ଭୁବନେଶ୍ବର: କେନ୍ଦ୍ର ସରକାରଙ୍କ 3ଟି କୃଷି ଆଇନକୁ ବିରୋଧ କରି ଦିଲ୍ଲୀ ସୀମାରେ ହଜାର ହଜାର ଚାଷୀ ଆନ୍ଦୋଳନ ଚଳାଇ ଥିବାବେଳେ ରାଜ୍ୟର ସମସ୍ତ ମଣ୍ଡିକୁ ଯାଇ 'କୃଷି ବିଲ' ସମ୍ପର୍କରେ କୃଷକଙ୍କୁ ବୁଝେଇବ ରାଜ୍ୟ ବିଜେପି । ଏନେଇ ଭାରତୀୟ ଜନତା ପାର୍ଟି ପକ୍ଷରୁ ରାଜ୍ୟ ସଭାପତି ସମୀର ମହାନ୍ତି ପ୍ରେସମିଟରେ ସୂଚା ଦେଇଛନ୍ତି ।
କୃଷି ବିଲକୁ ନେଇ ରାଜ୍ୟ ବିଜେପି ସଭାପତି ସମୀର ମହାନ୍ତି କହିଛନ୍ତି ଯେ, ସ୍ବାଧୀନତାର ସାତ ଦଶନ୍ଧି ଧରି ଚାଷୀଙ୍କ ପାଇଁ ଯାହା ହୋଇପାରି ନଥିଲା ତାହା, ମୋଦି ସରକାରର 6ବର୍ଷ ଶାସନକାଳ ଭିତରେ ହୋଇଛି । ଏହି କୃଷି ଆଇନରେ ଦଲାଲମାନେ କ୍ଷତିଗ୍ରସ୍ତ ହେଉଛନ୍ତି । ତେଣୁ ଦଲାଲ ପ୍ରାୟୋଜିତ ବିରୋଧ ହେଉଛି ଖୋଲା ବଜାରରେ ଚାଷୀ ତାର ଉତ୍ପାଦ ବିକିପାରିବ, ସର୍ବନିମ୍ନ ସହାୟକ ମୂଲ୍ୟ ନୁହେଁ ବରଂ ସର୍ବାଧିକ ମୂଲ୍ୟ ପାଇପାରିବ । ତେଣୁ 'କୃଷି ବିଲ' ସମ୍ପର୍କରେ ରାଜ୍ୟର ସମସ୍ତ ମଣ୍ଡିକୁ ଯାଇ କୃଷକଙ୍କୁ ବୁଝେଇବ ବିଜେପି ।
କେବଳ ମୋଦିଙ୍କୁ ବିରୋଧ କରିବା ପାଇଁ ଏହି ବିଲକୁ ବିରୋଧ କରାଯାଉଛି । ଆମ ରାଜ୍ୟରେ ରାଜ୍ୟ ସରକାରଙ୍କ ଅବ୍ୟବସ୍ଥିତ ପ୍ରକ୍ରିୟା ଯୋଗୁଁ ଚାଷୀ ହଇରାଣ ହେଉଛନ୍ତି । ନିଜ ରାଜନୈତିକ ସ୍ଥିତି ରକ୍ଷା କରିବା ପାଇଁ ସାତ ଦଶନ୍ଧି ଧରି ଶୋଇଥିବା ଦଳ କୁମ୍ଭୀର କାନ୍ଦଣା କାନ୍ଦୁଛନ୍ତି ।
ଓଡ଼ିଶାର ୩,୫୦୦ ମଣ୍ଡିରେ ପହଞ୍ଚିବେ ଓ ଚାଷୀଙ୍କୁ ଉତ୍ପାଦ ବିକ୍ରି କରିବାରେ ସହାୟତା ଦେବେ । ଓଡିଶା ଚାଷୀ ଏହି ଆଇନ ଦ୍ବାରା ସବୁଠାରୁ ବେଶୀ ଉପକୃତ ହେବେ । ନିଜ ଅପାରଗତା ଲୁଚେଇବାକୁ, ଭୋଟ ସର୍ବସ୍ବ ରାଜନୀତି କରିବାକୁ ଏଠି କିଛି ବନ୍ଧୁ ଏହାକୁ ବିରୋଧ କରୁଛନ୍ତି ।
ଏହି ଅବସରରେ ରାଜ୍ୟ ବିଜେପି ପକ୍ଷରୁ ମୋଦି ସରକାରର ଚାଷୀ କଲ୍ୟାଣ ଯୋଜନାର ପୋଷ୍ଟର ଉନ୍ମୋଚନ କରିଛନ୍ତି ରାଜ୍ୟ ବିଜେପି ସଭାପତି ସମୀର ମହାନ୍ତି ।
ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ
