ଭୁବନେଶ୍ବର: ହୋଲଡିଂ ଟ୍ୟାକ୍ସ ଆଦାୟ ପୂର୍ବରୁ ବିଏମସି ସମ୍ମୁଖରେ ବିରୋଧ ପଦର୍ଶନ। ରାଜଧାନୀରେ ହୋଲଡିଂ ଟ୍ୟାକ୍ସ ବୃଦ୍ଧିକୁ ନେଇ ଶୁକ୍ରବାର ଭୁବନେଶ୍ବର ମହାନଗର ନିଗମ ସାମ୍ନାରେ ସମାଜବାଦୀ ପାର୍ଟି, ସିପିଆଇ,ସିପିଆଇ (ଏମ),ସିପିଆଇ(ଏମ-ଏଲ) ଲିବରେସନ ଓ ଫରୱାର୍ଡ ବ୍ଲକ ପକ୍ଷରୁ ଏକ ପ୍ରତିବାଦ ବିକ୍ଷୋଭ ଅନୁଷ୍ଠିତ କରାଯାଇଛି ।
ଏହାସହ ସମସ୍ତ ଦଳ ବିଏମସି ସମ୍ମୁଖରେ ଧାରଣା ଦେବା ସହ ବିଏମସି କମିଶନରଙ୍କ ଉଦେଶ୍ୟରେ ଏକ ସ୍ମାରକପତ୍ର ପ୍ରଦାନ କରିଛନ୍ତି। ଯେ ପର୍ଯ୍ୟନ୍ତ ବିଏମସିର ଏକ ନିର୍ବାଚିତ କର୍ପୋରେସନ ଗଠନ ନହୋଇଛି ସେ ପର୍ଯ୍ୟନ୍ତ ହୋଲଡିଂ ଟିକସ ବୃଦ୍ଧି ନିଷ୍ପତ୍ତିକୁ ବନ୍ଦ ରଖାଯାଉ।
ବିଗତ ୧୦ ବର୍ଷ ଧରି ବିଏମସି ପକ୍ଷରୁ ବିଭିନ୍ନ ସ୍ଥାନରେ ରାଜଧାନୀ ବାସିନ୍ଦାଙ୍କ ଠାରୁ ବେଆଇନ ପାର୍କିଂ ଫି ଆଦାୟ କରାଯାଉଛି। ସେଥିରୁ ଆର୍ଥିକ ଅନିୟମିତତା ପ୍ରକାଶ ପାଇଛି ,ଏହି ବେଆଇନ ପାର୍କିଂ ଫି ର କ୍ରାଇମବ୍ରାଞ୍ଚ ତଦନ୍ତ କରି ଉତ୍ତରଦାୟିତ୍ଵ ନିର୍ଦ୍ଧାରଣ କରିବାକୁ ଦାବି କରିଛନ୍ତି ସମାଜବାଦୀ ପାର୍ଟିର ରାଜ୍ୟ ସଭାପତି ରବି ବେହେରା। ଯଦି ଏଥିରେ କୌଣସି ସୁଧାର ନଆସେ ଆଗାମୀ ଦିନରେ ବିଏମସିକୁ ଅଚଳ କରିଦିଆଯିବ ବୋଲି ରବି ବେହେରା କହିଛନ୍ତି।
ଅନ୍ୟପକ୍ଷର ବିଭିନ୍ନ ଦଳ ପକ୍ଷରୁ ଆଜି ବିଏମସି ସମ୍ମୁଖରେ ପ୍ରତିବାଦ ଧାରଣା ଦିଆଯାଇଥିଲା। ହୋଲଡିଂ ଟ୍ୟାକ୍ସ ବୃଦ୍ଧିକୁ ସ୍ଥଗିତ ରଖାଯାଉ ବୋଲି ଏକ ସ୍ମାରକପତ୍ର ଆମର ହସ୍ତଗତ ହୋଇଛି। ସରକାରଙ୍କ ନିୟମ ଅନୁଯାୟୀ କାର୍ଯ୍ୟକାରୀ କରାଯିବ ବୋଲି ବିଏମସି ଅତିରିକ୍ତ କମିଶନର ସୁରଥ ଚନ୍ଦ୍ର ମଲିକ କହିଛନ୍ତି।
ସୂଚନାଥାଉ କି, ଭୁବନେଶ୍ବରରେ ୧୯୯୮ ମସିହାରେ ବେଞ୍ଚମାର୍କ ମୂଲ୍ୟ ନିର୍ଦ୍ଧାରଣ କରାଯାଇଥିଲା। ପୁଣି ଦୀର୍ଘ ୧୯ ବର୍ଷ ପରେ ସାଧାରଣ ପ୍ରଶାସନ ବିଭାଗ ପକ୍ଷରୁ ନୂତନ ବେଞ୍ଚମାର୍କ ମୁଲ୍ୟ ବୃଦ୍ଧି କରାଯାଇଛି। ଏହାପରେ ବର୍ଷକୁ ୬ ହଜାର ଟଙ୍କା ହୋଲଡିଂ ଟ୍ୟାକ୍ସ ଦେଉଥିବା ଘର ମାଲିକମାନଙ୍କୁ ୧୮ ହଜାର ଟଙ୍କା ବାର୍ଷିକ ହୋଲଡିଂ ଟ୍ୟାକ୍ସ ଦେବାକୁ ପଡିବ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
