ଭୁବନେଶ୍ବର: ଟ୍ରେନରେ ଆର୍ମି ପରୀକ୍ଷାର୍ଥୀଙ୍କ ବଦମାସି । ମହିଳା ଯାତ୍ରୀଙ୍କ ସହ ଅନ୍ୟଯାତ୍ରୀଙ୍କୁ ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି । ଅଭିଯୋଗ ଆଧାରରେ 18 ଜଣ ଯୁବକଙ୍କୁ ଅଟକ ରଖିଛି ରେଳବାଇ ପୋଲିସ ।
ଭୁବନେଶ୍ବରରେ ସୋମବାର ହେବାକୁ ଥିବା ଆର୍ମି ପରୀକ୍ଷା ପାଇଁ ସମସ୍ତ ରାଜ୍ୟରୁ ଯୁବକ ଆସୁଛନ୍ତି । ନନ୍ଦନକାନନ ଏକ୍ସପ୍ରେସ ଦିଲ୍ଲୀ ଛାଡିବା ପରେ ଆର୍ମି ପରୀକ୍ଷା ପାଇଁ ଶହ ଶହ ଯୁବକ ରିଜର୍ଭଭେସନ ବଗିରେ ଚଢିଥିଲେ । ଉକ୍ତ ଯୁବକମାନେ ବଗିରେ ଥିବା ଅନ୍ୟ ଯାତ୍ରୀଙ୍କୁ ଖାଇବା ପିଇବା ଏବଂ ନିତ୍ୟକର୍ମ ପାଇଁ ବି ଛାଡୁନଥିଲେ । ଖାଲି ସେତିକି ନୁହେଁ ମହିଳା ଏବଂ ଯୁବତୀ ଯାତ୍ରୀଙ୍କୁ ଦୁର୍ବ୍ୟବହାର କରିବା ସହିତ ଅଶ୍ଳୀଳ ଭାଷାରେ ଗାଳିଗୁଲଜ କରିଥିଲେ । ଏଥିସହ ପଥର ମାଡ଼ କରିବା ସହ ଟ୍ରେନକୁ ନିଆଁ ଲଗାଇଦେବେ ବୋଲି ଧମକ ଦେଉଥିଲେ । ଏନେଇ ସେମାନଙ୍କୁ ବରଣ କରାଯାଇଥିବାବେଳେ ସେମାନେ ଟ୍ରେନ ଭିତର ଭଙ୍ଗାରୁଜା କରିଥିଲେ । ଯାହାକୁ ନେଇ ଯାତ୍ରୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା ।
ତେବେ ଯୁବକଙ୍କ ଦୁର୍ବ୍ୟବହର ରେଳବାଇ ପୋଲିସ ଦେଖୁଥିଲେ ମଧ୍ୟ ଯାତ୍ରୀଙ୍କ ଅଭିଯୋଗକୁ ଅଣଦେଖା କରିଥିଲେ । ହେଲେ ଟ୍ରେନଟି ଭୁବନେଶ୍ବର ପ୍ଲାଟଫର୍ମରେ ପହଞ୍ଚିବା ପରେ ଉକ୍ତ ଘଟଣାରେ ଜିଆରପି ପୋଲିସ ଓ ଆରପିଏଫ ୧୮ ଜଣଙ୍କୁ ରେଳବାଇ ଥାନାରେ ଅଟକ ରଖିଛି । ଦେଶକୁ ସୁରକ୍ଷା ଦେବାରେ ନିଜକୁ ନିୟୋଜିତ କରିବା ପାଇଁ ପ୍ରସ୍ତୁତି କରୁଥିବା ଯୁବକଙ୍କ ଏଭଳି ବ୍ୟବହାରରେ ସାଧାରଣରେ ଅସନ୍ତୋଷ ସୃଷ୍ଟି ହୋଇଛି ।
ଭୁବନେଶ୍ବରରୁ ବିକାଶ ଦାସ, ଇଟିଭ ଭାରତ
