ଭୁବନେଶ୍ବର: ସ୍ଥାନୀୟ ରବିନ୍ଦ୍ର ମଣ୍ଡପରେ ଆୟୋଜିତ ହୋଇଯାଇଛି ‘ଶରତ ସନ୍ଧ୍ୟା’ । ପ୍ରଖ୍ୟାତ କବି ତଥା ପୂର୍ବତନ ଆୟକର କମିଶନର ଶରତ କୁମାର ଦାସଙ୍କ ସାରସ୍ବତ ସ୍ବାକ୍ଷରର ଉନ୍ମୋଚନ ଅବସରରେ କବିତା ପୁସ୍ତକ ‘ଆରୋହଣ’ ସଙ୍ଗୀତ ଓ ଗଳ୍ପ ପୁସ୍ତକ ‘ଘାସଫୁଲ’ର ଶୁଭ ଉନ୍ମୋଚନ କରାଯାଇଛି । ଏଥିସହ ଆରୋହଣ କବିତା ପୁସ୍ତକରୁ ଉଦ୍ଧୃତ କିଛି କବିତାକୁ ନେଇ ସଙ୍ଗୀତ ଆଲବମ ‘ଆରୋହଣ’ର ମଧ୍ୟ ଶୁଭ ଉନ୍ମୋଚନ କରାଯାଇଛି ।
ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ରାଜ୍ୟ କୃଷି ଓ ଉଚ୍ଚଶିକ୍ଷା ମନ୍ତ୍ରୀ ଡ଼ଃ ଅରୁଣ ସାହୁ ଯୋଗ ଦେଇଥିଲେ । ଅନ୍ୟମାନଙ୍କ ମଧ୍ୟରେ ଢେଙ୍କାନାଳ ସାଂସଦ ମହେଶ ସାହୁ, ରାଜ୍ୟର ପ୍ରଧାନ ମୁଖ୍ୟା ଆୟକର ଆୟୁକ୍ତ ପ୍ରଣବ କୁମାର ଦାସ, ଭାଷା ସାହିତ୍ୟ ଓ ସଂସ୍କୃତି ବିଭାଗ ସଚିବ ମନୋରଞ୍ଜନ ପାଣିଗ୍ରାହୀ, ବରିଷ୍ଠ କବି ହୃଷିକେଶ ମଲ୍ଲିକ ଓ ସଙ୍ଗୀତ ନିର୍ଦ୍ଦେଶକ ପ୍ରେମ ଆନନ୍ଦ ପ୍ରମୁଖ ଉପସ୍ଥିତ ରହିଥିଲେ ।
ତେବେ ଏହି କାର୍ଯ୍ୟକ୍ରମରେ କବି ଶରତ ଦାଶଙ୍କ ରଚିତ ସଙ୍ଗୀତରେ ଓଡିଶୀ ନୃତ୍ୟଗୁରୁ ଗୌରୀଶଙ୍କର ଦାଶଙ୍କ ଛାତ୍ରଛାତ୍ରୀମାନେ ନୃତ୍ୟ ପରିବେଷଣ କରିଥିଲେ । ଏଥିସହ ଘାସଫୁଲ ସଙ୍କଳନର ପ୍ରଥମ ଗଳ୍ପ ‘ପଥର’କୁ ନେଇ କଥାଭିନୟ ପ୍ରଦର୍ଷନ କରିଥିଲେ ପ୍ରାଚୀତାରା ମିଶ୍ର । ଶେଷରେ ସଙ୍ଗୀତ ଆଲବମରେ କଣ୍ଠଦାନ କରିଥିବା ଶିଳ୍ପୀମାନେ ମଞ୍ଚରେ ସଙ୍ଗୀତ ପରିବେଷଣ କରିଥିଲେ ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
