ଭୁବନେଶ୍ବର: ଆଉ ଦିନ କେଇଟା ପର ବଡ ଦିନ । ଏଥିପାଇଁ ଏବେଠୁ ରାଜଧାନୀରେ ଜମିଲାଣି ବଡ଼ ଦିନ ବଜାର । ଚାରିଆଡେ ଶୁଭୁଛି ଜିଙ୍ଗଲ ବେଲ ଗୀତ। ରାଜଧାନୀର ରାସ୍ତାଘାଟର ସବୁଠି ବ୍ରିକ୍ରି ହେଲାଣି ଖ୍ରୀଷ୍ଟମାସ ସାମଗ୍ରୀ । ଯେଉଁଠି ଦେଖିଲେ ସେଠାରେ ଲୋକଙ୍କ ଭିଡ ଜମୁଛି । ଏଣୁ ଏହି ଦିନର ଭିନ୍ନଭିନ୍ନ ରକମର ସାମଗ୍ରୀକୁ ନେଇ ରାଜଧାନୀର ପ୍ରମୁଖ ସ୍ଥାନ ଗୁଡ଼ିକରେ ଖୋଲି ଗଲାଣି ଖ୍ରୀଷ୍ଟମାସ ପସରା । ସବୁଠୁ ଅଧିକ ଗହଳି ଜମୁଛି ଏକନମ୍ବର ହାଟରେ । ଦୋକାନ ଗୁଡିକରେ ବେଲ୍ରୁ ନେଇ ସାନ୍ତା ଡ୍ରେସ୍ ଓ ଡ୍ୟାନସିଂ ସାନ୍ତା ଆଦି ସଭିଁଙ୍କୁ ବେଶ୍ ଆକର୍ଷିତ କରୁଛି ।
ଦେକାନ ଗୁଡିକରେ ଖ୍ରୀଷ୍ଟମାସ ଟ୍ରି, ଷ୍ଟାର୍, ସାନ୍ତାକ୍ଲଜ୍, ହ୍ୟାଙ୍ଗିଙ୍ଗ୍ ବେଲ୍, ସାନ୍ତା ଟୟ, ସାନ୍ତା ଟୋପି, ସାନ୍ତା ମୋଜା, ପୋଷାକ, ଖ୍ରୀଷ୍ଟମାସ ବ୍ୟାଣ୍ଡ, ଖ୍ରୀଷ୍ଟମାସ କାର୍ଡ, ଝୁମର ଆଦି ସାମଗ୍ରୀରେ ଭରି ଗଲାଣି ଦୋକାନ । ଦୁଇଫୁଟିଆ ରଙ୍ଗୀନ ଆଲୁଅର ଖ୍ରୀଷ୍ଟମାସ୍ ଟ୍ରିଠୁ ନେଇ ୧୨ରୁ ୧୫ ଫୁଟ ପର୍ଯ୍ୟନ୍ତ ବଡ଼ ବଡ଼ ପ୍ଲାଷ୍ଟିକ୍ ଖ୍ରୀଷ୍ଟମାସ୍ ଟ୍ରି ମଧ୍ୟ ରହିଛି । ଏସବୁର ଦାମ୍ ହଜାରେ ଟଙ୍କାରୁ ଆରମ୍ଭ ହୋଇ ୧୫ ହଜାର ଟଙ୍କା ଅଛି । ଏହାସହ ରାଜପଥରେ ବି ଅନେକ ରାଜସ୍ଥାନୀ ବ୍ୟବସାୟୀ ବଡ଼ଦିନ ବଜାର ଖୋଲିବିଆସିଥିବାବେଳେ ରାସ୍ତାର ଶୋଭା ବଢ଼ାଉଛି । ବିଶେଷ କରି ଛୋଟ ଛୋଟ ପିଲାମାନେ ଖ୍ରୀଷ୍ଟମାସକୁ ନେଇ ଅଧିକ ଉତ୍ସାହିତ ଅଛନ୍ତି । ତେବେ ଗତବର୍ଷ କୋଭିଡ ପାଇଁ ସବୁ ଫିକା ପଡିଥିବାବେଳେ ଚଳିତବର୍ଷ ଭଲ ବେପାର ହେବ ଆଶାରେ ରହିଛନ୍ତି ବ୍ୟବସାୟୀ। ସେଥିପାଇଁ କିଛି ଦିନ ହେଲା ଜମିଛି ବଡ଼ଦିନ ବେପାର । ଅନ୍ୟପଟେ ଘରେ ରହି ବନ୍ଧୁ ପ୍ରିୟଜନଙ୍କ ସହ ଖୁସି ବାଣ୍ଟିବା ସହ ରାଜଧାନୀବାସୀ ପାଳିବେ ବଡ଼ଦିନ ।
ଖ୍ରୀଷ୍ଟିଆନ ସମ୍ପ୍ରଦାୟ(Christian community )ଙ୍କ ବଡ଼ପର୍ବ ଖ୍ରୀଷ୍ଟମାସ ହୋଇଥିବାବେଳେ କିନ୍ତୁ ରାଜଧାନୀରେ ସବୁ ସମ୍ପ୍ରଦାୟର ଲୋକେ ଖ୍ରୀଷ୍ଟମାସ ପାଳନ କରିଥାନ୍ତି । ହେଲେ ଏ ବର୍ଷ ବି ଲୋକଙ୍କ ଖୁସିରେ ଗ୍ରହଣ ଲଗାଇଦେଇଛି ମହାମାରୀ । ସମାବେଶ, ସେଲିବ୍ରେଶନ ଉପରେ କଟକଣା ଲଗାଇ ଦେଇଛନ୍ତି ସରକାର । କେବଳ ଚର୍ଚ୍ଚରେ ଯୀଶୁଙ୍କ ଜନ୍ମଦିନ ପାଳନ ହେବ ଆଉ ଘରେ ରହି ଖ୍ରୀଷ୍ଟମାସ ପାଳିବେ ଲୋକେ ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
