ଭୁବନେଶ୍ବର: କିଛି ଦିନ ମୁରବୀ ଶୂନ୍ୟ ରହିବା ପରେ ମଙ୍ଗଳବାର ବିଜୁ ଯୁବ ବାହିନୀର ନୂଆ ମୁଖିଆ ଦାୟିତ୍ବ ଗ୍ରହଣ କରିଛନ୍ତି। ପୂର୍ବରୁ ଅରୂପ ପଟ୍ଟନାୟକଙ୍କ ଇସ୍ତଫା ପରେ ଦୀର୍ଘ ଦିନ ପର୍ଯ୍ୟନ୍ତ ଖାଲି ପଡିଥିଲା ଏହି ପଦବୀ । ଯାହାକୁ ଏବେ ପୂରଣ କରିଛନ୍ତି ବିଜେଡିର ସାଧାରଣ ସମ୍ପାଦକ ତଥା ଯୁବ ନେତା ବିଜୟ ନାୟକ ।
ସୂଚନା ଅନୁଯାୟୀ ନିର୍ବାଚନ ପୂର୍ବରୁ ବିଜୁ ଯୁବ ବାହିନୀର ଅଧ୍ୟକ୍ଷ ଥିବା ମୁମ୍ବାଇର ପୋଲିସ କମିଶନର ତଥା ଓଡ଼ିଆ ପୁଅ ଅରୂପ ପଟ୍ଟନାୟକ ନିର୍ବାଚନ ଲଢ଼ିବା ପାଇଁ ନିଜ ପଦବୀରୁ ଇସ୍ତଫା ଦେଇଥିଲେ। ଏହା ପରଠାରୁ ପଦବୀ ଖାଲି ପଡିଥିଲା। କିଛି ଦିନ ପୂର୍ବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଭିନ୍ନ ନିଗମ ଓ କମିଶନର ଅଧ୍ୟକ୍ଷମାନଙ୍କ ନାମ ଘୋଷଣା କରିଥିଲେ। ଯେଉଁଥିରେ ଅଧ୍ୟକ୍ଷ ପଦ ପାଇଁ ସେ ଯୁବ ନେତା ବିଜୟ ନାୟକଙ୍କ ଉପରେ ଆସ୍ଥା ପ୍ରକଟ କରି ତାଙ୍କ ନାମ ଘୋଷଣା କରିଥିଲେ।
ଏନେଇ ମଙ୍ଗଳବାର ବିଜୟ କଳିଙ୍ଗ ଷ୍ଟାଡିୟମ ପରିସରରେ ଥିବା କାର୍ଯ୍ୟାଳୟରେ ବିଧିବଦ୍ଧ ଭାବେ ଦାୟିତ୍ବ ଗ୍ରହଣ କରିଛନ୍ତି । ଏହି ଅବସରରେ ସେ ଯୁବକମାନଙ୍କ ପାଇଁ ମୁଖ୍ୟମନ୍ତ୍ରୀ ଦେଖିଥିବା ସ୍ବପ୍ନକୁ କାର୍ଯ୍ୟକାରୀ କରି ସେମାନଙ୍କୁ ସଶକ୍ତ କରିବା ପାଇଁ ଆହ୍ବାନ ଦେଇଥିଲେ । ଏଥି ସହିତ ଭବିଷ୍ୟତର ଦକ୍ଷ ଓ ଉନ୍ନତ ଯୁବଶକ୍ତି ଗଢି ତୋଳିବା ଦିଗରେ ସେ କାର୍ଯ୍ୟ କରିବେ ବୋଲି କହିଛନ୍ତି।
ସେହିପରି ମୁଖ୍ୟମନ୍ତ୍ରୀ ତାଙ୍କୁ ଯେଉଁ ଗୁରୁ ଦାୟିତ୍ବ ଦେଇଛନ୍ତି ତାହାକୁ ସେ ସୂଚାରୁ ରୂପେ ସମ୍ପାଦନ କରିବେ ବୋଲି ମଧ୍ୟ ପ୍ରକାଶ କରିଛନ୍ତି । ତେବେ ମଙ୍ଗଳବାର ଦାୟିତ୍ବ ଗ୍ରହଣ କରିବା ପରେ ତାଙ୍କୁ କାର୍ଯ୍ୟାଳୟର କର୍ମଚାରୀଙ୍କ ସମେତ ବିଭିନ୍ନ ବର୍ଗର ଲୋକମାନେ ଶୁଭକାମନା ଜଣାଇଛନ୍ତି।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
