ଭୁବନେଶ୍ବର: ଆସନ୍ତା ୨୬ ତାରିଖରେ ନୂଆଦିଲ୍ଲୀରେ ହେବାକୁ ଯାଉଛି ମାଓ ମୁକାବିଲା ବୈଠକ । ଏହି ବୈଠକରେ ଯୋଗଦେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଶୁକ୍ରବାର ଦିଲ୍ଲୀ ଯିବେ ନବୀନ । ତେବେ ବୈଠକରେ ଯୋଗଦେବା ପୂର୍ବରୁ ରାଜ୍ୟ ସଚିବାଳୟରେ ଗୁରୁତ୍ବପୂର୍ଣ୍ଣ ବୈଠକ ଅନୁଷ୍ଠିତ ହୋଇଛି।
ତେବେ ନୂଆଦିଲ୍ଲୀରେ ହେବାକୁ ଥିବା ବୈଠକରେ ୧୧ଟି ରାଜ୍ୟର ମୁଖ୍ୟମନ୍ତ୍ରୀଙ୍କ ସମେତ ମୁଖ୍ୟ ଶାସନ ସଚିବ ଓ ଡିଜିପି ଯୋଗଦେବେ । ସୁରକ୍ଷା ସମ୍ପର୍କରେ ୧୦ଟି ଏଜେଣ୍ଡା ଉପରେ ଆଲୋଚନା ହେବ । ଏହି ବୈଠକରେ ବିଏସଏଫ ,ସିଆରପିଏଫ ଓ ଆଇଟିବିପିର ବରିଷ୍ଠ ଅଧିକାରୀ ମାନେ ଯୋଗଦେବାର ସୂଚନା ରହିଛି ।
ମାଓ ଉପଦ୍ରୃତ ଜିଲ୍ଲାଗୁଡିକରେ ଅପରେସନ ତୀବ୍ର କରିବା, ଖାଲି ପଡିଥିବା ପଦ ପଦବୀରେ ତୁରନ୍ତ ନିଯୁକ୍ତି, ମାଓ ସଂଗଠନକୁ ଆସୁଥିବା ଅର୍ଥ ଉପରେ ଲଗାମ ଲଗାଇବା, ରୁଜୁ ହୋଇଥିବା ମାମଲାର ତଦନ୍ତ, ମାଓ ସଂଗଠନ ବିରୋଧରେ କାର୍ଯ୍ୟାନୁଷ୍ଠାନ ଓ ମାଓ ଦମନ ପାଇଁ ରାଜ୍ୟ ଗୁଡିକ ମଧ୍ୟରେ ସମନ୍ଵୟ ଭଳି ଦଶଟି ବିଷୟରେ ବୈଠକରେ ଆଲୋଚନା ହୋଇପାରେ। ଆଜିର ଏହି ବୈଠକରେ ମାଓ ଉପଦ୍ରବ ଅଞ୍ଚଳର ବିକାଶ ଓ ମାଓ ମୁକାବିଲା ନେଇ ବିସ୍ତୃତ ଆଲୋଚନା ହୋଇଛି । ତେବେ ମାଓ ଉପଦ୍ରବ ୧୫ଟି ଜିଲ୍ଲାରୁ ହ୍ରାସ ପାଇ ୫ଟି ଜିଲ୍ଲାରେ ସୀମିତ ରହିଛି । ଆହୁରି ସଫଳତା ଆଗକୁ କିଭଳି ମିଳିବ ସେନେଇ ବୈଠକରେ ଆଲୋଚନା ହୋଇଛି ।
ବର୍ତ୍ତମାନ ଦକ୍ଷିଣ ଓଡ଼ିଶାର ୮ ହଜାର ଗାଁରେ ମୋବାଇଲ ଟାଓ୍ଵାର ନାହିଁ । ସେଥିରେ ୬ ହଜାର ନକ୍ସଲ ପ୍ରବଣ ଗାଁରେ ମୋବାଇଲ ଟାଓ୍ଵାର ନାହିଁ । ଏଥିସହ ଗୁରୁପ୍ରିୟା ସେତୁ ହେବା ପରେ ମାଲକାନଗିରିରେ ନକ୍ସଲ ପାଦ୍ରୃଭାବ କମିଛି । ଗୁରୁପ୍ରିୟା ଭଳି ଆହୁରି ଅନେକ ପ୍ରୋଜେକ୍ଟ କରାଯିବ । ରୋଡ ଓ ଟ୍ରାନ୍ସପୋର୍ଟର ବ୍ୟବସ୍ଥା କରାଯିବ ବୋଲି ସୂଚନା ଦେଇଛନ୍ତି ମୁଖ୍ୟ ଶାସନ ସଚିବ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
