ଭୁବନେଶ୍ବର: ଜମି ପାଇଁ ନେଇଥିଲେ ମୁଣ୍ଡ । ହତ୍ୟାକାଣ୍ଡ ପରେ ଲୁଚିଥିଲେ ଅଭିଯୁକ୍ତ । ଦୀର୍ଘ ଦେଢମାସ ପରେ ଅନିଲ ଜେନା ହତ୍ୟାକାଣ୍ଡର 2ମୁଖ୍ୟ ଅଭିଯୁକ୍ତଙ୍କୁ ଗିରଫ କରିଛି ପୋଲିସ । ଖୋର୍ଦ୍ଧା,ନୟାଗଡରୁ ଖସିବା ପରେ ଉଭୟଙ୍କୁ ରାୟଗଡାରୁ ଗିରଫ କରାଯାଇଛି ।
ଖଣ୍ଡଗିରି ବାହାଦଲପୁର ଅନିଲ ଜେନା ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ବାପି ଓରଫ ଭରତ ସାହୁ ଓ ହାପି ଓରଫ ଦୁର୍ଗା ପ୍ରସାଦକୁ ଗିରଫ କରିଛି ପୋଲିସ । ଗିରଫ ପରେ ହତ୍ୟାକାଣ୍ଡର ଖୁଲାସା କରିଛି କମିସନରେଟ ପୋଲିସ। ଜମିଜମା ବିବାଦକୁ କେନ୍ଦ୍ର କରି ହୋଇଥିଲା ହତ୍ୟାକାଣ୍ଡ ।
ସୂଚନା ଅନୁସାରେ, ଗତ ନଭେମ୍ବର ୭ରେ ବାପି,ହାପି ଓ ରାଜା ବାଇକରେ ଆସି ଅନିଲ ଜେନାକୁ ଗୁଳି କରି ହତ୍ୟା କରିଥିଲେ । ପରେ ୩ ସହଯୋଗୀ ପୁଲକ ହାତି,ଚିତରଂଜନ ପରିଜା ଓ ଆଲୋକ ପ୍ରଧାନ ଜରିଆରେ ଘଟଣାସ୍ଥଳରୁ ଫେରାର ହୋଇଥିଲେ । ତେବେ ଘଟଣାରେ ବ୍ୟବହୃତ ହୋଇଥିବା 2ଟି ବନ୍ଧୁକରୁ ଗୋଟିଏକୁ ଜବତ କରିଛି ପୋଲିସ । ଅନ୍ୟପଟେ ଏହି ହତ୍ୟାକାଣ୍ଡର ଆଉ ଜଣେ ଅଭିଯୁକ୍ତ ରାଜ ବିଶୋଇ ଏବେବି ଫେରାର ଅଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
