ଭୁବନେଶ୍ବର:ରାଜ୍ୟ ସରକାର ଆଉ ଆହାର ଖର୍ଚ୍ଚ ବହନ କରିବେନି । ଏଣିକି ବିଏମସି ବହନ କରିବ ଆହାର ଖର୍ଚ୍ଚ । ଆହାର ଯୋଜନାରେ ସରକାର ୫ ଟଙ୍କାରେ ଗରିବ ଲୋକଙ୍କୁ ଖାଇବାକୁ ଦେଉଥିଲେ । ମିଲ୍ ପିଛା ଖାଉଟି ୫ ଟଙ୍କା ଦେଉଥିବା ବେଳେ ସରକାର ୧୮ ଟଙ୍କା ଦେଉଥିଲେ, ହେଲେ ଖୁବ ଶୀଘ୍ର ସରକାରଙ୍କ ବଦଳରେ ଭୁବନେଶ୍ବରରେ ବିଏମସି ସମସ୍ତ ଖର୍ଚ୍ଚ ବହନ କରିବ ।
ପୂର୍ବରୁ ବିଏମସି କେବଳ ଆହାର କେନ୍ଦ୍ର ଗୁଡିକ ପରିଚାଳନା କରୁଥିଲେ, ହେଲେ ବିଶେଷ ସୂତ୍ରରୁ ମିଳିଥିବା ସୂଚନା ଅନୁଯାୟୀ ଆଗକୁ ବିଏମସି ସମସ୍ତ ଆହାର କେନ୍ଦ୍ରର ଉଭୟ ଖର୍ଚ୍ଚ ଏବଂ ପରିଚାଳନା କରିବେ । ବିଭିନ୍ନ କମ୍ପାନୀ ମାନଙ୍କ ସାମାଜିକ ଦାୟିତ୍ବ ବୋଧ ଫଣ୍ଡ୍ର ସହାୟତା ନେବ ବିଏମସି, ଏଥିପାଇଁ ଭୁବନେଶ୍ବର ମହାନଗର ନିଗମରେ ବଡ ବଡ କମ୍ପାନୀ ପ୍ରତିନିଧି ମାନଙ୍କ ସହ ଆଲୋଚନା ହୋଇଛି । ଖୁଶଶୀଘ୍ର ଆଉ ଏକ ବୈଠକରେ ନିଷ୍ପତ୍ତି ନିଆଯିବ ବୋଲି ସୂଚନା ଦେଇଛନ୍ତି ବିଏମସି କର୍ତ୍ତୃପକ୍ଷ ।
ବିଏମସି କର୍ତ୍ତୃପକ୍ଷଙ୍କ ସୂଚନା ଅନୁସାରେ ବିଏମସି ଅଞ୍ଚଳରେ ୪ଟି ହସ୍ପିଟାଲ ନିକଟରେ ଥିବା ୫ଟି ଆହାର କେନ୍ଦ୍ର ଚାଲୁଥିଲାବେଳେ ରାଜଧାନୀର ପ୍ରମୁଖ ସ୍ଥାନରେ ଥିବା ବାକି ୭ଟି ଆହାର କେନ୍ଦ୍ର ରହିଛି । ବରମୁଣ୍ଡା ବସ ଷ୍ଟାଣ୍ଡ ଆହାର କେନ୍ଦ୍ର, କଳ୍ପନା ଛକ ଆହାର କେନ୍ଦ୍ର , ନୟାପଲ୍ଲୀ ଆହାର କେନ୍ଦ୍ର, ୟୁନିଟ- ୨ ଆହାର କେନ୍ଦ୍ର, ୩ ନଂ ମାଳି ସାହି ଆହାର କେନ୍ଦ୍ର, ମଞ୍ଚେଶ୍ବର ଆହାର କେନ୍ଦ୍ର, ମାଷ୍ଟର କ୍ୟାଣ୍ଟିନ ଆହାର କେନ୍ଦ୍ର । ସେହିପରି ଏମ୍ସ ହସ୍ପିଟାଲ ନିକଟରେ ୨ ଟି, କ୍ୟାପିଟାଲ ହସ୍ପିଟାଲ ନିକଟରେ ୨ ଟି, କଳିଙ୍ଗ ହସପିଟାଲ ନିକଟରେ ଗୋଟିଏ, ସମ ହସ୍ପିଟାଲ ନିକଟରେ ଗୋଟିଏ ଆହାର କେନ୍ଦ୍ର ଚାଲିଛି। ଏମିତି ୧୨ ଟି ଯାକ ଆହାର କେନ୍ଦ୍ରରେ ମୋଟ ୯୨୦୦ ମିଲ୍ସ ପରିବେଷଣ ହୁଏ। ପୂର୍ବାହ୍ନ ୧୧ ଟାରୁ ଅପରାହ୍ନ ୩ ଟା ପର୍ଯ୍ୟନ୍ତ ଖୋଲା ରୁହେ ଆହାର କେନ୍ଦ୍ର । ଆହାର କେନ୍ଦ୍ରର ପରିଚାଳନା ଦାୟିତ୍ବ ମହିଳା ସ୍ବୟଂସହାୟକ ଗୋଷ୍ଠୀଙ୍କୁ ଦିଆଯାଇଛି ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
