ଭୁବନେଶ୍ବର: ସ୍ମାର୍ଟ ସିଟିରୁ ନାଇରୋବି ଯାତ୍ରା କଲେ ପିଅର ଲିଡର ଦୀପାଞ୍ଜଳି ସ୍ବାଇଁ । ନାଇରୋବିରେ ଆୟୋଜିତ 25ତମ ଅନ୍ତର୍ରାଷ୍ଟ୍ରୀୟ ଜନସଂଖ୍ୟା ଓ ବିକାଶ ସମ୍ମିଳନୀରେ ଭୁବନେଶ୍ବରକୁ ପ୍ରତିନିଧିତ୍ବ କରିଛନ୍ତି ସେ । ବସ୍ତିରେ କାମ କରି ସଫଳତା ସାଉଁଟିଥିବା ଦିପାଞ୍ଜଳୀ ଅନ୍ତର୍ରାଷ୍ଟ୍ରୀୟ ଜନସଂଖ୍ୟା ଓ ବିକାଶ ସମ୍ମିଳନୀରେ ଅଶଂଗ୍ରହଣ କରି ବିଭିନ୍ନ ସମସ୍ୟା ଉପସ୍ଥାପନ କରିଛନ୍ତି ।
ଏହି ସମ୍ମିଳନୀରେ ସେ ବସ୍ତି ବାସିନ୍ଦାଙ୍କ ସମସ୍ୟା, ସମାଧାନ ଏବଂ ଉନ୍ନତି ବିଶେଷକରି ଝିଅ ମାନଙ୍କର ପ୍ରଜନନ ସ୍ବାସ୍ଥ୍ୟ ପ୍ରସଙ୍ଗ ଜନିତ ସମସ୍ୟାକୁ ଉତଥାପନ କରିଥିଲେ । ତେବେ ଭୁବନେଶ୍ବର ସ୍ଥିତ ପ୍ରେସ କଲୋନୀର ଶାନ୍ତି ନଗର ବସ୍ତିରେ ରୁହନ୍ତି ଦୀପାଞ୍ଜଳି । ନିଜେ ସ୍ମାର୍ଟ ହେବା ସହ ଅନ୍ୟ ମାନଙ୍କୁ ସ୍ମାର୍ଟ କରିବା ପାଇଁ ସେ ଅଣ୍ଟା ଭିଡିଛନ୍ତି । ସେ ବସ୍ତିବାସିନ୍ଦାକୁ ବିଭିନ୍ନ କ୍ଷେତ୍ରରେ ତାଲିମ ଦେଇଛନ୍ତି । ନିଜର ପରିଶ୍ରମ ପାଇଁ ସେ ଆଜି ଅନ୍ତର୍ରାଷ୍ଟ୍ରୀୟ ଜନସଂଖ୍ୟା ଓ ବିକାଶ ସମ୍ମିଳନୀରେ ଅଂଶ ଗ୍ରହଣ କରିବାର ସୌଭାଗ୍ୟ ଅର୍ଜନ କରିଛନ୍ତି ।
ଶାନ୍ତି ନଗର ବସ୍ତିରେ ରହୁଥିବା ଦୀପା ସେଞ୍ଚୁରିଅନ ୟୁନିଭରସିଟି ଅଫ ଟେକ୍ନୋଲୋଜି ଆଣ୍ଡ ମ୍ୟାନେଜମେଣ୍ଟରେ ଅପରେସନ ଥିଏଟର, ପାରା ମେଡିକାଲ ଟେକ୍ନିସିଆନ କୋର୍ସରେ ଅଧ୍ୟୟନ କରୁଛନ୍ତି । ତାଙ୍କ ବାପା ଠିକା କର୍ମଚାରୀ ଭାବେ କାର୍ଯ୍ୟ କରୁଛନ୍ତି ।
ସୂଚନାଯୋଗ୍ୟ, ଆଇସିପିଡ଼ି ପ୍ରଥମକରି ୧୯୯୪ ମସିହାରେ କାଇରୋ ଠାରେ ଅନୁଷ୍ଠିତ ହୋଇଥିଲା । ଚଳିତ ବର୍ଷ ଏହି ସମ୍ମିଳନୀ ନାଇରୋବିରେ ଅନୁଷ୍ଠିତ ହୋଇଛି ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
