ଭୁବନେଶ୍ବର: ରାଜ୍ୟରେ ବଢିଚାଲିଛି କୋରୋନା ଆକ୍ରାନ୍ତଙ୍କ ସଂଖ୍ୟା । ଏପରି ସଙ୍କଟ ସମୟରେ ସମସ୍ତେ ବିବେକର ସହ କାମ କରନ୍ତୁ ବୋଲି କହିଛନ୍ତି ରାଜ୍ୟ ସରକାରଙ୍କ ମୁଖ୍ୟ ମୁଖପାତ୍ର ସୁବ୍ରତ ବାଗଚୀ ।
ବାଗ୍ଚୀ କହିଛନ୍ତି ଯେ କିଛି ଲୋକ ଗୋଟିଏ ସ୍ଥାନରୁ ଅନ୍ୟ ଏକ ସ୍ଥାନକୁ ଯିବାକୁ ଆମ୍ବୁଲାନ୍ସ ଆପଣାଉଛନ୍ତି । ସେହିପରି କିଛି ଆମ୍ବୁଲାନ୍ସ ଡ୍ରାଇଭର ମଧ୍ୟ ଟଙ୍କା ଲୋଭରେ ନିଜର ବିବେକ ହରାଉଛନ୍ତି । ଏମିତି କିଛି ଆମ୍ବୁଲାନ୍ସ ପାଇଁ ସମସ୍ତ ଆମ୍ବୁଲାନ୍ସଗୁଡିକୁ ଯାଞ୍ଚ କରାଯାଉଛି । ଏଥିପାଇଁ ଅନେକ ରୋଗୀ ହାଇରଣରେ ପଡୁଛନ୍ତି । ମୁଖ୍ୟମନ୍ତ୍ରୀ ଅନେକ ସମୟରେ ଆମ୍ବୁଲାନ୍ସକୁ ବାଟ ଛାଡିଛନ୍ତି । ମହାପ୍ରଭୁଙ୍କ ରଥଯାତ୍ରା ସମୟରେ ବି ଆମ୍ବୁଲାନ୍ସକୁ ବାଟ ଛଡ଼ାଯାଇଥିବା ନଜିର ରହିଛି । ଏପରିସ୍ଥିତିରେ ବିବେକହୀନ ଭାବରେ ଆମ୍ବୁଲାନ୍ସର ଅସଦ ବ୍ୟବହାର ନକିରବାକୁ କହିଛନ୍ତି ବାଗ୍ଚୀ ।
ଅନ୍ୟପକ୍ଷେ ଓଡିଶାକୁ 4ର୍ଥ ପର୍ଯ୍ୟାୟରେ ବାଲେଶ୍ୱର, ଭଦ୍ରକ ଓ ଯାଜପୁର ଆଦି 3 ଜିଲ୍ଲା ସଫଳ କରାଇବେ ବୋଲି କହିଛନ୍ତି ବାଗ୍ଚୀ । ଏହି 3ଟି ଜିଲ୍ଲାବାସୀ ମୁଖ୍ୟତଃ 4ଟି କଥାକୁ ଅଧିକ ଗୁରୁତ୍ୱ ଦେବା ଆବଶ୍ୟକ ବୋଲି ସେ କହିଛନ୍ତି ।
ସରକାରଙ୍କ 4ଟି ମୁଖ୍ୟ ବାର୍ତ୍ତା
- ନଡରି ଆଗକୁ ଆସନ୍ତୁ
- ଅଲଗା ରୁହନ୍ତୁ
- ସନ୍ଦିଗ୍ଧ ଥିଲେ ପରୀକ୍ଷା କରନ୍ତୁ
- ସଂକ୍ରମିତ ଥିଲେ ସଂସ୍ପର୍ଶରେ ଆସିଥିବା ଲୋକଙ୍କ ତଥ୍ୟ ଦିଅନ୍ତୁ
ବାଗ୍ଚୀ ଆହୁରି ମଧ୍ୟ କହିଛନ୍ତି ଯେ ଓଡ଼ିଶାରେ ଜନ ସଂଖ୍ୟାର ପ୍ରାୟ 10 ପ୍ରତିଶତ ବୟସ୍କ ନାଗରିକ । ବୟସ୍କ ନାଗରିକଙ୍କ ପ୍ରତି ସ୍ୱତନ୍ତ୍ର ଧ୍ୟାନ ଦେବାକୁ ହେବ । ଶିଶୁମାନଙ୍କ ସୁରକ୍ଷା ନେଇ ଅଧିକ ସତର୍କ ହେବାକୁ ପଡିବ।
ରାଜ୍ୟରେ 33 ଟି କୋଭିଡ ହସ୍ପିଟାଲ କରାଯାଇଥିବା ସୂଚନା ଦେଇଛନ୍ତି ସୁବ୍ରତ । ସେହିପରି ଶଯ୍ୟା ସଂଖ୍ୟା 5476କୁ ବୃଦ୍ଧି ପାଇଛି । କଟକ ଏସସିବି ମେଡିକାଲରେ 105 ଜଣ ନର୍ସଙ୍କ ସ୍ୱତନ୍ତ୍ର ଟ୍ରେନିଂ ଜାରି ରହିଛି । ଏହି ଟ୍ରେନିଂ 7 ଦିନ ପାଇଁ ଚାଲିବ ବୋଲି ସେ କହିଛନ୍ତି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
