ଭୁବନେଶ୍ବର: ବିଜେପିର ରାଷ୍ଟ୍ରୀୟ ମୁଖପାତ୍ର ଭାବେ ନିଯୁକ୍ତି ପାଇବା ପରେ ପ୍ରଥମ ଥର ଭୁବନେଶ୍ବର ଆସିଛନ୍ତି ଭୁବନେଶ୍ବର ସାଂସଦ ଅପରାଜିତା ଷଡଙ୍ଗୀ । ତାଙ୍କ ଉପରେ ଦଳ ଏହି ଗୁରୁତ୍ବପୂର୍ଣ୍ଣ ଦାୟିତ୍ବ ଦେଇଥିବାରୁ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଗୃହମନ୍ତ୍ରୀ ଅମିତ ଶାହା ଓ ଦଳର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କୁ ଧନ୍ୟବାଦ ଜଣାଇଛନ୍ତି ।
ଏହାସହ ବିଭିନ୍ନ ପ୍ରସଙ୍ଗରେ ଦଳର ଓ କେନ୍ଦ୍ର ସରକାରଙ୍କର କଣ ଆଭିମୁଖ୍ୟ ରହିଛି ତାହା ଲୋକଲୋଚନକୁ ଆଣିବାକୁ ମୋତେ ଦାୟିତ୍ବ ଦିଆଯାଇଛି । ଆଗକୁ ମଧ୍ୟ ମୋ ନେତା ମାନେ ଯାହା ମୋ ଠାରୁ ଆଶା ରଖିବେ ତାହା ମୁଁ ସୂଚାରୁ ରୂପେ ସମ୍ପାଦନ କରିବି ବୋଲି ସେ ଦର୍ଶାଇଛନ୍ତି ।
ଏହାସହ ରାଜ୍ୟରେ ହେବାକୁ ଥିବା ଦୁଇଟି ଉପନିର୍ବାଚନ ଉପରେ ନିଜର ମନ୍ତବ୍ୟ ଦେଇ ବିଜେପି ନିଶ୍ଚିତ ଜିତିବ ବୋଲି ସେ କହିଛନ୍ତି । ସଂସଦ ଅଧିବେଶନ ସରିବା ପରେ ପ୍ରାୟ 24 ଦିନ ପରେ ସେ ଭୁବନେଶ୍ବରରେ ପାଦ ଦେଇଥିବାବେଳେ ତାଙ୍କ ସମର୍ଥକ ମାନେ ତାଙ୍କୁ ବିମାନବନ୍ଦରରେ ବିପୁଳ ସ୍ବାଗତ କରିଥିଲେ ।
ସୂଚନାଥାଉକି, ସେପ୍ଟେମ୍ବର 26 ତାରିଖରେ ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ତାଙ୍କର ନୂଆ ଟିମ୍ ଗଠନ କରିଥିଲେ । ଯେଉଁଥିରେ ଓଡିଶାରୁ 4 ଜଣ ଥିବାବେଳେ ଅପରାଜିତା ଷଡଙ୍ଗୀ ଓ ସମ୍ବିତ ପାତ୍ରଙ୍କୁ ରାଷ୍ଟ୍ରୀୟ ମୁଖପାତ୍ର ଦାୟିତ୍ବ ମିଳିଛି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
