ଭୁବନେଶ୍ବର: ଡିସେମ୍ବର 2019ରୁ ଆରମ୍ଭ ହୋଇଥିବା ବିଜେଡିର ସାଂଗଠନିକ ନିର୍ବାଚନ ପ୍ରକ୍ରିୟା ଆଜି(ଶୁକ୍ରବାର) ଶେଷରେ ଜିଲ୍ଲା ସଭାପତିଙ୍କ ନା ଘୋଷଣା କରାଯାଇଛି । ଅନେକ କସରତ ଓ ବିଚାର ବିମର୍ଶ ପରେ ଏହି ତାଳିକା ପ୍ରକାଶ କରିଛି ଶାସକ ଦଳ । ଧାର୍ଯ୍ୟ ସମୟସୀମା ଅତିକ୍ରମ କରିସାରିଥିଲେ ମଧ୍ୟ ଦଳ ‘ଜିଲ୍ଲା ସଭାପତି’ମାନଙ୍କ ନାଁ ଘୋଷଣା କରିବାରେ ସକ୍ଷମ ହୋଇଛି । ଡିସେମ୍ବର ୨୭ରୁ ଫେବୃୟାରୀ ୨୬ତାରିଖ ମଧ୍ୟରେ ୫ଟି ପର୍ଯ୍ୟାୟରେ ନିଜର ସାଂଗଠନିକ ନିର୍ବାଚନ କାର୍ଯ୍ୟସୂଚୀ ଘୋଷଣା କରିଥିଲା ବିଜେଡି । ସେହି ଅନୁଯାୟୀ ଆଜି ଜିଲ୍ଲା ସଭାପତି ତାଳିକା ଘୋଷଣା ହୋଇଛି ।
33ଟି ସାଂଗଠନିକ ଜିଲ୍ଲା ମଧ୍ୟରୁ 14ଟିରେ ପୁରୁଣା ମୁହଁ ଥିବାବେଳେ 19 ଜିଲ୍ଲାରେ ଦଳ ନୂଆ ନେତୃତ୍ବକୁ ମୈଦାନକୁ ଆଣିଛି । ତେବେ ଆଶ୍ଚର୍ଯ୍ୟକର ଭାବେ କିଛି ପୁରୁଖାଙ୍କୁ ସାଂଗଠନିକ ପଦ ପଦବୀରୁ ବାଦ ଦେଇଛି ଦଳ ।
ନୂଆ ଚେହେରା ଭାବେ ସଭାପତି ପଦ ପାଇଥିବା ଜିଲ୍ଲା ଓ ନେତା ହେଉଛନ୍ତି
- ଅନୁଗୋଳ- ମହେନ୍ଦ୍ର ବସ୍ତିଆ
- ଭୁବନେଶ୍ୱର- ଅନନ୍ତ ନାରାୟଣ ଜେନା
- ବଲାଙ୍ଗୀର- ଟୁକୁନି ସାହୁ
- ଦେବଗଡ- ରୋମାଞ୍ଚ ରଞ୍ଜନ ବିଶ୍ୱାଳ
- ଗଜପତି- ପ୍ରଦୀପ ନାୟକ
- ଗଞ୍ଜାମ- ରମେଶ ଚନ୍ଦ୍ର ଚ୍ୟାଉପଟ୍ଟନାୟକ
- ଜଗତସିଂହପୁର- ପ୍ରଶାନ୍ତ ମୁଦୁଲି
- କେନ୍ଦ୍ରାପଡା- ଉତ୍କଳ କେଶରୀ ପରିଡା
- କେଉଁଝର- ମାଧବ ସର୍ଦ୍ଦାର
- ମାଲକାନଗିରି- ପୂର୍ଣ୍ଣଚନ୍ଦ୍ର ବାକା
- ମୟୁରଭଞ୍ଜ- କାଶୀନାଥ ହେମ୍ବ୍ରମ
- ନବରଙ୍ଗପୁର-ରମେଶ ମାଝୀ
- ନୟାଗଡ- ରମେଶ ବେହେରା
- ସମ୍ବଲପୁର- ସିଦ୍ଧାର୍ଥ ଦାସ
- ସୁନ୍ଦରଗଡ- ବିନୟ ଟପ୍ପୋ
- ରାଉରକେଲା- ସାରଦା ନାୟକ
- ମୟୁରଭଞ୍ଜ-ସଦର- ସୁଦାମ ମାରାଣ୍ଡି
- ରାୟଗଡା- ସୁଧୀର ଦାସ
- ନୂଆପଡା- ମନୋଜ ମିଶ୍ର
33 ଟି ସାଂଗଠନିକ ଜିଲ୍ଲା ପାଇଁ ସଭାପତି ପଦ ପାଇଥିବା ନେତାଙ୍କ ମଧ୍ୟରେ 4 ଜଣ ମନ୍ତ୍ରୀ ଅଛନ୍ତି । ଜିଲ୍ଲା ସଭାପତି ଘୋଷଣା ପରେ ଏବେ ରାଜ୍ୟ ପରିଷଦ ସଭ୍ୟ, ରାଜ୍ୟ କାର୍ଯ୍ୟକାରିଣୀ ସଭ୍ୟ ମଧ୍ୟ ଘୋଷଣା ହେବ । ଆଉ ଏକ ଗୁରୁତ୍ବପୂର୍ଣ୍ଣ ସୂଚନା ଅନୁସାରେ ଆସନ୍ତା 23 ( ରବିବାର) ଦିନ ବିଜେଡି ସଭାପତି ଭାବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନାମାଙ୍କନ ପତ୍ର ଦାଖଲ କରିବେ । ଏହାସହ ଚଳିତ ମାସ 26 ତାରିଖ ସୁଦ୍ଧା ବିଜେଡିର ସାଂଗଠନିକ ନିର୍ବାଚନ ପ୍ରକ୍ରିୟା ଶେଷ ହେବ ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
