ଭୁବନେଶ୍ବର: ଆସନ୍ତା ସେପ୍ଟେମ୍ବର ୨୯ (ଗୁରୁବାର) ଓଡ଼ିଶା ଗସ୍ତରେ ଆସୁଛନ୍ତି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା । ଦଳର ବିଭିନ୍ନ କାର୍ଯ୍ୟକ୍ରମରେ ଯୋଗଦେବା ନେଇ ରହିଛି କାର୍ଯ୍ୟକ୍ରମ । ସେପଟେ ନଡ୍ଡାଙ୍କ ଗସ୍ତ ପୂର୍ବରୁ ବିଜେପିର ପ୍ରସ୍ତୁତି ସରିଛି । ବିଜେପି ରାଜ୍ୟ ସହ ପ୍ରଭାରୀ ବିଜୟପାଲ ସିଂ ତୋମାର ଓ ରାଜ୍ୟ ବିଜେପି ସଭାପତି ସମୀର ମହାନ୍ତିଙ୍କ ସମେତ ଦଳର ବରିଷ୍ଠ ନେତା ଜନତା ମଇଦାନରେ ପ୍ରସ୍ତୁତି ବୁଲି ଦେଖିବା ସହ ସମୀକ୍ଷା କରିଛନ୍ତି ।
ଆସନ୍ତା ୨୯ ତାରିଖ (ଗୁରୁବାର) ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ଓଡ଼ିଶା ଗସ୍ତରେ ଆସୁଛନ୍ତି । ଏହି ଅବସରରେ ସେ ବିଭିନ୍ନ ଦଳୀୟ ପଦାଧିକାରୀଙ୍କ ସହ ଏକାଧିକ ବୈଠକ କରିବେ । ସମସ୍ତ ଜିଲ୍ଲାର ଜିଲ୍ଲା ସଭାପତି, ପଦାଧିକାରୀ, ବିଧାୟକ, ସାଂସଦ, ପୂର୍ବତନ ବିଧାୟକ ଓ ସାଂସଦ, ପ୍ରଭାରୀ ମାନଙ୍କ ସହ ଭିନ୍ନ ଭିନ୍ନ ପର୍ଯ୍ୟାୟରେ ବୈଠକ କରିବେ । ସାଙ୍ଗଠନିକ ବୈଠକ ବି ହେବ । ୩୦ ତାରିଖରେ ଜନତା ମଇଦାନରେ ଦଳୀୟ ସଂଗଠନର ୭ଟି ମୋର୍ଚ୍ଚାର ବିଭିନ୍ନ ପଦାଧିକାରଙ୍କ ସହ ଆଲୋଚନା କରିବେ । ପରେ ସଂଯୁକ୍ତ ମୋର୍ଚ୍ଚାକୁ ସମ୍ବୋଧିତ କରିବେ ନଡ୍ଡା । ଏହା ସହିତ ରାଜ୍ୟ ତୁଙ୍ଗ ନେତା ମାନଙ୍କ ସହ ବୈଠକ କରି ୨୦୨୪ ନିର୍ବାଚନ ପାଇଁ ଟାସ୍କ ଦେବେ ।
ନଡ୍ଡାଙ୍କ ଓଡିଶା ଗସ୍ତ ମହତ୍ବପୂର୍ଣ୍ଣ
ତେବେ ରାଷ୍ଟ୍ରୀୟ ଅଧ୍ୟକ୍ଷଙ୍କ ଗସ୍ତ ପୂର୍ବରୁ ବିଭିନ୍ନ କାର୍ଯ୍ୟକ୍ରମର ପ୍ରସ୍ତୁତି କରିଛି ବିଜେପି । ଦଳର ରାଜ୍ୟ ସହ ପ୍ରଭାରୀ ବିଜୟପାଲ ସିଂ ତୋମାର ଓ ରାଜ୍ୟ ବିଜେପି ସଭାପତି ସମୀର ମହାନ୍ତିଙ୍କ ସମେତ ଦଳର ବରିଷ୍ଠ ନେତା କନକ ବର୍ଦ୍ଧନ ସିଂହଦେଓ, ମହିଳା ମୋର୍ଚ୍ଚା ସଭାନେତ୍ରୀ ସ୍ମୃତି ପଟ୍ଟନାୟକ, କୃଷକ ମୋର୍ଚ୍ଚା ରାଜ୍ୟ ସଭାପତି ପ୍ରଦୀପ ପୁରୋହିତ ମୁଖପାତ୍ର ଦିଲ୍ଲୀପ ମଲ୍ଲିକ ଏବଂ ଅନ୍ୟ ପ୍ରମୁଖ ଦଳୀୟ ନେତା ଜନତା ମଇଦାନରେ ପ୍ରସ୍ତୁତି ବୁଲି ଦେଖିବା ସହ ସମୀକ୍ଷା କରିଛନ୍ତି । ଏନେଇ ରାଜ୍ୟ ସହ ପ୍ରଭାରୀ ବିଜୟ ପାଲ ସିଂ ତୋମାର କହିଛନ୍ତି, "ରାଷ୍ଟ୍ରୀୟ ଅଧ୍ୟକ୍ଷଙ୍କ ଓଡିଶା ଗସ୍ତ ମହତ୍ବପୂର୍ଣ୍ଣ । କାରଣ ଆମେ ୨୦୨୪ ନିର୍ବାଚନ ପାଇଁ ଲଗାତାର ପ୍ରସ୍ତୁତି କରୁଛୁ । ଏହାକୁ ଲକ୍ଷ୍ୟ ରଖି ତୃଣମୂଳ ସ୍ତରର ନେତାଙ୍କୁ ନେଇ ବିଭିନ୍ନ କାର୍ଯ୍ୟକ୍ରମ କରାଯାଉଛି ।"
