ଭୁବନେଶ୍ବର: ପୁଣିଥରେ ଶାସକ ବିଜୁ ଜନତା ଦଳ ଏକ ପରିପକ୍ବ ରାଜନୈତିକ ନିଷ୍ପତି ନେଇଛି । ସାରା ଦେଶରେ ଏନଆରସି, ଏନପିଆର ଓ ସିଏଏକୁ ନେଇ ବିରୋଧ ଜାରି ରହିଛି । ଦେଶର କିଛି ରାଜ୍ୟ କେବଳ ସରକାରଙ୍କୁ ବିରୋଧ କରିବା ପାଇଁ ଏନଆରସି, ସିଏଏ ଓ ଏନପିଆରକୁ ବିରୋଧ କରୁଛନ୍ତି । ଏହାସହ ରାଜନୈତିକ ବିବାଦରୁ ଏହି ତିନୋଟି ପ୍ରସଙ୍ଗକୁ ନେଇ ଲୋକଙ୍କ ମଧ୍ୟରେ ଅପପ୍ରଚାର କରୁଛନ୍ତି । ତେବେ ଆଜି ବିଜୁ ଜନତା ଦଳ (ବିଜେଡି) ଏନପିଆରକୁ ନେଇ ଏକ ବଡ ବୟାନ ଦେଇଛନ୍ତି । ଦଳ ମୁଖପାତ୍ର ପ୍ରତାପ ଦେବ କହିଛନ୍ତି ସିଏଏ ଓ ଏନପିଆର ଦୁଇଟି ଭିନ୍ନ ପ୍ରସଙ୍ଗ । ଏନପିଆର ସହ ଏନଆରସି ଓସିଏଏର କୌଣସି ସଂପର୍କ ନାହିଁ ।
ତେବେ ପୂର୍ବରୁ ପାର୍ଲାମେଣ୍ଟରେ ବିଜେଡି ସିଏଏକୁ ସମର୍ଥନ କରିଥିବା ବେଳେ ଏନଆରସିକୁ ବିରୋଧ କରିଛି । ଏବେ ପୁଣି ଏନପିଆରକୁ ପରୋକ୍ଷରେ ସମର୍ଥନ କରିଛି । ପ୍ରତାପ କହିଛନ୍ତି ଏନପିଆର କୌଣସି ନୂଆ ନୁହେଁ । ଏହା ପୂର୍ବରୁ ମଧ୍ୟ ଥିଲା । ପୂର୍ବ 2010ର ଏନପିଆରକୁ ଅପଡେଟ କରାଯିବ । ଏହା ଦେଶର ଏକ ଧାରାବାହିକ କାର୍ଯ୍ୟ । ଏଥିରେ କୌଣସି ନାଗରିକଙ୍କ କୌଣସି କ୍ଷତି ହେବାର ନାହିଁ । ଯେଉଁମାନେ ଏନପିଆରକୁ ବିରୋଧ କରୁଛନ୍ତି ସେମାନେ ଆଇନକୁ ବୁଝିନାହାଁନ୍ତି । କେବଳ ରାଜନୈତିକ ଫାଇଦା ପାଇଁ ବିରୋଧ କରୁଛନ୍ତି ବୋଲି ସେ କହିଛନ୍ତି । ଏହାସହ ପ୍ରତାପ ଆହୁରି କହିଛନ୍ତି ଆଇନକୁ ନେଇ ଯେଉଁ ପରିବର୍ତ୍ତନ ହୋଇଥିବାର ଅଭିଯୋଗ ହେଉଛି ତାହା ସମ୍ପୂର୍ଣ୍ଣ ମିଥ୍ୟା । କେବଳ ପୂର୍ବ ଏନପିଆର ତୁଳନାରେ କିଛି ତଥ୍ୟ ସାମିଲ କରାଯାଇଛି ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
