ଜବତ କରିଛି ପୋଲିସ ।
ଆଜି ସକାଳେ ଧଉଳି ଥାନା ଅଞ୍ଚଳରେ ଜଣେ ଲୋକଙ୍କ ଜମି ଜବରଦଖଲ କରିବାକୁ ଅଭିଯୁକ୍ତମାନେ ଧମକାଉଥିଲେ । ସେହି ସମୟରେ କୁଇକ ଆକ୍ସନ ଟିମ ଓ କ୍ୟାପିଟାଲ ଥାନା ପୋଲିସର ମିଳିତ ଉଦ୍ୟମରେ ଏହି ତିନି ଜଣଙ୍କୁ ଗିରଫ କରାଯାଇଛି । ସେମାନଙ୍କୁ ଆର୍ମସ ଆକ୍ଟରେ ଗିରଫ କରାଯିବା ପରେ କୋର୍ଟ ଚାଲାଣ କରିଛି ପୋଲିସ । ଅଭିଯୁକ୍ତମାନଙ୍କ ନାମରେ ଧଉଳି ଥାନାରେ ମାମଲା ମଧ୍ୟ ରହିଛି ।
ଅନେକ ସମୟରେ ଜମି ଜବରଦଖଲ ପାଇଁ ଅନେକ ବିଲଡର ଏଭଳି ଅସାମାଜିକ ବ୍ୟକ୍ତିମାନଙ୍କ ଜରିଆରେ ବନ୍ଧୁକ ମୁନରେ ଭୟ ଦେଖାଇ ଜମି ଜବରଦଖଲ କରିଥାନ୍ତି । ଏହି ମାମଲାରେ ବିଲଡରଙ୍କ ନାମ ଆଗକୁ ଆସେ ନାହିଁ । ଏପରିକି ଭୟରେ ଲୋକେ ପୋଲିସ ନିକଟରେ ଅଭିଯୋଗ କରନ୍ତି ନାହିଁ । ତେବେ ଏଭଳି ଘଟଣା ସାମ୍ନାକୁ ଆସିବା ପରେ ପୋଲିସ ତଦନ୍ତ ଆରମ୍ଭ କରିଛି ।
ଭୁବନେଶ୍ବରରୁ ତାପସ କୁମାର ପରିଡା, ଇଟିଭି ଭାରତ
