ଭୁବନେଶ୍ବର: ଦଳ ହୋଇ ଘରେ ପଶୁଥିଲେ, ଏକାଥରେ ୩ ରୁ ୪ ଗାଡି ଚୋରି କରୁଥିଲେ । ଇନଫୋ ଭ୍ୟାଲି, ମଞ୍ଚେଶ୍ବର, ଜଟଣି, ଭରତପୁର ଥାନା ଅଞ୍ଚଳରେ ଲୋକଙ୍କ ନିଦ ହଜାଉଥିବା ଏହି ବାଇକ ଚୋର ଗ୍ୟାଙ୍ଗକୁ ଧରିଛି କମିଶନରେଟ ପୋଲିସ । ୩୦ ଟି ଚୋରା ବାଇକ ଜବତ କରିବା ସହ ୬ ଜଣ ଅଭିଯୁକ୍ତଙ୍କୁ ଗିରଫ କରିଛି ପୋଲିସ ।
ଏଥିସହ ଚୋରି ଗାଡି କିଣୁଥିବା ୨ ଜଣ ରିସିଭରଙ୍କୁ ମଧ୍ୟ ଗିରଫ କରାଯାଇଛି । ତେବେ ଏମାନେ ବିଶେଷ କରି ରାତି ସମୟରେ ସହରର ଉପକଣ୍ଠରେ ବୁଲୁଥିଲେ । ନିଛାଟିଆ ଆଢୁଆଳ ଦେଖି ଘରେ ପଶୁଥିଲେ । ଗ୍ରିଲ ତାଡି ୩ ରୁ ୪ ଗାଡି ଚୋରି କରୁଥିଲେ । ଏହିପରି ଭାବରେ ଫେବୃଆରୀ ଓ ମାର୍ଚ୍ଚ ମାସରେ ଏହି ଗ୍ୟାଙ୍କ ଅଧିକ ଚୋରି କରୁଥିଲେ ।
ଶେଷରେ ସିସିଟିଭିରେ ମିଳିଥିଲା ଗ୍ୟାଙ୍ଗର ସୁରାକ । ପୋଲିସ ଖୋଳତାଡ କରି ୬ ଅଭିଯୁକ୍ତଙ୍କୁ ଗିରଫ କରିଛି । ଅଭିଯୁକ୍ତମାନେ ବ୍ରହ୍ମପୁର ଏବଂ ପୁରୀ ଅଞ୍ଚଳର ହୋଇଥିବା ଜଣାପଡିଛି । ବିଶେଷ କରି ଗାଡି ଚୋରି ପରେ ୧୦ ରୁ ୧୨ ହଜାର ଟଙ୍କାରେ ବିକ୍ରି କରିଦେଉଥିଲେ । ଏହିପରି ଢଙ୍ଗରେ ରାଜଧାନୀର ଉପକଣ୍ଠରୁ ବୁଲେଟ ଭଳି ବାଇକ ମଧ୍ୟ ହାଣ୍ଡେଲ ଭାଙ୍ଗି ଚୋରି କରୁଥିଲେ ଦୁର୍ବୃତ୍ତ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
