ଭୁବନେଶ୍ବର: ବିଭିନ୍ନ ପ୍ରସଙ୍ଗକୁ ନେଇ କେନ୍ଦ୍ର ସରକାର ଉପରେ ବର୍ଷିଲେ ବିଜେଡି ସାଂସଦ । କେନ୍ଦ୍ର ଓଡିଶା ପ୍ରତି ଅବିଚାର କରୁଛି । ପ୍ରଧାନମନ୍ତ୍ରୀ ଆବାସ ଯୋଜନା ସଂକ୍ରାନ୍ତରେ ମୁଖ୍ୟମନ୍ତ୍ରୀ ଦୁଇରୁ ତିନି ଥର ପିଏମ୍ଙ୍କୁ ଚିଠି ଲେଖିଛନ୍ତି । ପାର୍ଲାମେଣ୍ଟରେ ଏହି ପ୍ରସଙ୍ଗ ବାରମ୍ବାର ଉପସ୍ଥାପନ କରାଯାଇଛି । କର୍ଣ୍ଣାଟକ ରାଜ୍ୟ ଆର୍ଥିକ ଦୃଷ୍ଟିକୋଣରୁ ସୁଦୃଢ ହୋଇଥିଲେ ହେଁ ଜାନୁୟାରୀରେ ଏହି ରାଜ୍ୟକୁ 25 ଲକ୍ଷ ଗୃହ ନିର୍ମାଣ ପାଇଁ ଅନୁଦାନ ଦିଆଯାଇଛି, ହେଲେ ଓଡିଶା ସହ ପାତରଅନ୍ତର ହୋଇଛି । କର୍ଣ୍ଣାଟକ ବିଜେପି ଶାସିତ ରାଜ୍ୟ ହୋଇଥିବା ଯୋଗୁଁ ସରକାରଙ୍କ ଏଭଳି ଆଭିମୁଖ୍ୟ ରହିଥିବା ଅଭିଯୋଗ କରିଛନ୍ତି ବିଜେଡି ସାଂସଦ ସୁବାଷ ସିଂ।
ଫନି ବାତ୍ୟା ପରେ ପ୍ରଧାନମନ୍ତ୍ରୀ ଓଡିଶା ଆସିଥିଲେ । ଏପର୍ଯ୍ୟନ୍ତ ରାଜ୍ୟରେ 2 ଲକ୍ଷ ଲୋକ ଫନିରେ ଘର ପାଇନାହାନ୍ତି । ଦକ୍ଷିଣ ଓଡିଶା ଓ ପଶ୍ଚିମ ଓଡିଶାର ଆଦିବାସୀ ଆଧ୍ୟୁଷିତ ଜିଲ୍ଲାରେ ଗରିବ ଲୋକଙ୍କୁ 6 ଲକ୍ଷ ଘର ପାଇଁ 3 ବର୍ଷ ଧରି ଅପେକ୍ଷା କରି ରହିଛି ରାଜ୍ୟ । ଉଷୁନା ଚାଉଳ କ୍ଷେତ୍ରରେ ଓଡିଶା ଏକ ବଳକା ରାଜ୍ୟ । ହେଲେ କେନ୍ଦ୍ର ପର୍ଯ୍ୟାପ୍ତ ପରିମାଣର ଚାଉଳ କିଣିବାକୁ ମନା କରୁଛି । କର୍ଣ୍ଣାଟକରେ ବିଜେପି ସରକାରରେ ଥିବା ଯୋଗୁଁ ଏବଂ ଓଡିଶାରେ ଏହା ବିରୋଧି ଦଳ ହୋଇଥିବାରୁ ଏଭଳି ଅବିଚାର କରୁଛି ।
କେନ୍ଦ୍ର ଉପରେ ଓଡିଶାର 1,623 କୋଟି ଜିଏସଟି ବକେୟା ରହିଛି । କିନ୍ତୁ ତାହା କେନ୍ଦ୍ର ଦେଉନାହିଁ । କେନ୍ଦ୍ର ସରକାରଙ୍କ ଏପରି ପାତରଅନ୍ତର ନୀତି ଓଡିଶା ନିର୍ବାଚନରେ ପ୍ରତିଫଳିତ ହେବ ଓ ଓଡିଶାବାସୀ ଏହାର ଜବାବ ଦେବେ ବୋଲି କହିଛନ୍ତି ସାଂସଦ ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
